ಪ್ರೈವೇಟ್ ಜಾಗೆಗ್ ಪರಿಹಾರ ಕೊರಂದೆ ರೋಡ್ ಮಲ್ತಿನ ಅಧಿಕಾರಿಲು: ಕೋರ್ಟ್ ಆದೇಶದ ಪ್ರಕಾರ ಗಂಜಿಮಠ – ನಿಡ್ಡೋಡಿ ಸಾದಿಗ್ ಬೇಲಿ ಪಾಡೆರೆ ಪಿದಡಿನ ಜಾಗೆದ ದನಿ

Last updated on September 25th, 2025 at 09:17 am

ಕುಡ್ಲ, ಸೆ. 24: ಪ್ರೈವೇಟ್ ಜಾಗೆಡ್ ಸಾದಿ ಮಲ್ತ್‌ದ್, ಜಾಗೆದಕ್ಲೆಗ್ ಪಿರಿಕಟ್ಟ್ ಕೊರಂದೆ ತಿರ್ಗಾಯಿನ ಅಧಿಕಾರಿಲೆಗ್ ಜಾಗೆದ ದನಿ ಸಮ ಬುದ್ದಿ ಕಲ್ಪಾದೆರ್. ಕೋರ್ಟ್ ಆದೇಶೊನು ಪತೊಂದು ಬತ್ತಿನ ಜಾಗೆದ ದನಿ ಪ್ರಮುಖ ರೋಡ್‌ಗೇ ಬಲಿ ಪಾಡೆರೆ ಪೋತಿನ ನಡಕೆ ಕೋಡೆ, ಬುದಾರ ಬಜ್ಪೆದ ಮಂಜನಕಟ್ಟೆಡ್ ನಡತ್‌ದ್ಂಡ್.

ಪರದೇಸೊಡು ಇಪ್ಪುನ ಮಂಜನಕಟ್ಟೆದ ನಿವಾಸಿ ಸಿಸಿಲಿಯಾ ಮೆರೆಗ್ ಸೇರ್ದಿನ ಜಾಗೆಡ್ 2008 ಡ್ ಲೋಕೋಪಯೋಗಿ ಇಲಾಖೆದ ಅನುದಾಂತೆ ಜಾಗೆನ್ ಸ್ವಾಧೀನ ಮಲ್ತೊಂದು ಕಿನ್ನಿಗೋಳಿ- ನಿಡ್ಡೋಡಿ- ಗಂಜಿಮಠ – ಕುಡ್ಲ‌ನ್ ಕನೆಕ್ಟ್ ಮಲ್ಪುನ ರಾಜ್ಯ ಪೆರ್ಸಾದಿನ್ ಮಲ್ತಿತ್ತೆರ್. ಸಿಸಿಲಿಯಾ ಮೇರ್ 2014ಟ್ ತಹಶೀಲ್ದಾರ್ ಬೊಕ್ಕ ಪಿಡ್ಲ್ಯೂಡಿ ಇಲಾಖೆದ ವಿರುದ್ಧ ನ್ಯಾಯಂತಡೆಗ್ ಪೋದಿತ್ತೆರ್. ವಾದ ಕೇನ್ಡಿನ ನ್ಯಾಯಂತಡೆ ಸಿಸಿಲಿಯಾ ರೆನ ಪತ್ತ್ ಸೆಂಟ್ಸ್ ಜಾಗೆಗ್ ಸಮ ಆಪಿನ ಬೇತೆ ಜಾಗೆ ಕೊರೊಡು ಅತ್ತ್ಂಡ ರೋಡ್ ದೆತ್ತ್‌ದ್ ಆರೆನ ಸ್ವಂತ ಜಾಗೆನ್ ಬುಡ್ದು ಕೊರೊಡು ಪನ್ದ್ 2017ಟ್ ತೀರ್ಪು ಕೊರ್ದಿತ್ತ್ಂಡ್.

ಆಂಡ ಅಧಿಕಾರಿಲು ಮಾತ್ರ ಒವ್ವೇ ಪಿರಿಕಟ್ಟ್ ಕೊರಂದೇ ಆರೆನ್ ಅಂಚಿಂಚಿ ಪೊಕ್ಕಡೆ ತಿರ್ಗಾದೆರ್. ಇತ್ತೆ ನ್ಯಾಯಂತಡೆದ ಆದೇಶ ಗೆತೊಂದು ಬತ್ತಿನ ಸಿಸಿಲಿಯಾರೆನ ಮರ್ಮಯೆ ಆಂಡ್ರಿ ಡಿ ಅಲ್ಮೇಡಾ ತನ್ನ ಜಾಗೆನ್ ಗುರ್ತ ಮಲ್ತ್‌ದ್ ಬೇಲಿ ಪಾಡೆರ ಪಿದಡ್ದಿತ್ತೆರ್. ನ್ಯಾಯಂತಡೆದ ಅಧಿಕಾರಿಲಾಯಿನ ಶಿವರಾಮ ರೈ ಬೊಕ್ಕ ದೀಪಕ್ ಮೊಕ್ಲೆನ ಸಮ್ಮುಖೊಡು ತನ್ನ ಜಾಗೆದ ಗಡಿ ಗುರ್ತ ಮಲ್ತ್‌ದ್ ಸಾದಿ ಒಕ್ಕುನ ಬೇಲೆಗ್ ಜತ್ತಿತ್ತೆರ್. ಬೇಲೆ ಸುರು ಆವೊಂದಿತ್ತಿಲೆಕನೆ, ಜನದಿಂಜಿದುಪ್ಪುನ ಕಿನ್ನಿಗೋಳಿ-ನಿಡ್ಡೋಡಿ-ಗಂಜಿಮಠ-ಕುಡ್ಲ ರಾಜ್ಯ ಪೆರ್ಸಾದಿಡ್ ಪಾಕ ಗಾಡಿಲು ತಿಕ್ಕ್‌ದ್ ಬೂರೊಂದ. ಈ ಪೊರ್ತುಡು ಅಧಿಕಾರಿಲೆನ ವಿರುದ್ದ ಸಾರ್ವಜನಿಕೆರ್ ಆಕ್ರೋಶ ತೂಪಾಯೆರ್.

ಕಂದಾಯ ನಿರೀಕ್ಷಕೆ ಪೂರ್ಣಚಂದ್ರೆ ಬೊಕ್ಕ ಉಪ ತಹಶೀಲ್ದಾರ್ ಸ್ಟೀಫನ್ ಜಾಗೆಗ್ ಬತ್ತ್‌ದ್ ಜಾಗೆದಕ್ಲೆಡ ಬೊಕ್ಕ ನ್ಯಾಯಂತಡೆದ ಅಧಿಕಾರಿಲೆಡ ಪಾತೆರ್ಯೆರ್ , ಬೊಕ್ಕ ಜಿಲ್ಲಾಧಿಕಾರಿ ಕಚೇರಿ ನಡುಟು ಬತ್ತ್‌ದ್, ಲೋಕೋಪಯೋಗಿ ಇಲಾಖೆದ ಎಂಜಿನಿಯರ್ ಹೇಮಂತ್ ಸಂತ್ರಸ್ತ ಕುಟುಮೊ, ಅಕ್ಲೆನ ವಕೀಲೆ ಪ್ರದೀಪ್ ಡಿಸೋಜಾ ಅಂಚೆನೇ ನ್ಯಾಯಂತಡೆದ ಅಧಿಕಾರಿಲೆಡ ಪಾತೆರ್ಯೆರ್. ಕಕ್ಷಿದಾರೆರೆನ್ ಜಿಲ್ಲಾಧಿಕಾರಿ ಕಚೇರಿಗ್ ಲೆತೊಂದುಪೋದು, ಅಲ್ಪ ಬಯ್ಯದುಲಯಿ ವಿಷಯ ಇತ್ಯರ್ಥ ಮಲ್ಪುವ ಪನ್ದ್ ಹೇಮಂತ್ ಪಾತೆರ ಕೊರ್ಯೆರ್. ಆರೆನ ಕಾಯೆಸ್‌ದ ಪ್ರಕಾರ, ಸಾದಿ ಪಿರ ಓಪನ್ ಮಲ್ತ್ ಕೊರ್ಯೆರ್.