Last updated on September 16th, 2025 at 03:51 pm
ಶಬರಿಮಲೆ, ಸೆ. 16: ಶಬರಿಮಲೆ ಅಯ್ಯಪ್ಪ ಸ್ವಾಮಿ ದೇಲಂತಡೆದ ಪಂಪಾ ಸುದೆಬರಿಟ್ ಉಂದೇ ಕಡೀರ ಸರ್ತಿ ಜಾಗತಿಕ ಅಯ್ಯಪ್ಪ ಸಂಗಮ ಲೇಸ್ ನಡಪರೆಗುಂಡು. ಈ ಲೇಸ್ದ ಅಟ್ಟನೆ ಜೋರುಡು ನಡತೊಂದುಂಡು. ಕೇರಳ ಸರಕಾರೊದ ಮುಜರಾಯಿ ಇಲಾಖೆ (ತಿರುವಾಂಕೂರು ದೇವಸ್ವಂ ಮಂಡಳಿ) ಈ ಲೇಸ್ದ ಅಟ್ಟನೆ ಮಲ್ದ್ಂಡ್.
ತಿರುವಾಂಕೂರು ದೇವಸ್ವಂ ಮಂಡಳಿಯದ ಶಬರಿಮಲೆ ಅಯ್ಯಪ್ಪಸ್ವಾಮಿ ದೇಲಂತಡೆದ ಪಂಪಾ ಸುದೆಬರಿಟ್ ಸೆಪ್ಟೆಂಬರ್ 20ದಾನಿ ‘ಜಾಗತಿಕ ಅಯ್ಯಪ್ಪ ಸಂಗಮ’ ಲೇಸ್ ನಡತೊಂದುಂಡು. ಶಬರಿಮಲೆ ಕ್ಷೇತ್ರೊದ ಪುಗರ್ತೆ ಲೋಕೊರ್ಮೆ ನನಲಾತ್ ಪಸೆರೊಡು, ದೇಲಕತಡೆಡ್ ನನಲಾತ್ ಬುಲೆಚ್ಚಿಲ್ ಆವೊಡು ಪನ್ಪಿ ದಿಟ್ಟಿಡ್ ಮಲ್ತೊಂದುಪ್ಪುನ ಗಣ್ಯೆರೆ ಸಮಾವೇಶ, ಸಂವಾದ ಕಾರ್ಯಕ್ರಮ ಉಂದಾದುಂಡು ಪನ್ದ್ ಕೇರಳ ಸರಕಾರ ಪನ್ಡೊನ್ದುಂಡು. ಉಂದು ಸರಕಾರೊದ ಕಾರ್ಯಕ್ರಮ ಅತ್ತ್, ರಾಜ್ಯೊದ ಮುಜರಾಯಿ ಇಲಾಖೆಗ್ (ತಿರುವಾಂಕೂರು ದೇವಸ್ವಂ ಮಂಡಳಿ) 75 ವರ್ಸ ಆಯಿನ ನೆಮ್ಪುಗು ಉಂದೆನ್ ಮಲ್ತೊಂದುಪ್ಪುನು, ಸರಕಾರ ಅನುದಾನ ಮಾತ್ರ ಕೊರೊಂದುಂಡು ಪನ್ದ್ ಕೇರಳ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಪನ್ತೆರ್.
ಜಾಗತಿಕ ಅಯ್ಯಪ್ಪ ಸಂಗಮೊದ ಅಟ್ಟನೆ ಮುಗಿಯೊಂದು ಬತ್ತಿತ್ತ್ದ್, 3,000 ಜನ ಕುಲ್ಲೆರಾಪುನ ಜರ್ಮನ್ ಟೆಂಟ್ ನಿರ್ಮಾಣೊದ ಬೇಲೆ ಅಕೇರಿದ ನಿಲವುಡು ಉಂಡು ಪನ್ದ್ ಅಧಿಕಾರಿಲು ತೆರಿಪಾದೆರ್. 38,500 ಸ್ಕ್ವೇರ್ ಫೀಟ್ ವಿಸ್ತೀರ್ಣೊದ ಈ ಟೆಂಟ್ ಹವಾನಿಯಂತ್ರಿತ ಆದಿತ್ತ್ದ್, ಗ್ರೀನ್ ರೂಮ್ , ಮೀಡಿಯಾ ರೂಮ್ ಬೊಕ್ಕ ವಿಐಪಿ ಲಾಂಜ್ ಲಾ ಉಂದೆಟ್ ಉಂಡು. 500 ಜನೊತ ಸಾಮರ್ಥ್ಯೊದ ಬೇತೆನೇ ಸೆಮಿನಾರ್ ಹಾಲ್ನ್ಲಾ ಕಟ್ಟ್ದೆರ್. ಮಲೆತ ಕೊಡಿಟ್ ಪ್ರತಿನಿಧಿಲೆಗ್ ಅಸರ್ತಮ್ಮನೊದ ವ್ಯವಸ್ಥೆ ಮಲ್ದೆರ್. ಕೇರಳ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಈ ಕಾರ್ಯಕ್ರಮೊತ ಉದಿಪನ ಮಲ್ಪುವೆರ್.