Last updated on August 14th, 2025 at 09:05 am
ಬೆಂಗಳೂರು, ಆ. 14: ಕೋಡೆ ಮರ್ಯಾಲದ ಅಧಿವೇಶನೊದ ರಡ್ಡನೇ ದಿನ ಸದನೊಡು ದಕ್ಷಿಣ ಕನ್ನಡ ಜಿಲ್ಲೆದ ಪುದರ್ ಪಗತ್ದ್ ಮಂಗಳೂರು ಪನ್ದ್ ದೀವೊಡು ಪನ್ಪಿನ ವಿಷಯೊನು ಬೊಲ್ತೇರ್ ಶಾಸಕೆ ಹರೀಶ್ ಪೂಂಜೆರ್ ಸರ್ಕಾರೊದ ಎದುರು ಕನತೆರ್.
ಮಂಗಳೂರು ಪನ್ಪಿನವು ಲೋಕೊಡೇ ಒಂಜಿ ಬ್ರಾಂಡ್ ಆತಿನ ಪುದರ್. ದಕ್ಷಿಣ ಕನ್ನಡ ಜಿಲ್ಲೆದಕುಲಾಂಡಲಾ ಎಂಕ್ಲ ಒಲ್ಪ ವೈವಾಟ್ ಮಲ್ಪುವ, ಒಲ್ಪ ಬೇಲೆ ಮಲ್ಪುವ ಅಲ್ಪ ಮಾತಾ ಮಂಗಳೂರುದಕುಲು ಪನ್ದೇ ಎಂಕ್ಲೆನ್ ಪನ್ಡೊನುವ. ದುಂಬು ಉಂದೆನ್ ಸೌತ್ ಕೆನರಾ ಪನ್ಪಿನ ಪುದರ್ಡ್ ಲೆತ್ತೊಂದಿತ್ತೆರ್. ಅವೆನ್ ವಾ ವ್ಯಾಕರಣ ಗಲಸ್ದ್ ದಕ್ಷಿಣ ಕನ್ನಡ ಮಲ್ತೆರ್ ಪನ್ದ್ ತೆರಿಯಂದ್. 1931ರ್ದ್ ಎಸ್. ಯು. ಪಣಿಯಾಡಿಯೆರೆನ ಕಾಲೊರ್ದೇ ದಕ್ಷಿಣ ಕನ್ನಡ ಜಿಲ್ಲೆದ ಪುದರ್ ಪಗಪುನ ಪೊರ್ಮ್ಬಾಟ ನಡತೊಂದು ಉಂಡು. ಈ ಜಿಲ್ಲೆದ ವಿಮಾನ ಉಂತಡೆ, ಬಂದರ್, ಯೂನಿವರ್ಸಿಟಿ, ಕೆಮಿಕಲ್ ಇಂಡಸ್ಟ್ರಿ, ರೈಲ್ವೇ ಉಂತಡೆಲಾ ಮಂಗಳೂರು ಪನ್ಪಿನ ಪುದರ್ಡೇ ಉಂಡು. ಓಡೆ ಪೋಂಡಲಾ ಎಂಕ್ಲ ಮಂಗಳೂರುದಕ್ಲು ಪನ್ದ್ ಪೆರ್ಮೆಡ್ ಪನ್ಡೊನುವ. ಮಂಗಳೂರು ಪನ್ಪಿನ ಪುದರ್ ಲೋಕೊಗೇ ತೆರಿದುಂಡು. ಅಂಚಾದ್ ಈ ಜಿಲ್ಲೆಗ್ ಮಂಗಳೂರು ಜಿಲ್ಲೆ ಪನ್ಪಿ ಪುದರ್ ದೀಡ್ಂಡ ಈ ಜಿಲ್ಲೆದ ಬ್ರಾಂಡಿಂಗ್, ಬುಲೆಚ್ಚಿಲ್ಗ್ ಶಕ್ತಿ ಕೊರ್ಲೆಕ ಆಪುಂಡು ಪನ್ಪಿನ ಮುಲ್ಪದ ಜನೊಕ್ಲೆನ ಅಭಿಪ್ರಾಯ ಪನ್ದ್ ಪನ್ಡೆರ್. ಉಂದೆಕ್ ಸರಕಾರೊರ್ದು ಬೈದಿನ ಉತ್ತರೊಡು ಜಿಲ್ಲಾಧಿಕಾರಿಲೆನ ವರದಿ ಬಾಕಿ ಉಂಡು ಪನ್ದ್ ಪನ್ತಿನೆನ್ಲಾ ತೆರಿಪಾಯೆರ್.
ರಾಮನಗರೊನು ಬೆಂಗಳೂರು ದಕ್ಷಿಣ ಮಲ್ಪುನಗ ಒಂಜಿ ಇಡೀಯ ಪಾರ್ಟಿ, ಅಲ್ಪದ ಜನೊಕುಲು ಪ್ರಬಲವಾದ್ ವಿರೋಧ ಮಲ್ತ್ಂಡಲಾ ಅವೆನ್ ಒಂಚೂರುಲಾ ಗೆನ್ಪಂದೆ ಪಗತ್ದರ್. ದಕ್ಷಿಣ ಕನ್ನಡ ಜಿಲ್ಲೆದ ಮಾತಾ ಪ್ರತಿನಿಧಿಕುಲು, ಮಾತಾ ಪಾರ್ಟಿದಕುಲು ಜಿಲ್ಲೆದ ಪುದರ್ ನಪಗಪೆರ ಒತ್ತಾಯ ಮಲ್ತೊಂದುಲ್ಲ ಪನ್ದ್ ಪನ್ಡೆರ್.
ಅವೆರ್ದ್ ಬೊಕ್ಕ ಪಾತೆರ್ನ ಶಾಸಕೆ ವೇದವ್ಯಾಸ ಕಾಮತೆರ್ ಬ್ರಿಟಿಷೆರ್ ದೀತಿನ ಪುದರ್ ಇತ್ತೆ ದಕ್ಷಿಣ ಕನ್ನಡ ಪನ್ದ್ ಆತ್ಂಡ್. ಮಂಗಳೂರು ಪನ್ಡ ಅಪ್ಪೆ ಮಂಗಳಾಂಬಿಕೆನ ನಗರ. ತುಳುನಾಡ ಈ ಜಿಲ್ಲೆಗ್ ಮಂಗಳೂರು ಪನ್ದ್ ಪುದರ್ ದೀನ್ಡ ಬ್ರಾಂಡ್ ಮಂಗಳೂರು ಗು ಸಕಾಯ ಆಪುಂಡು. ರಾಜ್ಯೊದ ಎಚ್ಚಿನ ಜಿಲ್ಲೆಲೆನ ಪುದರ್ ಜಿಲ್ಲಾಕೇಂದ್ರೊಲೆನ ಪುದರೇ ಆದುಂಡು. ಬ್ರಿಟಿಷೆರ್, ಪೋರ್ಚುಗೀಸೆರ್ ನಮನ್ ಬುಡ್ದ್ ಪೋತೆರ್. ಅಕುಲು ದೀತಿನ ಪುದರ್ನ್ ಒರಿತೊನುನ ದಾಸ್ಯದ ಮನಸ್ಥಿತಿ ನಮಕ್ ಬರ್ಯೆರ ಬಲ್ಲಿ ಪನ್ದ್ ಪನ್ಡೆರ್.
ರಾಮನಗರ ಜಿಲ್ಲೆದ ಪುದರ್ ವಿರೋಧ ಇತ್ತಂಡಲಾ ರಡ್ಡ್ ತಿಂಗೊಲುದುಲಯಿ ಮಲ್ತ್ ಬುಡ್ಯರ್, ಅಂಚೆನೇ ದಕ್ಷಿಣ ಕನ್ನಡ ಜಿಲ್ಲೆದ ಪುದರ್ನ್ಲಾ ಮಂಗಳೂರು ಪನ್ದ್ ಬೇಗ ಮನ್ಪುಲೆ ಪನ್ದ್ ಕಾಮತೆರ್ ಪನ್ಡೆರ್.
ಉಂದೆಕ್ ಸೊರ ಗೋಡ್ಯಾಯಿನ ಶಾಸಕೆ ಭರತ್ ಶೆಟ್ರ್, ವಿಜಯನಗರ ಸಾಮ್ರಾಜ್ಯೊದ ಪೊರ್ತುಡು ತುಳುನಾಡ್ನ್ ಮಂಗಳೂರು ಬೊಕ್ಕ ಬಾರ್ಕೂರು ಪನ್ಪಿನ ರಡ್ಡ್ ರಾಜ್ಯ ಆದ್ ಮಲ್ತಿತ್ತೆರ್. ಮಂಗಳೂರು ಪನ್ಪಿ ಪುದರ್ಗ್ ಇತಿಹಾಸ ಉಂಡು ಪನ್ದ್ ಪನ್ಡೆರ್.
ಈ ಪೊರ್ತುಡು ಪಾತೆರ್ನ ಸ್ಪೀಕರ್ ಖಾದರ್, ಒಂಜಿ ಪುದರ್ ಅಲ್ಪದ ಆಚಾರ-ವಿಚಾರ, ಸಂಸ್ಕೃತಿ ತೂದು ದೀವೊಡಾಪುಂಡು. ಪುದರ್ಡ್ ದಾಲ ಇಜ್ಜಿ, ವಾ ಪುದರ್ ದೀನ್ಡಲಾ ಮುಖ್ಯವಾದ್ ಸೌಹಾರ್ದತೆ ಬೋಡು. ಮೀಟಿಂಗ್ ಲೆತ್ತ್ದ್ ಈ ಬಗೆಟ್ ಪಾತೆರ್ದ್ ಜಿಲ್ಲಾಧಿಕಾರಿನ ಮುಕೇನ ಈ ಬೇಲೆ ಮಲ್ಪಾಗ ಪನ್ದ್ ಪನ್ಡ್ದ್ ಅಡ್ಡ ಗೋಡೆಡ್ ತುಡರ್ ದೀಲೆಕ ಪಾತೆರ್ಯೆರ್. ಆತನಗ ಶಾಸಕೆ ಕಾಮತೆರ್ ಲಕ್ಕ್ದ್ ಉಂತುದು ರಾಮನಗರೊದ ವಿಷಯೊಡು ಡಿಸಿಎಂ ಶಿವಕುಮಾರ್ ತೋಜಾಯಿನ ಇಚ್ಛಾಶಕ್ತಿದ ಲೆಕ ಈರ್ (ಖಾದರ್) ಇಚ್ಛಾಶಕ್ತಿ ತೋಜಾದ್ ಮಲ್ಪೊಡು ಪನ್ದ್ ತುಳುಟೇ ಪನ್ಡೆರ್.
ಅಕೇರಿಡ್ ಉಂದೆಕ್ ಸದು ಕೊರ್ನ ಕಂದಾಯ ಸಚಿವೆ ಕೃಷ್ಣಭೈರೇಗೌಡೆರ್ ಮಾತೆರ್ನ ಅಭಿಪ್ರಾಯ ಗೆತೊಂದು ನನದ ಪಜ್ಜೆ ದೀಕ ಪನ್ದ್ ಪನ್ಡೆರ್. ಕನ್ನಡ ಭಾಷೆ ಪುಟ್ಟುದಿನೇ ಕರಾವಳಿಡ್, ಅವೆನೇ ಕ್ಯಾನರೀಸ್ ಪನ್ದ್ ಲೆತ್ತೆರ್, ಅವೆರ್ದ್ ಉತ್ತರ ಕನ್ನಡ, ದಕ್ಷಿಣ ಕನ್ನಡ ಆಂಡ್, ದಕ್ಷಿಣ ಕನ್ನಡರ್ದ್ ಮಂಗಳೂರು ಉಡುಪಿ ಆಂಡ್ ಪನ್ದ್ ಬಾಲಿಷ ಸದು ಕೊರ್ಯೆರ್. ಕನ್ನಡದ ಮೂಲೊಗು ಸಂಬಂಧ ಇಪ್ಪುನೆರ್ದಾವರ ಕನ್ನಡೊದ ಭಾವನೆಗ್ ದಾಲ ಆವಂದಿಲೆಕ, ಅಲ್ಪದ ಜನೊಕ್ಲೆನ ಅಭಿಪ್ರಾಯ ಕೇನ್ದ್ ನನದ ಪಜ್ಜೆ ದೀಪ ಪನ್ದ್ ಪನ್ಡೆರ್.