Last updated on August 8th, 2025 at 11:16 am
ಒಡಿಪು, ಆ. 08: ಒವ್ವೇ ಒಂಜಿ ಬ್ಯುಸಿನೆಸ್ ಆವಡ್, ವೈವಾಟ್ ಆವಡ್, ಅಂಗಡಿ ಆವಡ್ ಅಕ್ಲೆಗ್ ಅಕ್ಲೆನ ಬ್ರಾಂಡ್ ವ್ಯಾಲ್ಯೂ ಬಾರೀ ಮುಖ್ಯ. ತನ್ನ ಬ್ಯುಸಿನೆಸ್ದ ಪುದರ್, ಲೋಗೋ, ಅವೆನ್ ತೂಪಾವುನ ರೀತಿ ಮಾತಲಾ ಒಂಜಿ ಬ್ರಾಂಡ್ದ ವ್ಯಾಲ್ಯೂ ಎಚ್ಚಲಾ ಮಲ್ಪುಂಡು, ತತ್ತ್ಂಡ ಕಮ್ಮಿಲಾ ಮಲ್ಪುಂಡು. ಈ ಎಚ್ಚಿಕಮ್ಮಿ ಅಕ್ಲೆನ ಲಾಭನಷ್ಟೊಗುಲಾ ನೆವನ ಆಪುಂಡು. ಅಂಚಾದ್ ಒವ್ವೇ ಒಂಜಿ ಅಂಗಡಿ, ಬ್ಯುಸಿನೆಸ್ದಕುಲು ತನ್ಕುಲೆ ಪುದರ್ ಪಲವೆಲೆನ್ ಡಿಸೈನ್ ಮಲ್ಪುನಗ ತನ್ಕುಲೆ ಗ್ರಾಹಕೆರ್, ತನ್ಕುಲೆ ಬ್ರಾಂಡ್ನ್ ಗೇನೊಡು ದೀವೊಂದು ಡಿಸೈನ್ ಮಲ್ತುಪ್ಪುವೆರ್. ಐಕ್ ಒಂಬುನ ಲಿಪಿ, ಫಾಂಟ್, ಕಲರ್, ಸೈಜ್ ಮಾತೆನ್ಲಾ ಬಾರೀ ಜಾಗ್ರ್ತೆಗ್ ಮಲ್ತುಪ್ಪುವೆರ್. ಈ ಸೂಕ್ಷ್ಮೊನು ಅರ್ಥ ಮಲ್ತೊಂದಿನ ಮಾನ್ಯ ಹೈಕೋರ್ಟ್, 2024ನೇ ಮಾರ್ಚ್ಡ್ ಜಸ್ಟಿಸ್ ಎಮ್ ನಾಗಪ್ರಸನ್ನೆರ್ ಇತ್ತಿನ ಪೀಠ 60% ಕನ್ನಡ ಇಜ್ಜಿ ಪನ್ಪಿನ ಕಾಲಿ ಒಂಜಿ ವಿಷಯ ಪತೊಂದು ಒವ್ವೇ ಅಂಗಡಿ, ವೈವಾಟ್, ಬ್ಯೂಸಿನೆಸ್ದ ಲೈಸೆನ್ಸ್ ಕ್ಯಾನ್ಸಲ್ ಮಲ್ಪೆರ ಆಪುಜಿ, ಕ್ಯಾನ್ಸಲ್ ಮಲ್ಪೆರ ಬಲ್ಲಿ ಪನ್ದ್ ಆದೇಶ ಕೊರ್ದಿತ್ತ್ಂಡ್.
ಕೆಲ ದಿನೊರ್ದಿಂಚಿ ಒಡಿಪುಡು ಕನ್ನಡ ಕಡ್ಡಾಯದ ಬುಲಿಪು ಕೇನ್ದ್ ಬರೊಂದುಂಡು. ಐತನೇ ದುಂಬರಿನ ಭಾಗೊ ಆದ್ ಅಂಗಡಿ, ಕಛೇರಿ, ಹೋಟೆಲ್, ಬ್ಯಾಂಕ್, ಕಂಪೆನಿಲೆನ ಬೋರ್ಡ್ಡ್ 60% ಕನ್ನಡ ಇಜ್ಜಿಂಡ ಅಕ್ಲೆನ ಲೈಸೆನ್ಸ್ ಕ್ಯಾನ್ಸಲ್ ಮಲ್ಪುವ ಪನ್ದ್ ಒಡಿಪು ನಗರಸಭೆ ಸುತ್ತೋಲೆ ಪಿದಡ್ಪಾದ್ಂಡ್. ಕೆಲ ಅಂಗಡಿಲೆಗ್ ನಿಕ್ಲೆನ ಅಂಗಡಿದ ಬೋರ್ಡ್ಡ್ ನನಲಾ ಕನ್ನಡ ಪಾಡ್ದಿಜರ್. ನನ 15 ದಿನೊತುಲಯಿ 60% ಕನ್ನಡ ಇಪ್ಪುನ ಬೋರ್ಡ್ ಪಾಡಿಜರ್ನ್ಡ ಅಂಗಡಿದ ಲೈಸೆನ್ಸ್ ಕ್ಯಾನ್ಸಲ್ ಮಲ್ಪುವ ಪನ್ದ್ ಓಲೆ ಬೈದ್ಂಡ್.
ಕರಿನ ವರ್ಸ ಮೇ ತಿಂಗೊಲುಡು ರಾಯಪ್ಫೆ ಪನ್ಪಿನಾರ್ ಪೌರಾಯುಕ್ತೆ ಆದುಪ್ಪುನಗಲಾ ಇಂಚೆನೇ ಸುತ್ತೋಲೆ ಪಿದಡ್ಪಾದಿತ್ತೆರ್. ಇತ್ತೆ ಒಡಿಪುಡು 60ದ ಬೋರ್ಡ್ ಸುದ್ದಿ ಆವೊಂದುಂಡು. ಒಡಿಪು ನಗರಸಭೆ ಕನ್ನಡ 60% ಇಪ್ಪೊಡು, ಮಲ್ಲೆಟ್ ಇಪ್ಪೊಡು, ಇಜಿಂಡ ನಿಕ್ಲೆನ ಅಂಗಡಿದ ಲೈಸೆನ್ಸ್ ಕ್ಯಾನ್ಸಲ್ ಮಲ್ಪುನ ಪನ್ದ್ ಅಸಂವಿಧಾನಿಕ ಸಾದಿ ಪತ್ತ್ದ್ಂಡ್. ಮಾನ್ಯ ಹೈಕೋರ್ಟ್ದ ಆದೇಶೊದ ವಿರುದ್ಧ ಇಪ್ಪುನ ಈ ಕ್ರಮೊತ ಬಗೆಟ್ ಅಂಗಡಿ, ಕಛೇರಿ, ಹೋಟೆಲ್ ವೈವಾಟ್ದಕುಲು ಪಿಸಿರಾತೆರ್.
ಕೆಲ ಕಡೆಟ್ ಇತ್ತೆ ಇಪ್ಪುನ ತುಳುಲಿಪಿತ ಪುದರ್ಪಲವೆಲೆನ್ಲಾ ದೆಪ್ಪೆರೆ ಪನ್ತೆರ್ ಪನ್ದ್ ತೆರಿದ್ ಬೈದ್ಂಡ್.
ಹೈಕೋರ್ಟ್ ಒವ್ವೇ ಒಂಜಿ ಬ್ಯುಸಿನೆಸ್ ಅತ್ತ್ಂಡ ವೈವಾಟ್ದಕ್ಲೆನ ಲೈಸೆನ್ಸ್ ಕ್ಯಾನ್ಸಲ್ ಮನ್ಪೆರಗ್ ಕಾಲಿ ಒಂಜಿ ಬೋರ್ಡ್ ನೆವನ ಆವೆರೆ ಬಲ್ಲಿ ಪಂದ್ ಪಂದಿತ್ತ್ಂಡಲಾ, ಒಡಿಪು ನಗರಸಭೆ ಈ ಇಸಯೊಡು ತನ್ಕುಲೆನನೇ ಕಾನೂನು ಕನವೊಂದುಪ್ಪುನವು ತುಳುವೆರೆಗ್ ಬೆಸರ್ ಕನದ್ಂಡ್. ತುಳು ಲಿಪಿತ ಗಲಕೆ ಎಚ್ಚ ಆವೊಂದುಪ್ಪುನ ಈ ಪೊರ್ತುಡು ಇಂಚಿನ ಕಾನೂನುಲು ಲಿಪಿ ಗಲಸುನ ಅಲೆಚನೆಡ್ ಇಪ್ಪುನಕಲೆಗ್ ಒಂಜಿ ತಲೆಪು ಆಪುಂಡು. ಆತ್ ಮಲ್ಲೆಟ್ ದಾಯೆ ಬೋಡು, ಓದುನಾತ್ ಮಲ್ಲೆ ಇತ್ತ್ದ್, ನಮಕ್ ಬೋಡಾಯಿನ ಲಿಪಿನ್ ಮಲ್ಲೆಟ್ ಪಾಡುನ ಅವಕಾಶ ಇಪ್ಪೊಡು ಪಂದ್ ತುಳುವೆರೆನ ವಾದ.
ಈ ವಿಷಯೊಡು ಮುಲ್ಪದಕುಲೇ ಆಯಿನ ಒಡಿಪು ಜಿಲ್ಲೆಡ್ ಅಜತ್ ಬೈದಿನ ಶಾಸಕೆರ್, ನಗರಸಭೆಕ್ ಅಜತ್ ಬೈದಿನಕುಲು ದಾದ ಪನ್ಪೆರ್ ಪನ್ಡ್ದ್ ಕಾತ್ದ್ ತೂವೊಡಾತೆ.