Last updated on October 23rd, 2025 at 04:40 pm
ಭೋಪಾಲ್, ಅ. 23: ಪರ್ಬೊದ ಪೊರ್ತುಡು, ಗೊಬ್ಬುನ ಸೊತ್ತು ಲೆಕ ಸೇಲ್ ಆಪುನ ‘ಕಾರ್ಬೈಡ್ ಗನ್’ ಗಲಸಿನೆರ್ದಾವರ ಮಧ್ಯಪ್ರದೇಶೊದ ಕೆಲ ಭಾಗೊಲೆಡ್ 14 ಜೋಕುಲು ದೃಷ್ಟಿ ಕಲೆವೊಂದೆರ್, ಅಂಚೆನೇ 122 ಜೋಕುಲೆನ ಕಣ್ಣ್ಗ್ ಗಾತಿದ ಪೆಟ್ಟಾದ್ ಆಸ್ಪತ್ರೆಗ್ ದಾಕಲಾತೆರ್ ಪನ್ದ್ ವರದಿ ಆತ್ಂಡ್. ಪರ್ಬಗ್ ಜೋಕುಲು “ಕಾರ್ಬೈಡ್ ಗನ್” ಅತ್ತ್ಂಡ “ದೇಸಿ ಪಟಾಕಿ ಗನ್” ಡ್ ಗೊಬ್ಬುದೆರ್ ಪನ್ದ್ ವರದಿ ಆತ್ಂಡ್.
ಪೆಟ್ಟಾತಿನ ಜೋಕುಲೆನ್ ಭೋಪಾಲ್ದ ಬೇತೆ ಬೇತೆ ಆಸ್ಪತ್ರೆಲೆಗ್ ದಾಕಲ್ತ್ದೆರ್. ಅವೆಟ್ ಎಚ್ಚಿನಕುಲು 8 ರ್ದ್ 14 ವರ್ಸ ಪ್ರಾಯೊದ ಜೋಕುಲು. ಪರ್ಬದ ಮನದಾನಿ ಭೋಪಾಲ್ಡೊರ್ಮೆ 150 ರ್ದ್ಲಾ ಎಚ್ಚ ಕಾರ್ಬೈಡ್ ಗನ್ ಪ್ರಕರಣೊಲು ದಾಕಲಾತ ಪನ್ದ್ ಅಧಿಕಾರಿಲು ಪನ್ತೆರ್. ಕೆಲ ಜೋಕುಲೆನ್ ಕಡೀರ ಮರ್ದ್ ಮಲ್ತ್ದ್ ಬುಡ್ದಿತ್ತ್ಂಡಲಾ, ಪಾಕ ಜೋಕುಲು ಗಾತಿದ ಬೇನೆಡ್ ಆಸ್ಪತ್ರೆಗ್ ದಾಕಲಾವೊಂದುಲ್ಲೆರ್ ಪನ್ದ್ ಬೈದ್ಯೆರ್ ಪೋಡಿಗೆ ತೂಪಾದೆರ್.
ದುಂಬು ತೋಟೊಡು ಮಂಗೆರೆನ್ ಗೆಡಪೆರ ಈ ಕಾರ್ಬೈಡ್ ಪೈಪ್ ಗನ್ ಲೆನ್ ಗಲಸೊಂದಿತ್ತೆರ್. ಇತ್ತೆ ಪರ್ಬದ ಪೊರ್ತುಡು ಜೋಕುಲು ತಾರಾಮರ ಈ ಗನ್ಲೆನ್ ಗೆತೊನುವೆರ್. ಸಾಮಾಜಿಕ ಬಲೆತ್ತಾನೊಡು ವೀಡಿಯೊಲೆನ್ ತೂದು ಇಲ್ಲಡ್ ಪಟಾಕಿ ಗನ್ ಮಲ್ಪೆರ ತೂಯೆ ಪನ್ದ್ ಒರಿ ಆಣ್ ಮಾಧ್ಯಮೊದಕ್ಲೆಗ್ ತೆರಿಪಾದೆ.
ಈ ಗನ್ಲೆನ ಕ್ರಯ ₹150 ರ್ದ್ ₹200 ಮುಟ್ಟ ಇತ್ತ್ದ್, ಅಂಗಡಿಲೆಡ್ ಗೊಬ್ಬುನ ಸೊತ್ತು ಲೆಕ ಮಾರುವೆರ್. ಕೆಲ ಜೋಕುಲು ಪ್ಲಾಸ್ಟಿಕ್ ಅತ್ತ್ಂಡ ಟಿನ್ ಪೈಪ್ ಗಲಸ್ದ್ ಉಂದೆನ್ ಮಲ್ಪುವೆರ್, ಅವೆಕ್ ಗನ್ ಪೌಡರ್, ಕ್ಯಾಲ್ಸಿಯಂ ಕಾರ್ಬೈಡ್ ಬೊಕ್ಕ ಸೂತಪೆಟ್ಯೆದ ಮರ್ದ್ ದಿಂಜಾವೆರ್. ಬೊಕ್ಕ ಅವೆಕ್ ಲೈಟರ್ಡ್ ಕಿಟಿ ಕೊರ್ನಗ, ಮಲ್ಲ ಸಬ್ದೊದ ಸ್ಪೋಟ ಆಪುಂಡು. ಉಂದೆರ್ದಾವರ ಜೋಕುಲು ಕಣ್ಣ್ ಕಲೆವೊಂದೆರ್.