Last updated on September 21st, 2025 at 10:13 pm
ಬೊಲ್ತೇರ್, ಸೆ. 21: ಮೊಬೈಲ್, ಇಂಟರ್ನೆಟ್ ಕಾಲೊಡು ಜೋಕುಲು ಗೊಬ್ಬುಗಮ್ಮತ್ತ್ಲೆರ್ದ್, ತುಳು ಸಂಸ್ಕೃತಿರ್ದ್ ದೂರ ಆವೊಂದುಲ್ಲೆರ್, ಅಕಲೆಗ್ ಗೊಬ್ಬು, ಕೌಶಲ್ಯೊಲೆನ ಪೊಲಬು ಪುಟ್ಟಾವುನ ದಿಟ್ಟಿಡ್ ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ ದ ಮುತಾಲಿಕೆಡ್ ಕರಂಬಾರ್ ಸ. ಹಿ. ಪ್ರಾ. ಶಾಲೆಡ್ “ಬೊಳ್ಳಿದೋಟಡ್ ಬಂಗಾರ್ ಪುರ್ಪೊಲೆನೊಟ್ಟುಗು” ಪನ್ಪಿ ಅಡಿಬರವುಡು ‘ಶಾಲೆಡೊಂಜಿ ದಿನ’ ಪನ್ಪಿ ಲೇಸ್ ಕೋಡೆ ಸೆಪ್ಟೆಂಬರ್ 20ನೇ ಸನಿಯಾರ ಕಾಂಡೆರ್ದ್ ಬಯ್ಯ ಮುಟ್ಟ ನಡತ್ಂಡ್.
ಈ ಲೇಸ್ಡ್ ಜೋಕುಲೆಗ್ ಮಡಲ್ ಮೊಡೆಯೆರ, ಮೂಡೆ ಕಟ್ಟೆರ, ಒಲಿಟ್ ಬೇತೆ ಬೇತೆ ಸೊತ್ತುಲೆನ್ ಮಲ್ಪುನ, ಚೆನ್ನೆಮಣೆ, ಡೊಂಕ, ಪೊಕ್ಕುಇಂಚ ಬೇತೆ ಬೇತೆ ಗೊಬ್ಬು, ಕರಕುಶಲ ಬೇಲೆಲೆನ್ ಜೋಕುಲೆಗ್ ಕಲ್ಪಾದ್ ಕೊರ್ಯೆರ್. ಮಹಿ ಮುಲ್ಕಿ ಮೇರ್ ಜೋಕುಲೆಗ್ ಮಡಲ್ ಮೊಡೆಯೆರ ಅಂಚೆನೇ ವರುಣ್ ಗಟ್ಟಿ ಮೂಡೆ ಕಟ್ಟೆರ ಕಲ್ಪಾಯೆರ್. ಸುಕೇಶ್, ಸುಶಾನ್, ಬ್ಲೆನ್ಸನ್, ದಿವಾಕರ್ ಉಬಾರ್, ನಿಹಾಲ್ ಪೈ, ಅಕ್ಷಯ್ ರೈ, ಪೃಥ್ವಿ ಬೆರಿತಾಂಗ್ ಕೊರ್ಯೆರ್. ಶಾಲಾಭಿವೃದ್ಧಿ ಸಮಿತಿದ ಗುರ್ಕಾರ್ಲು ಪುಷ್ಪರಾಜ್ ಬೊಕ್ಕ ದಿವಾಕರ್ ಉಬಾರ್ ಚೆನ್ನೆಮಣೆ ಕಲ್ಪಾಯೆರ್. ಪೃಥ್ವಿ, ಸುಕೇಶ್, ಮಹಿ ಮುಲ್ಕಿ ಜೋಕುಲೆಗ್ ತುಳು ಲಿಪಿತ ಪೊಲಬು ಕೊರ್ದು, ಜೋಕುಲೆಗ್ ಅಕ್ಲೆನ ಪುದರ್ ತುಳು ಲಿಪಿಟ್ ಬರೆಯೆರ ಪನ್ಡ್ದ್ ಕೊರ್ಯೆರ್.
ಮದ್ಯಾನರ್ದ್ ಬೊಕ್ಕ ಜೋಕುಲೆಗ್ ನೆಂಪು ದೀಲೆ ಪಂತ ನಡತ್ಂಡ್. ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ದ ಗುರ್ಕಾರ್ಲು ನಿಶ್ಚಿತ್ ರಾಮಕುಂಜ ಜೋಕುಲೆಗ್ ಡೆನ್ನನ ಡೆನ್ನಾನ ತುಳು ಪದ ಕಲ್ಪಾಯೆರ್.
ಬಯ್ಯಡ್ ನಡತಿನ ಸಮಾರೋಪ ಸಮಾರಂಭೊಡು ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ದ ಕಡೆರ್ದ್ ಶಾಲೆಗ್ ಸಿಸಿಟಿವಿ ಕೊರ್ಯೆರ್. ಶಾಲಾಭಿವೃದ್ಧಿ ಸಮಿತಿದ ಗುರ್ಕಾರ್ಲು ಪುಷ್ಪರಾಜ್ ಪಾತೆರ್ದ್ ಶಾಲೆಲೆಡ್ ಇಂಚಿನ ಲೇಸ್ ನನಲಾತ್ ನಡಪೊಡು, ಜೋಕುಲೆಗ್ ತುಳು ಸಂಸ್ಕೃತಿದ ಪೊಲಬು ಪುಟ್ಟಾವೊಡು ಪನ್ದ್ ಪನ್ಡೆರ್, ಶಾಲೆದ ಹೆಡ್ ಮಾಸ್ಟರ್ ರಮೇಶ್ ಚೌಹಾನ್ ಪಾತೆರ್ದ್, ತುಳು ನೆಲ, ತುಳು ಗಾಳಿ, ತುಳು ನೀರ್ದ ರಕ್ಷಣೆ ಪ್ರತೀ ತುಳುವ ಬಾಲೆದ ಜವಾಬ್ದಾರಿ ಪನ್ದ್ ಪನ್ಡೆರ್. ಶಾಲೆದ ಶಿಕ್ಷಕೆರ್ ಸಾವಿತ್ರಿ, ಸದಾಶಿವ ಅಂಚೆನೇ ಬೇತೆ ಶಿಕ್ಷಕೆರ್ ಲೇಸ್ಗ್ ಬೆರಿತಾಂಗ್ ಕೊರ್ಯೆರ್. ಜೋಕುಲೆನ ಅಪ್ಪೆಅಮ್ಮೆ, ಪರ ವಿದ್ಯಾರ್ಥಿಲು ಪಾಲ್ಪಡೆಯೆರ್. ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ದ ಪದುಕೆರ್ ಸುಕೇಶ್ ಜೋಕುಲೆಗ್ ಸ್ಟೇಷನರಿ ಸೊತ್ತುಲೆನ್ ಪಟ್ಟಿಯೆರ್. ತುಳು ಕಲ್ಚರಲ್ ರಿಸರ್ಚ್ ಫೌಂಡೇಶನ್ದ ಪದುಕೆರ್ ಅಂಚೆನೇ ಸ್ಥಳೀಯೆರ್ ಆಯಿನ ಪೃಥ್ವಿರಾಜ್ ಮೆರೆನ ಪೂರ್ಣ ಸಹಕಾರೊಡು ಶಾಲೆಡೊಂಜಿ ದಿನ ಲೇಸ್ ಯಶಸ್ವಿಯಾದ್ ನಡತ್ಂಡ್.
