Last updated on August 13th, 2025 at 06:27 pm
ಪುತ್ತೂರು, ಆ. 13: ಶಾಲೆಲೆನ ಛದ್ಮವೇಷ ಪಂತೊಲೆಡ್ ಸಾಮಾನ್ಯವಾದ್ ಗಾಂಧೀಜಿ, ಝಾನ್ಸಿ ರಾಣಿ ಲಕ್ಷ್ಮೀಬಾಯಿ, ಪ್ರಾಣಿ ಲೆನ ಇಂಚಿನ ಏಸೊಲೆನೇ ಜೋಕುಲು ಪಾಡುವೆರ್. ಅಪ್ಪೆಅಮ್ಮಗ್ಲಾ ಉಂದೆಕ್ ತುತ್ತೈತದ ಅಟ್ಟನೆ ಮಲ್ಪೆರೆ ಆತ್ ಬಂಙ ಇಜ್ಜಿ. ಫ್ಯಾನ್ಸಿಡಾ, ಮೇಕಪ್ದಕ್ಲೆಡನಾ ಇಂಚಿನ ತುತ್ತೈತ, ಏಸೊಲು ಸುಲಭೊಡು ತಿಕ್ಕುವ. ಆಂಡ ಪುತ್ತೂರುದ ಸುಕೇಶ್ ಪನ್ಪಿನಾರ್ ತನ್ನ ಮಗಲೆಗ್ ತುಳುನಾಡ್ಡ್ ನಡತಿನ ತನ್ನಾಲ್ಮೆದ ಪೊರ್ಮ್ಬಾಟೊಡು ಮಾಮಲ್ಲ ತ್ಯಾಗ ಮಲ್ತ್ಂಡಲಾ ಇನಿಕಾನಗ ತುಳುವೆರೇ ಮದತಿನ ಉಬಾರ್ದ ಬೀರೆ ಮಂಜಬೈದ್ಯೆರೆನ ಬಗೆಟ್ ತೆರಿಪಾದ್, ಶಾಲೆದ ಪಂತೊಡು ಆರೆನನೇ ಏಸ ಪಾಡ್ಪಾದ್, ಶಾಲೆದ ಜೋಕುಲೆಗ್ಲಾ, ಮದೆ ಆತಿನ ಬೀರನ ಕತೆ ಪನ್ಪುನ ಪುನೆಪು ಬೈದೆರ್.
ಸುಕೇಶ್ ಮಾನಸಾ ದಂಪತಿಲೆನ ಮಗಲ್ ಆರುಹ್ಯ ಎಸ್ ಪುತ್ತೂರುದ ವಿವೇಕಾನಂದ ಸೆಂಟ್ರಲ್ ಸ್ಕೂಲ್ಡ್ ಎಲ್.ಕೆ.ಜಿ ಓದೊಂದುಲ್ಲೆರ್. ಶಾಲೆಡ್ ಛದ್ಮವೇಷದ ಒಟ್ಟುಗು ಮಂಜಬೈದ್ಯೆರೆನ ಬಗೆಟ್ ಎಲ್ಯ ಪಾತೆರೊಲಾ ಪನ್ತೆರ್.
ಈ ಪುನೆಪುದ ಪಿರವು ಇಪ್ಪುನ ಸುಕೇಶ್ ಪುತ್ತೂರು ಕುಡ್ಲದ ಒಂಜಿ ಸಾಫ್ಟ್ವೇರ್ ಕಂಪೆನಿಡ್ ಬೇಲೆ ಮಲ್ತೊಂದಿತ್ತ್ದ್, ಸಕ್ರಿಯೆರಾದ್ ತುಳುಪರ ಬೆನ್ನಿಲೆಗ್ ಕೈಗೋಡ್ಯಾವೊಂದು ಇಪ್ಪುವೆರ್. ಮಂಗಳೂರು ಜಿಲ್ಲೆ ತುಳುಪರ ಹೋರಾಟ ಸಮಿತಿದ ಸಂಚಾಲಕೆರಾದುಪ್ಪುನ ಸುಕೇಶ್, ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ದ ಪದುಕೆರ್ಲಾ ಆದುಲ್ಲೆರ್.
ಉಬಾರ್ ಮಂಜ ಬೈದ್ಯೆರ್ ಏರ್? ಆರೆನ ಕತೆ ದಾದ?ಭಾರತದ ಸುರುತ ಸ್ವಾತಂತ್ರ್ಯ ಸಂಗ್ರಾಮ 1857ಟ್ಟ್ ನಡತ್ಂಡಲಾ ಅವೆರ್ದ್ 20 ವರ್ಸ ದುಂಬೇ ಪಂಡ 1837 ಟ್ಟ್ ತುಳುನಾಡ್ಡ್ ತನ್ನಾಳ್ಮೆದ ಪೊರುಂಬಾಟ ನಡತ್ದಿತ್ತ್ಂಡ್. ಅವ್ವೇ ನಮಕ್ ಮಾತೆರೆಗ್ ತೆರಿದಿನ ಅಮರ ಸುಳ್ಯ ದಂಗೆ. ಈ ದಂಗೆಡ್ ಪೊರುಂಬಿನ ಕೆದಂಬಾಡಿ ರಾಮೇಗೌಡೆರ್, ಕಲ್ಯಾಣಪ್ಪನಂಚಿನ ಬೀರೆರೇನ ಪುದರ್ ನಮಕ್ ತೆರಿದ್ಂಡ್. ಅಂಚಿನನೇ ಒರಿ ಬೀರೆ ಉಬಾರ್ದ ಮಂಜ ಬೈದ್ಯೆರ್. ಇಂಗ್ಲೀಷ್ ಭಾಷೆ ತೆರಿದಿತ್ತಿನ ಮಂಜ ಬೈದ್ಯೆರ್ ಉಬಾರ್ಡ್ ಗುಮಾಸ್ತೆ ಆದ್ ಬೇಲೆ ಮಲ್ತೊಂದಿತ್ತೆರ್. ಕಲ್ಯಾಣಪ್ಪೆರ್ನ ದಂಡ್ ದಿಗ್ವಿಜಯ ಮಲ್ತೊಂದು ಬತ್ತಿನ ತೆರಿನೇ ತಾಲೂಕು ಆಫೀಸ್ಡ್ ಇತ್ತಿನಕಲೆನ್ ಕೈದ್ ಮಲ್ತ್ದ್, ಅಲ್ಪದ ಖಜಾನೆ ದರ್ತ್ದ್, ಐವ ಜನ ಜವನೆರ್ನ ಸೈನ್ಯೊನು ಪತೊಂದು ಮಂಜ ಬೈದ್ಯೆರ್ ಪುತ್ತೂರುಗು ಬತ್ತ್ ಕಲ್ಯಾಣಪ್ಪನ ಸೈನ್ಯೊಗು ಸೇರಿಯೆರ್. ಮಂಜ ಬೈದ್ಯೆರ್ನ ದೈರ್ಯ, ಜೀವದ ಕಟ್ಟ್, ನಾಯಕತ್ವ ಗುಣ ತೂಯಿನ ರಾಮಗೌಡೆರ್ ಬೈದ್ಯನ್ ದಂಡ್ದ ಉಪದಂಡನಾಯಕೆ ಆದ್ ಮಲ್ತೆರ್. ಕುದುರೆ ಏರೊಂದು ಮಂಜ ಬೈದ್ಯೆರ್, ರಾಮಗೌಡೆರ್, ಕಲ್ಯಾಣಪ್ಪೆರ್ ಕುಡ್ಲಗ್ ಬತ್ತ್ ಜಿಲ್ಲಾಧಿಕಾರಿನ ಕಛೇರಿನ್ ಆಕ್ರಮಣ ಮಲ್ತ್, ಅಲ್ಪ ಇತ್ತಿ ಬ್ರಿಟೀಷೆರೆ ಕೊಡಿ ದಕ್ಕ್ದ್ ತುಳುವೆರ್ನ ಕ್ರಾಂತಿದ ಕೊಡಿ ರಾಪಾದ್ 1837ನೇ ಇಸವಿ, ಎಪ್ರೀಲ್ 5ಕ್ಕ್ ತುಳುನಾಡ್ನ್ ಸ್ವತಂತ್ರ ಮಲ್ತೆರ್.
13 ದಿನ ತುಳುನಾಡ್ ಸ್ವತಂತ್ರವಾದಿತ್ತ್ಂಡ್. ಅವೆರ್ದ್ ಬೊಕ್ಕ ಬ್ರಿಟೀಷೆರೇ ಮಲ್ಲ ಸೈನ್ಯ ಕನತ್ ಮೊಕಲೆನ್ ಪೂರಾ ಪತ್ತಿಯೆರ್. ಮಂಜ ಬೈದ್ಯ ಸೇರ್ದ್ ಮಸ್ತ್ ಜನಕ್ ಗಲ್ಲ್ ಶಿಕ್ಷೆ ಆಂಡ್.
1837 ಮೇ 27ಕ್ಕ್ ಕುಡ್ಲಡ್ ಉಬಾರ ಮಂಜ ಬೈದ್ಯೆರೆನ್ ಬಹಿರಂಗೊಡು ಗಲ್ಲ್ ಗ್ ಪಾಡಿಯೆರ್. ಅರೆನ ಪುನ ಗಲ್ಲ್ ದ ಕಂಬೊಡೇ ಕುರಿದ್ ಬೂರುಲೆಕ್ಕ ಮಲ್ತೆರ್. ದೇಶೊಗಾದ್ ಪೊರ್ಂಬುದ್, ಮರಣದಂಡನೆ ಆದ್, ಬಿಕ್ಕುರುನಾಯ್ಗೆರೆಕಟ್ಟೆ (ಬಿಕರ್ನಕಟ್ಟೆ) ಡ್ ಗಿಡಿಪಕ್ಕಿಲು ತಜೆಪಡ್ ಪನ್ದ್ ಪುನಲಾ ದೆಪ್ಪೆರೆ ಬುಡಂದೆ ಬ್ರಿಟಿಷೆರ್ ಸೈತಿ ಪುನಟಲಾ ಚದಿ ಕಟ್ಟೊಡಾಂಡ ವಾ ಮಲ್ಲ ತಂಕೊದ ಬೀರೆ ಆದಿಪ್ಪೆರ್ ಮಂಜ ಬೈದ್ಯೆರ್.