Last updated on August 14th, 2025 at 06:49 pm
ಕುಡ್ಲ, ಆ. 14: ಕುಡುಮ ಸೀಮೆಡ್ ಕರಿನ ಪಾಕ ವರ್ಸೊರ್ದಿಂಚಿ ಅಸಹಜ ಸಾವು ಪ್ರಕರಣೊಲೆನ ನೈಜ ಆರೋಪಿಲೆನ್ ನಾಡ್ಪತ್ತೊಡು ಪನ್ದ್ ಆಗಸ್ಟ್ 24 ತಾನಿ ಸೌಜನ್ಯ ಹೋರಾಟ ಸಮಿತಿರ್ದ್ ‘ಉಜಿರೆ ಚಲೋ’ ಅಟ್ಟನೆ ಮಲ್ದೆರ್.
ಧರ್ಮಸ್ಥಳ ಸೀಮೆಡ್ ಕರಿನ ಪಾಕ ವರ್ಸೊರ್ದಿಂಚಿ ಅತ್ಯಾಚಾರ, ಕೆರ್ಪುನ, ದಗೆತಂಚಿನ ಪ್ರಕರಣೊಲು ನಡತೊಂದುಲ್ಲ. 1983 ಟ್ ಧರ್ಮಸ್ಥಳಡ್ ನಡತಿನ ಸಾವುಲೆನ ಬಗೆಟ್ ಅಪಗದ ವಿಧಾನ ಸಭೆಟ್ಲಾ ಚರ್ಚೆ ಆದಿತ್ತ್ಂಡ್. ಅವಾಯಿ ಬೊಕ್ಕ 1986 ಟ್ ಶ್ರೀ ಕ್ಷೇತ್ರ ಧರ್ಮಸ್ಥಳೊದ ಕಡೆರ್ದ್ ನಡಪುನ ಶಾಲೆದ ಶಿಕ್ಷಕಿ ವೇದವಲ್ಲಿ ಪನ್ಪಿನಾರೆನ್ ಪೆಟ್ರೋಲ್ ಮೈತ್ದ್ ಸೂ ಕೊರ್ದು ಕೆರ್ದಿತ್ತೆರ್. ಈ ಪ್ರಕರಣೊದ ಆರೋಪಿ ತಿಕ್ಕ್ದಿಜೆ, ಕುಡ 1973 ಟ್ ಎಸ್.ಡಿ.ಎಮ್ ಕಾಲೇಜ್ದ ವಿದ್ಯಾರ್ಥಿನಿ ಪದ್ಮಲತಾನ್ ಅತ್ಯಾಚಾರ ಮಲ್ತ್ ಕೆರ್ದಿತ್ತೆರ್. ಐತಲಾ ಆರೋಪಿ ತಿಕ್ಕ್ದಿಜೆ. ಬೊಕೂ 2012 ಟ್ ಶ್ರೀ ಕ್ಷೇತ್ರೊಡು ಬೇಲೆ ಮಲ್ತೊಂದಿತ್ತಿನ ಆನೆ ಮಾವುತೆ ನಾರಾಯಣೆ ಬೊಕ್ಕ ಯಮುನಾ ಪನ್ಪಿನಕ್ಲೆನ್ ಕೇರ್ದ್, ಲೂಟ್ದಿತ್ತೆರ್, ಮುಲ್ಪಲಾ ಆರೋಪಿ ತಿಕ್ಕ್ದಿಜೆ. ಅವು ಆದ್ 20 ದಿನೊಟೇ ಪನ್ಡ 9/10/2012 ತಾನಿ ಸೌಜನ್ಯನ್ ಅತ್ಯಾಚಾರ ಮಲ್ತ್ದ್ ಕೆರ್ದಿತ್ತೆರ್. ಇಂದೆತಲಾ ಆರೋಪಿ ತಿಕ್ಕ್ದಿಜೆ, ಆತೇ ಅತ್ತಂದೆ ಈ ನಡುಟು ಧರ್ಮಸ್ಥಳ ಬೊಕ್ಕ ಉಜಿರೆಡ್ 2002 ರ್ದ್ 2012 ಮುಟ್ಟ 452 ಆಸಹಜ ಸಾವು ಪ್ರಕರಣೊಲು ನಡತ್ದ. ಇಂದೆಟ್ ಧರ್ಮಸ್ಥಳ ಗ್ರಾಮ ಪಂಚಾಯತ್ದಕುಲು ಪನ್ಪುನ ಪುನೊಕ್ಲೆಗ್ಲಾ ಪೋಲಿಸ್ ಇಲಾಖೆ ಕೊರ್ತಿನ ಯು.ಡಿ.ಆರ್.ಗ್ಲಾ ಎತ್ವಾಸಿ ತೋಜಿದ್ ಬರ್ಪುಂಡು. ಅತ್ತಂದೆ 1970 ರ್ದ್ 2025 ಮುಟ್ಟ ಪಾಕ ಕೊಲೆ ಬೊಕ್ಕ ಅತ್ಯಾಚಾರದಂಚಿನ ಪ್ರಕರಣೊಲು ನಡತ್ದ. ಈತ್ ಮಾತಾ ಪ್ರಕರಣೊಲು ಧರ್ಮಸ್ಥಳಡ್ ನಡತ್ಂಡಲಾ ವಾ ಪ್ರಕರಣೊಡ್ಲಾ ಆರೋಪಿಲು ತಿಕ್ಕೊಂದಿಜ್ಜೆರ್ ಪನ್ದ್ ಪತ್ರಿಕಾಗೋಷ್ಠಿಡ್ ಕೆ.ದಿನೇಶ್ ಗಾಣಿಗೆರ್ ಪನ್ಡೆರ್.
ಉಂದೆರ್ದಾವರ ಶ್ರೀ ಕ್ಷೇತ್ರೊದ ಪುದರ್ ತೆಟ್ಟೊಂದುಂಡು, ಜನೊಕ್ಲೆಡ ಕ್ಷೇತ್ರೊದ ಬಗೆಟ್ ಅಪನಂಬಿಕೆ ಬರೊಂದುಂಡು. ಉಂದೆಕ್ ಮಾತಾ ಪೋಲಿಸ್ ಇಲಾಖೆ ಆರೋಪಿಲೆನ್ ಪತ್ತಂದೆ ಇಪ್ಪುನವೇ ನೆವನ, ಅಂಚಾದ್ ಈ ಬಗೆಟ್ ದುಂಬುದ ಮಾತಾ ಪ್ರಕರಣೊಲೆನ ಜಡ್ತೆ ಮಲ್ತ್ದ್ ಆರೋಪಿಲೆನ್ ಪತ್ತೊಡು ಪನ್ಡ್ದ್ ರಾಜ್ಯದ ಸರಕಾರೊದ ಪ್ರಧಾನ ಕಾರ್ಯಂತೆರೆಡ ಒಯಿಲ್ ಬರೆಪಾದ್ಂಡ್. ಈ ನಡುಟು ಕೆಲ ರಾಜಕೀಯ ನಾಯಕೆರ್ ಬೊಕ್ಕ ಸಂಘಟನೆದ ನಾಯಕೆರ್ ಶ್ರೀಕ್ಷೇತ್ರೊದ ಪುದರ್ ತೆಟ್ಟೊಂದುಂಡು, ಹಿಂದೂ ಧರ್ಮ ತೆಟ್ಟೊಂದುಂಡು ಪನ್ದ್ ಪತ್ರಿಕಾಗೋಷ್ಠಿ ಮಲ್ತೊಂದುಲ್ಲೆರ್. ಕೆಲ ಶಾಸಕೆರ್ ವಿಧಾನಸಭೆಟ್ಲಾ ಈ ವಿಷಯೊದ ಚರ್ಚೆ ಮಲ್ತೊಂದುಲ್ಲೆರ್. ದುಂಬು ವೇದವಲ್ಲಿ, ಪದ್ಮಲತಾ, ನಾರಾಯಣೆ ಬೊಕ್ಕ ಯಮುನಾ, ಸೌಜನ್ಯನ್ ಕೆರ್ನಗ ಪಾತೆರಂದಿನ ಬೊಕ್ಕ ಆಕ್ವಿಟಲ್ ಕಮಿಟಿ ಮಲ್ಪುನೆತ ಬಗೆಟ್ ಪಾತೆರಂದಿನ ಈ ಶಾಸಕೆರ್ ಇತ್ತೆ ದಾಯೆ ಪೊರ್ಮ್ಬೊಂದುಲ್ಲೆರ್. ಏರೆನ್ ಬದ್ಕಾಯೆರ ಬೋಡಾದ್ ಪೊರ್ಮ್ಬೊಂದುಲ್ಲೆರ್ ಪನ್ದ್ ಜನಸಾಮಾನ್ಯೆರೆಗ್ ತೆರಿದ್ಂಡ್ ಪನ್ದ್ ಪನ್ಡೆರ್.
ಅಂಚಾದ್ ಈ ನಾಲ್ ಪ್ರಕರಣೊಲೆನ್ ಎಸ್.ಐ.ಟಿ.ಗ್ ಕೊರ್ದು ಜಡ್ತೆ ಮಲ್ತ್ದ್, ಆರೋಪಿಲೆನ್ ಪತ್ತೊಡು ಬೊಕ್ಕ ಇತ್ತೆ ನಡತೊಂದುಪ್ಪುನ ಎಸ್.ಐ.ಟಿ ಜಡ್ತೆಗ್ ಬೆರಿತಾಂಗ್ ತೋಜಾದ್, ರಾಜ್ಯೊದ ಮಾತಾ ಭಾಗೊದ ಜನೊಕುಲು ಸೇರ್ದ್ ತೇದಿ 24-08-2025ತ ಐತಾರದಾನಿ ‘ಉಜಿರೆ ಚಲೋ’ ಪನ್ಪಿ ಕಾರ್ಯಕ್ರಮೊದ ಅಟ್ಟನೆ ಮಲ್ತೊಂದ ಪನ್ದ್ ತೆರಿಪಾದೆರ್.
ಪತ್ರಿಕಾಗೋಷ್ಠಿಡ್ ಆದಿತ್ಯೆ, ಯೋಗೇಂದ್ರ ಪುತ್ರನ್,ಕಿರಣ್ ಒತ್ತುಪಾಲಿತ್ತೆರ್.