Last updated on September 17th, 2025 at 03:26 pm
ಕಾಸ್ರೋಡ್ ಸೆ. 17: ಕಾಸ್ರೋಡ್ಡ್ 16 ವರ್ಸ ಪ್ರಾಯೊದ ಆಣನ ಮಿತ್ತ್ ಲೈಂಗಿಕ ದೌರ್ಜನ್ಯ ಮಲ್ತಿನ ಆರೋಪಡ್ ಶೈಕ್ಷಣಿಕ ಅಧಿಕಾರಿ ಬೊಕ್ಕ ರೈಲ್ವೆ ರಕ್ಷಣಾ ಪಡೆ (ಆರ್ಪಿಎಫ್) ಅಧಿಕಾರಿ ಸೇರ್ದ್ 10 ಜನನ್ ಪೊಲೀಸೆರ್ ಕೈದ್ ಮಲ್ತ್ದೆರ್. ಎಲ್ಜಿಬಿಟಿಕ್ಯೂ ಸಮುದಾಯೊದ ಡೇಟಿಂಗ್ ಆ್ಯಪ್ದ ಮುಕೇನ ಗುರ್ತ ಆತಿನ 16 ವರ್ಸ ಪ್ರಾಯೊದ ಆಣಗ್ ಕಿರುಕುಳ ಕೊರೊಂದುಪ್ಪುನ ನಡಕೆ ನಡತ್ದ್ಂಡ್.
ಕಾಸ್ರೋಡ್, ಕಣ್ಣೂರ್, ಕೋಳಿಕ್ಕೋಡ್ ಬೊಕ್ಕ ಎರ್ನಾಕುಲಂ ಜಿಲ್ಲೆಲೆಡ್ ನಡತಿನ ನಡಕೆಲೆಗ್ ಸಂಬಂಧಿತ್ದ್ ಒಟ್ಟು 16 ಪ್ರಕರಣೊಲೆಡ್ 16 ಆರೋಪಿಲೆನ ಮಿತ್ತ್ ಆರೋಪ ಉಂಡು ಪನ್ದ್ ಚಂದೇರಾ ಪೊಲೀಸೆರ್ ತೆರಿಪಾದೆರ್.
ಬೇಕಲ್ ಸಹಾಯಕ ಶಿಕ್ಷಣಾಧಿಕಾರಿ (ಎಇಒ) ವಿ.ಕೆ.ಝೈನುದ್ದೀನ್ (52); ಆರ್ಪಿಎಫ್ ಅಧಿಕಾರಿ ಚಿತ್ರರಾಜ್ ಎರಾವಿಲ್ (48); ಜಮಾತ್-ಎ-ಇಸ್ಲಮಿ ಕಾರ್ಯಕರ್ತೆ, ತ್ರಿಕರಿಪುರೊದ ವಳವಕ್ಕಾಡ್ ನಿವಾಸಿ ಅಬ್ದುಲ್ ರಹಿಮಾನ್ ಹಾಜಿ (55); ಪಿಲಿಕೋಡು ಪಂಚಾಯತ್ದ ವೆಳ್ಳಕ್ಕಲ್ ಸುಕೇಶ್ (30); ಚಂದೇರದ ಅಫ್ಜಲ್ (23); ಚೀಮೇನಿಯ ಶಿಜಿತ್ (36); ತ್ರಿಕರಿಪುರ ಮುಟ್ಟದ ಕೋವಲ್ ದ ರಯೀಸ್ (30); ಕಾಞಂಗಾಡ್ ಪಡನ್ನಕ್ಕಾಡ್ ದ ರಂಜಾನ್ (64); ಬೊಕ್ಕ ಚೀಮೇನಿದ ನಾರಾಯಣನ್ (60); ಗಿರೀಶ್ ಕೈದಾತಿನಕುಲು. ಇಂದೆತ ಬೆರಿಟೇ ಸಾಮಾನ್ಯ ಶಿಕ್ಷಣ ಇಲಾಖೆ ಝೈನುದ್ದೀನ್ನ್ ಅಮಾನತ್ ಮಲ್ದ್ಂಡ್.
ಯೂತ್ ಲೀಗ್ ತ್ರಿಕರಿಪುರ ಪಂಚಾಯತ್ ಸಮಿತಿ ಪ್ರಧಾನ ಕಾರ್ಯದರ್ಶಿ ಸಿರಾಜ್ ವಡಕ್ಕುಂಪಡ್ (46) ಸೇರ್ದ್ ಬೇತೆ ಆರೋಪಿಲೆನ್ ನಾಡೊಂದುಲ್ಲ ಪನ್ದ್ ಪೊಲೀಸೆರ್ ತೆರಿಪಾದೆರ್.
ಒಟ್ಟು 16 ಪ್ರಕರಣೊಲೆಡ್ 10 ಪ್ರಕರಣೊಲು ಚಂದೇರಾ ಪೊಲೀಸ್ ಸ್ಟೇಶನ್ಡ್ ದಾಕಲಾತ. ಒರಿನ ಆಜಿ ಪ್ರಕರಣೊಲು ಕಣ್ಣೂರ್ದ ಪಯ್ಯನೂರು ಸ್ಟೇಶನ್, ಕೋಳಿಕ್ಕೋಡ್ದ ಕಸಬಾ ಸ್ಟೇಶನ್ ಬೊಕ್ಕ ಎರ್ನಾಕುಲಂದ ಎಲಮಕ್ಕರ ಸ್ಟೇಶನ್ಲೆಡ್ ದಾಕಲಾತ ಪನ್ದ್ ಕಾಸ್ರೋಡ್ ಎಸ್ಪಿ ವಿ.ವಿ. ವಿಜಯ ರೆಡ್ಡಿ ತೆರಿಪಾದೆರ್.
ಗುರ್ತದಾಂತಿನ ಆಂಜೊವುಲು ಆಣಗ್ ಫೋನ್ ಮಲ್ತ್ದ್ ಇಲ್ಲಗ್ ಬತ್ತ್ ಪೋಪುನೆನ್ ಆಯನ ಅಪ್ಪೆ ತೂದು ವಿಚಾರಿಪುನಗ ಆಣನ ಈ ನಡಕೆ ಬೊಲ್ಪುಗು ಬೈದ್ಂಡ್ ಪನ್ದ್ ಪೊಲೀಸೆರ್ ತೆರಿಪಾದೆರ್. ಆಣನ ಅಪ್ಪೆ ಬೊಕ್ಕ ಪೊಲೀಸೆರೆಗ್ ತೆರಿಪಾದ್, ಪೋಲೀಸೆರ್ ಚೈಲ್ಡ್ಲೈನ್ಗ್ ಒಲವು ಕೊರ್ತೆರ್. ಉಂದಾಯಿ ಬೊಕ್ಕ, ಚೈಲ್ಡ್ಲೈನ್ ಅಧಿಕಾರಿಲು ಕೌನ್ಸೆಲಿಂಗ್ ಮಲ್ತ್ದೆರ್, ಆ ಪೊರ್ತುಡು ಆಣ್ ತನ್ನ ಮಿತ್ತ್ ಆತಿನ ದೌರ್ಜನ್ಯೊಲೆನ್ ತೆರಿಪಾದೆ. ಬೊಕ್ಕ ಪೊಲೀಸೆರ್ ಪ್ರಕರಣ ದಾಕಲ್ತೊಂದು, ಅಕ್ಲೆನ ಮಿತ್ತ್ ಬಿಎನ್ಎಸ್ ಸೆಕ್ಷನ್ 377 ಬೊಕ್ಕ ಪೋಕ್ಸೊ ಕಾಯ್ದೆದ ಸೆಕ್ಷನ್ 3, 4, 5, 6, 7 ಅಂಚೆನೇ 8 ದ ಅಡಿಟ್ ಕೇಸ್ ಪಾಡ್ದೆರ್.