Last updated on September 17th, 2025 at 08:27 am
ಕಾರ್ಲ: ಮೆಡಿಕಲ್ ಓದುನ ಅಂಗಲ್ಪುಡು ಬಡಪತ್ತ್ದ ನಡುಟು ಎಡ್ಡೇನ ಶಿಕ್ಷಣೊದ ಕನ ಕಟೊಂದಿತ್ತಿನ ಕಾರ್ಲ ತಾಲೂಕ್ದ ರೆಂಜಾಳದ ವಿನುತಾ ಸರಕಾರಿ ಹಾಸ್ಟೆಲ್ಡ್ ಓದ್ದ್ ಪಿಯುಸಿಡ್ ಮಾತೆರೆರ್ದ್ ಎಚ್ಚ ಮಾರ್ಕ್ ಗೆತೊಂದು ಮುಖ್ಯಮಂತಿರ್ಲೆನ ಸ್ಕಾಲರ್ಶಿಪ್ಗ್ ಅಜತ್ ಬೈದೆರ್.
ಪ್ರಜಾಪ್ರಭುತ್ವ ದಿನಾಚರಣೆದ ಲೆಕ್ಕೊಡು ವಿಧಾನಸೌಧ ಬ್ಯಾಂಕ್ವೆಟ್ ಸಭಾಂಗಣೊಡು ನಡತಿನ ಕಾರ್ಯಕ್ರಮೊಡು ಕರ್ನಾಟಕ ವಸತಿ ಶಿಕ್ಷಣ ಸಂಸ್ಥೆಲೆಡ್ ಕಲ್ತಿನ ರಾಜ್ಯೊದ ಟಾಪ್ 15 ವಿದ್ಯಾರ್ಥಿಲೆಗ್ ಮುಖ್ಯಮಂತಿರ್ಲೆನ ಸಿಎಂ ಅವಾರ್ಡ್, 1 ಲಕ್ಷ ರೂ. ಸ್ಕಾಲರ್ಶಿಪ್ ಕೊರ್ಯೆರ್.
ಕಾರ್ಕಳದ ರೆಂಜಾಳ ಮೂಲೊದ ಲೀಲಾ ಬೊಕ್ಕ ಚಿಂಗ ದಂಪತಿಲೆನ ಮಗಲ್ ವಿನುತಾ ಒಂಜಿ ಲಕ್ಷ ರೂಪಾಯಿ ಸ್ಕಾಲರ್ಶಿಪ್ ಸಿ.ಎಂ ಸಿದ್ದರಾಮಯ್ಯೆರೆ ಕೈರ್ದ್ ಗೆತೊಂಡೆರ್.
ಮಿಯಾರ್ ಮೋರಾರ್ಜಿ ದೇಸಾಯಿ ವಸತಿ ಶಾಲೆಡ್ ಕಲ್ತ್ದ್ ಶೇ.96 ಮಾರ್ಕ್ ಗೆತೊಂದು ಪಿಯುಸಿ ಪಾಸ್ ಮಲ್ತಿನ ವಿನುತಾ ಕಡೀರ ತಾನೊ ಗೆಂದ್ದೆರ್. ಇತ್ತೆ ಕುಡ್ಲದ ಶಾರದಾ ಯೋಗ ಆ್ಯಂಡ್ ನ್ಯಾಚುರೋಪತಿ ಮೆಡಿಕಲ್ ಕಾಲೇಜ್ಡ್ ದುಂಬದ ಶಿಕ್ಷಣೊಗು ದಾಕಲಾತೆರ್.