Last updated on September 13th, 2025 at 09:57 am
ಮೈಸೂರು, ಸೆ. 13: 15 ಲಕ್ಷ ರೂ. ಪಿರಿಕಟ್ಟ್ದ ಕಾಸ್ ತಿಕ್ಕುಂಡು ಪನ್ಪಿ ಅಂಗ್ಡ್ ಕಂಡನ್ಯನ್ ವಿಷ ಪಾಡ್ದ್ ಕೆರ್ದ್, ಬೊಕ್ಕ ಪಿಲಿ ದಾಳಿ ಮಲ್ತ್ದ್ ಕೆರ್ತ್ಂಡ್ ಪನ್ದ್ ಕಥೆ ಕಟ್ಟಿನ ಚಾಲ್ ಬೊಡೆದಿ ತಿಕ್ಕ್ದ್ ಬೂರ್ದಿನ ನಡಕೆ ಮೈಸೂರ್ಡ್ ನಡತ್ದ್ಂಡ್. ಹುಣಸೂರು ತಾಲೂಕ್ದ ಚಿಕ್ಕಹೆಣ್ಣೂರು ಗ್ರಾಮೊದ ಪೊಂಜೊವು ಒರ್ತಿ ತನ್ನ ಕಂಡನ್ಯನ್ ಕೆರ್ದ್, ಆಯನ್ ಪಿಲಿ ಒಯ್ತೊಂದು ಪೋತುಂಡು ಪನ್ದ್ ಕಥೆ ಕಟ್ಟ್ದ್, ಕಾಡಮುರ್ಗೊಲೆ ದಾಳಿಗ್ ಬಲಿ ಆತಿನ ಇಲ್ಲಲಗೆಗ್ ಸರ್ಕಾರೊರ್ದು ಕೊರ್ಪುನ 15 ಲಕ್ಷ ರೂ. ಪಿರಿಕಟ್ಟ್ದ ಕಾಸ್ ಗೆತೊನರೆ ಪುನೆಪು ಬೈದಲ್.
ಮೈಸೂರ್ದ ಹುಣಸೂರು ಗ್ರಾಮಾಂತರ ಪೊಲೀಸೆರ್ ಮಳವಳ್ಳಿ ತಾಲೂಕು ಕದಂಪುರ ಗ್ರಾಮೊದ ನಿವಾಸಿ ವೆಂಕಟಸ್ವಾಮಿನ್ ಕೆರ್ತಿನ ಪ್ರಕರಣೊಡು ಸಲ್ಲಾಪುರಿ (40) ನ್ ಕೈದ್ ಮಲ್ತ್ದೆರ್. ಕಾಡಮುರ್ಗೊಲೆ ದಾಳಿಡ್ ಸೈತ್ಂಡ ಸರ್ಕಾರೊರ್ದು ತಿಕ್ಕುನ 15 ಲಕ್ಷ ರೂ. ಪಿರಿಕಟ್ಟ್ದ ಕಾಸ್ ಗೆತೊನ್ರ ಪ್ಲಾನ್ ಮಲ್ತಿತ್ತಿನ ಸಲ್ಲಾಪುರಿ, ಕಂಡನ್ಯನ್ ಕೆರ್ದ್ ಪಿಲಿ ಕೆರ್ತ್ಂಡ್ ಪನ್ದ್ ಕಥೆ ಕಟ್ಟ್ದ್ ಪೊಲೀಸೆರೆನ್ ಮಂಗೆ ಮಲ್ಪೆರ ತೂತಲ್. ಹುಣಸೂರು ಗ್ರಾಮಾಂತರ ಸ್ಟೇಷನ್ ಇನ್ಸ್ಪೆಕ್ಟರ್ ಮುನಿಯಪ್ಪೆ ಬೊಕ್ಕ ಕೂಟ ಮಲ್ತಿನ ಜಡ್ತೆಡ್ ಬೊಡೆದಿನ ಪ್ಲಾನ್ ತೆರಿದ್ ಬೈದ್ಂಡ್. ಕಂಡನ್ಯನ್ ಕೆರ್ತಿನ ಬೊಡೆದಿ ಇತ್ತೆ ಪೊಲೀಸೆರೆ ಬಿನ್ನೆದಿ ಆತಲ್.
ದಂಪತಿಗ್ ಇರ್ವೆರ್ ಆಣ್ ಜೋಕುಲು ಉಲ್ಲೆರ್. ಹುಣಸೂರುಡ್ ಜಾಗೆ ತೂವೊನ್ರ ಈ ದಂಪತಿಲೆನ್ ಉಂತಾದಿತ್ತೆರ್. ಐಷಾರಾಮಿ ಜೀವನೊದ ಕನ ಕಟ್ಟೊಂದಿತ್ತಿನ ಮೋಲು ಸರ್ಕಾರೊದ ಯೋಜನೆಲೆಡ್ ಕಾಸ್ ಗೆತೊನುನ ಉದ್ದೇಶೊಲೆನ್ ದೀವೊಂದು ಅಪಗಪಗ ಸರ್ಕಾರಿ ಕಚೇರಿಲೆಗ್ ಪೋದು ಒಲವು ಗೆತೊನೊಂದಿತ್ತಲ್. ಕಾಡಮುರ್ಗೊಲೆನ ದಾಳಿಡ್ ತೀರ್ಂಡ 15 ಲಕ್ಷ ರೂಪಾಯಿ ಪಿರಿಕಟ್ಟ್ ತಿಕ್ಕುನ ಯೋಜನೆದ ಒಲವು ಮೋಲೆಗ್ ತಿಕ್ಕ್ದ್ಂಡ್. ಕಂಡನ್ಯನ್ ಕೆರ್ಪುನ ಸ್ಕೆಚ್ ಮಲ್ತಿನ ಸಲ್ಲಾಪುರಿ, ಕರಿನ ಅಂಗಾರೆ ಕಂಡನ್ಯನ್ ವಿಷ ಪಾಡ್ದ್ ಕೆರ್ತಲ್. ಬೊಕ್ಕ ಇಲ್ಲರ್ದ್ ಪಿದಯಿ ಪುನೊನು ಒಯ್ತೊಂದು ಪೋದು ವಿರೂಪ ಮಲ್ತ್ದ್ ಗುಂಡಿಡ್ ಪಾಡ್ದ್ ಕಾಡಮುರ್ಗೊದ ದಾಳಿಡ್ ಸೈತಿಲೆಕ ತೂಪಾದಲ್. ಬೊಕ್ಕ ಸ್ಟೇಶನ್ಗ್ ಬತ್ತ್ದ್ ಕಂಡನೆ ತೋಜೊಂದಿಜ್ಜೆ ಪನ್ದ್ ಮಿಸ್ಸಿಂಗ್ ಕಂಪ್ಲೇಂಟ್ ಬರೆಪಾದಲ್.
ಒಯಿಲ್ಡ್ ಪಿಲಿ ಒಯ್ತೊಂದು ಪೋದುಪ್ಪು ಪನ್ದ್ ಪನ್ತಲ್. ಸಲ್ಲಾಪುರಿನ ಪಾತೆರ ನಂಬಿನ ಪೊಲೀಸೆರ್ ಜಾಗೆಗ್ ಪೋದು ಗ್ರಾಮಸ್ಥೆರ್ ಬೊಕ್ಕ ಅರಣ್ಯ ಇಲಾಖೆದ ಸಿಬ್ಬಂದಿಲೆನ ಸಕಾಯೊಡು ನಾಡ್ದೆರ್. ಪಿಲಿ ದಾಳಿ ಮಲ್ತಿನ ಒವ್ವೇ ಪುರಾಪು ಪೊಲೀಸೆರೆಗ್ ತಿಕ್ಕ್ದಿಜ. ಬರ್ಸ ಬತ್ತಿನೆರ್ದಾವರ ಪುರಾಪು ನಾಶ ಆದುಪ್ಪು ಪನ್ದ್ ಪೊಲೀಸೆರ್ ಅಂದಾಜಿ ಮಲ್ತಿತ್ತೆರ್. ಆಂಡ ಸಿಸಿ ಕ್ಯಾಮರಾಡ್ ಕಾಲಿ ಬೊಡೆದಿ ಸಲ್ಲಾಪುರಿ ಮಾತ್ರ ಬಲಿಪುನ ತೋಜಿದ್ ಬೈದ್ಂಡ್. ಇನ್ಸ್ಪೆಕ್ಟರ್ ಮುನಿಯಪ್ಪೆರ್ ಸಲ್ಲಾಪುರಿನ್ ವಿಚಾರಣೆ ಮಲ್ಪುನಗ ವಿಷ ಪಾಡ್ದ್ ಕೆರ್ತಿನೆನ್ ಒತ್ತೊಂದಲ್.
ಕಾಡಮುರ್ಗೊಲೆನ ದಾಳಿಡ್ ಸೈತ್ಂಡ ಸರ್ಕಾರೊರ್ದು ತಿಕ್ಕುನ 15 ಲಕ್ಷ ಪಿರಿಕಟ್ಟ್ದ ಕಾಸ್ ಗೆತೊನುನ ಅಲೆಚನೆಡ್ ಇಂಚ ಮಲ್ದಿನೆನ್ ವಿಚಾರಣೆದ ಪೊರ್ತುಡು ತೆರಿಪಾದಲ್. ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ವಿಷ್ಣುವರ್ಧನ್, ಅಡಿಷನಲ್ ಎಸ್ಪಿ ಮಲ್ಲಿಕ್ ಬೊಕ್ಕ ಡಿವೈಎಸ್ಪಿ ಗೋಪಾಲಕೃಷ್ಣೆರೆನ ಮಾರ್ಗದರ್ಶನೊಡು ಇನ್ಸ್ಪೆಕ್ಟರ್ ಮುನಿಯಪ್ಪೆ, ಸಿಬ್ಬಂದಿ ರಾಧಾ, ಮಂಜು ಕಾರ್ಯಾಚರಣೆಡ್ ಪಾಲ್ಪಡೆದಿತ್ತೆರ್.