Last updated on August 21st, 2025 at 10:19 am
ಬೆಂಗಳೂರು, ಆ 21: ಕಾರ್ಲದ ಬೈಲೂರ್ದ ಉಮಿಕಲ್ ಗುಡ್ಡೆಡ್ ಪರಶುರಾಮ ಥೀಮ್ ಪಾರ್ಕ್ಡ್ ಪರುಶುರಾಮ ಒರುನು ಪಿರ ಉಂತಾಯೆರ ಹೈಕೋರ್ಟ್ ಗ್ ಪಿಐಎಲ್ ಪಾಡ್ದಿತ್ತಿನ ಉದಯ ಶೆಟ್ಟಿ ಮುನಿಯಾಲ್ ಮೆರೆಗ್ ಹೈಕೋರ್ಟ್, ಒರು ಉಂತಾಯೆರ ಕಾಣಿಗೆ ಆದ್ 5 ಲಕ್ಷ ಡೆಪಾಸಿಟ್ ದೀಯೆರ ಆದೇಶ ಮಲ್ದ್ಂಡ್.
ಕಾರ್ಲದ ಪರುಶುರಾಮ ಥೀಮ್ ಪಾರ್ಕ್ಡ್ ಪೊಸ ಟೆಂಡರ್ ಲೆಪ್ಪುನ ಮುಕೇನ ಪರುಶುರಾಮನ ಒರುನು ಕುಡ ಉಂತಾವೊಡು ಪನ್ದ್ ಸರಕಾರ ಬೊಕ್ಕ ಜಿಲ್ಲಾಡಳಿತೊಗು ನಿರ್ದೇಶನ ಕೊರೊಡು ಪನ್ದ್ ಕೆಪಿಸಿಸಿ ಪದುಕೆರ್ಲಾ ಆದುಪ್ಪುನ, ಕರಿನ ವಿಧಾನಸಭಾ ಎಲೆಕ್ಷನ್ಡ್ ಕಾರ್ಕಳ ಕ್ಷೇತ್ರೊರ್ದು ಉಂತುದಿತ್ತಿನ ಒಡಿಪುದ ಉದಯ ಶೆಟ್ಟಿ ಮುನಿಯಾಲ್ ಮೇರ್ ಸಂದಾದಿತ್ತಿನ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ ಮುಖ್ಯ ನ್ಯಾ. ವಿಭು ಬಖ್ರು ಬೊಕ್ಕ ನ್ಯಾ. ಸಿ.ಎಂ. ಜೋಷಿ ಮೊಕಲೆನ ವಿಭಾಗೀಯ ನ್ಯಾಯಪೀಠೊದ ಎದುರು ಕೋಡೆ, ಬುಧವಾರ ವಿಚಾರಣೆಗ್ ಬತ್ತಿತ್ತ್ಂಡ್.
ಹಿಂದೂ ನಂಬಿಕೆದ ಪ್ರಕಾರ ಪರಶುರಾಮೆ ಕಡಲ ಕರೆತ ಜಾಗೆಲೆನ್ ಉಂಡು ಮಲ್ತಿನಾರ್ ಪನ್ದ್ ನಂಬೊಲಿಗೆ ಇತ್ತ್ದ್, ಭಗವಾನ್ ಪರಶುರಾಮನ ಬಗೆಟ್ ಹಿಂದೂಲೆಗ್ ಮಲ್ಲ ಭಕ್ತಿ ಉಂಡು. ಒರು ಉಂತಾಯಿಜಿಂಡ ಜನೊಕ್ಲೆನ ಧಾರ್ಮಿಕ ಭಾವನೆಲೆಗ್ ತೆಟ್ಟ್ ಮಲ್ತಿಲೆಕ ಆಪುಂಡು. ಅಂಚಾದ್ ಪರಶುರಾಮನ ಒರುನು ಕುಡ ಉಂತಾಯೆರ ಸಂಬಂಧಿತಿನ ಇಲಾಖೆಲೆಗ್ ನಿರ್ದೇಶನ ಕೊರೊಡು ಪನ್ದ್ ಅರ್ಜಿಡ್ ಕಾಯೆಸ್ ಮಲ್ತಿತ್ತೆರ್.
ಈ ಅಂಶೊನು ತೂಯಿನ ನ್ಯಾಯಪೀಠ, ಭಾವನೆಲೆಗ್ ತೆಟ್ಟಾಪುಂಡು ಪನ್ದ್ ಈರ್ ಪನ್ತರ್, ಈರೆನ ಭಾವನೆ ಸಾಬೀತ್ ಮಲ್ಪೆರ ಬೊಕ್ಕ ಒರು ಕುಡ ಉಂತಾಯೆರ ಈರೆನ ಕಾಣಿಗೆಲಾ ಬೋಡತೆ? ಅಂಚಾದ್ 5 ಲಕ್ಷ ರೂ. ಡೆಪಾಸಿಟ್ ದೀಯೆರ ಆವಾ ಪನ್ದ್ ಅರ್ಜಿದಾರೆರೆ ಪರ ವಕೀಲೆರೆಡ ಕೇನ್ದ್ಂಡ್. ಉಂದೆಕ್ ಅರ್ಜಿದಾರೆರೆನ ಪರ ವಕೀಲೆರ್ ಒತ್ತೊಂಡೆರ್. ಆರೆನ ಪಾತೆರೊನು ದಾಕಲ್ತೊಂಡಿನ ನ್ಯಾಯಪೀಠ, ಈ ಪಾತೆರೊಗು ಅರ್ಜಿದಾರೆರ್ ತಕ್ಕ ನಡತೊನೊಡು. ರಡ್ಡ್ ವಾರೊಡು 5 ಲಕ್ಷ ರೂಪಾಯಿನ್ ಹೈಕೋರ್ಟ್ದ ರಿಜಿಸ್ಟ್ರಾರ್ಡ ಡೆಪಾಸಿಟ್ ದೀವೊಡು. ಅವು ಆಯಿಬೊಕ್ಕ ಅರ್ಜಿ ಪರಿಗಣನೆ ಆಪುಂಡು. ಆತೇ ಅತ್ತಂದೆ 5 ಲಕ್ಷ ರೂಪಾಯಿನ್ ಅರ್ಜಿದಾರೆರ್ ತನ್ನ ವೈಯುಕ್ತಿಕ ಖಾತೆರ್ದ್ ಡೆಪಾಸಿಟ್ ದೀವೊಡು ಪನ್ದ್ ನಿರ್ದೇಶನ ಕೊರ್ದು ವಿಚಾರಣೆನ್ ಸೆಪ್ಟೆಂಬರ್ 9 ಗ್ ದುಂಬು ಪಾಡ್ಂಡ್.