Last updated on October 4th, 2025 at 03:07 pm
ಬೆಂಗಳೂರು, ಅ. 04: ಮಧ್ಯಪ್ರದೇಶ ಬೊಕ್ಕ ರಾಜಸ್ಥಾನಡ್ ತೆಮ್ಮದ ಸಿರಪ್ ದೆತೊಂದು ಸುಮಾರ್ 11 ಜೋಕುಲು ತೀರ್ದಿನ ನಡಕೆದ ನಡುಟು ಇತ್ತೆ ಕೇಂದ್ರ ಸರಕಾರ ರಡ್ಡ್ ವರ್ಸದುಲಯಿದ ಜೋಕುಲೆಗ್ ತೆಮ್ಮದ ಸಿರಪ್ ಕೊರಂದಿಲೆಕ ಕೇಂದ್ರ ಸರಕಾರ ಆದೇಶ ಮಲ್ದ್ಂಡ್.
ಮಧ್ಯಪ್ರದೇಶದ ಛಿಂದ್ವಾರಾ ಜಿಲ್ಲೆಡ್ 9 ಜೋಕುಲು ಬೊಕ್ಕ ರಾಜಸ್ಥಾನದ ಭರತ್ ಬೊಕ್ಕ ಸಿಕರ್ಡ್ 2 ಜೋಕುಲು ಸೇರ್ದ್ ಒಟ್ಟು 11 ಜೋಕುಲು ತೀರ್ದೆರ್. ಈ ನಡಕೆಲೆನ ಬೆರಿಟೇ ರಾಜಸ್ಥಾನ ಸರ್ಕಾರ ಕೇಸನ್ಸ್ ಫಾರ್ಮಾ ಕಂಪನಿದ 19 ಮರ್ದ್ಲೆನ್ ಮಾರುನ ಅಂಚೆನೇ ಪಟ್ಟುನೆನ್ ಉಂತಾದ್ಂಡ್. ಅತ್ತಂದೆ, ರಾಜಸ್ಥಾನದ ಔಷಧ ನಿಯಂತ್ರಕೆರಾಯಿನ ರಾಜಾರಾಮ್ ಶರ್ಮಾ ನ್ ಅಮಾನತ್ ಮಲ್ದ್ಂಡ್. ಕೋಲ್ಡ್ರಿಫ್ ಬೊಕ್ಕ ನೆಕ್ಸ್ಟ್ರೋ-ಡಿಎಸ್ ಪನ್ಪಿ ರಡ್ಡ್ ತೆಮ್ಮದ ಸಿರಪ್ ಜೋಕುಲೆನ ಸಾವುಗು ನೆವನ ಆತ್ಂಡ್ ಪನ್ದ್ ಆರೋಪ ಉಂಡು. ಈ ಸಿರಪ್ಲೆನ್ ದೆತೊಂದಿನ ಜೋಕುಲೆಗ್ ಪಡಿಕೆ ಕಟ್ಟ್ದ್, ಸರ್ರೊ ಬಾತೊಂದು ಬತ್ತ್ದ್, ಕಿಡ್ನಿ ಫೈಲ್ ಆದ್ ತೀರ್ದೆರ್ ಪನ್ದ್ ಬೈದ್ಯೆರ್ ತೆರಿಪಾದೆರ್.
ರಡ್ಡ್ ವರ್ಸೊದುಲಯಿದ ಜೋಕುಲೆಗ್ ತೆಮ್ಮದ ಸಿರಪ್ ಕೊರಂದಿಲೆಕ ಮಾತಾ ರಾಜ್ಯೊಲುಲಾ ಬೊಕ್ಕ ಕೇಂದ್ರಾಡಳಿತ ಪ್ರದೇಶಗ್ ಓಲೆ ಬರೆತ್ಂಡ್. ಐನ್ ವರ್ಸದುಲಯಿದ ಜೋಕುಲೆಗ್ ತೆಮ್ಮ ಬೊಕ್ಕ ಶೀತಗ್ ಸಾಮಾನ್ಯವಾದ್ ಸಿರಪ್ಲೆನ ಅಗತ್ಯ ಇಪ್ಪುಜಿ. ಬಾರೀ ಅಗತ್ಯ ಇತ್ತ್ಂಡ ಮಾತ್ರ ಡಾಕ್ಟರ್ರೆನ ಸಲಹೆದ ಪ್ರಕಾರ ಕೊರೊಡು ಪನ್ದ್ ನಿರ್ದೇಶನ ಕೊರ್ತೆರ್.