ಸರ್ಕಾರಿ ಜಾಗೆ ಇತ್ತೆ ಮುಸ್ಲಿಂ ಮಕಾನ್, ಹಿಂದೂಲೆನ ಅಂತ್ಯ ಸಂಸ್ಕಾರೊಗು ಇಜ್ಜಿ ಜಾಗೆ

Last updated on October 15th, 2025 at 02:11 pm

ಮಂಡ್ಯ, ಅ. 15: ಮಂಡ್ಯ ಜಿಲ್ಲೆ ಹೊಸಬೂದನೂರು ಗ್ರಾಮೊಡು 60 ವರ್ಸೊರ್ದಿಂಚಿ ಇತ್ತಿನ ಸರ್ಕಾರಿ ಮಸಣ (Graveyard) ಆದಿತ್ತಿನ ಜಾಗೆನ್ 2017 ಟ್ ಮುಸ್ಲಿಮೆರೆಗ್ ಬುಡ್ದು ಕೊರ್ತೆರ್. ಮುಸ್ಲಿಮೆರೇ ಇಜ್ಜಂದಿನ ಊರುಡು ಅಕ್ಲೆಗ್ ಜಾಗೆ ಬುಡ್ದು ಕೊರ್ತಿನವು ಇತ್ತೆ ಬಾರೀ ವಿರೋಧೊಗು ನೆವನ ಆತ್ಂಡ್. ಜಿಲ್ಲಾಡಳಿತೊದ ಈ ನಿರ್ಧಾರೊನು ವಿರೋಧಿತ್‌ದ್ ಮಂಡ್ಯದ ಜನೊಕುಲು ಸಾದಿಗ್ ಜತ್ತ್‌ದೆರ್.

ಹಿಂದೂ ಜಾಗೆನ್ ಒರರ್ದ್ ಒರಾನೆ ಮುಸ್ಲಿಂ ಮಕಾನ್ ಆದ್ ಪಗತಿನ ವಕ್ಫ್ ಬೋರ್ಡ್
ಮಂಡ್ಯ ಜಿಲ್ಲೆದ ಹೊಸಬೂದನೂರು ಗ್ರಾಮೊಡು ಪಾಕ ಹಿಂದೂ ಧರ್ಮೊದ ಇಲ್ಲ್‌ಲುಲ್ಲ. ಮುಲ್ಪದಕುಲು ಕರಿನ 60 ವರ್ಸೊರ್ದಿಂಚಿ ಈ ಗ್ರಾಮೊದ ಒಂಜಿ ಭೂಪ್ರದೇಶೊನು ಮಸಣ ಆದ್ ಗಲಸೊಂದಿತ್ತೆರ್. ಇತ್ತೆ ಹಿಂದೂ ಧರ್ಮೊಡು ಏರ್ಲಾ ಸೈತೆರ್ನ್ಡಲಾ ನೆಮ್ಮದಿಡ್ ಅಂತ್ಯಸಂಸ್ಕಾರ ಮಲ್ಪೆರಲಾ ಆವಂದಿಲೆಕ ಆತ್ಂಡ್.

1963 ರ್ದ್ 2017 ಮುಟ್ಟಲಾ ಗ್ರಾಮದ ಸರ್ವೆ ನಂ. 313 ತ, 1 ಎಕರೆ 13 ಗುಂಟೆ ಜಾಗೆ ಸರ್ಕಾರಿ ಮಸಣ ಆದಿತ್ತ್ಂಡ್. ದುಂಬುರ್ದಿಂಚಿಲಾ ಈ ಊರುಡು ಹಿಂದೂಲು ತೀರ್ಯೆರ್ನ್ಡ ಈ ಮಸಣೊಡೇ ಅಂತ್ಯ ಸಂಸ್ಕಾರ ಮಲ್ತೊಂದಿತ್ತೆರ್. ಆಂಡ ವಕ್ಫ್ ಬೋರ್ಡ್ 2017 ಟ್ ಈ ಹಿಂದೂ ಜಾಗೆನ್ ಒರರ್ದ್ ಒರಾನೆ ಮುಸ್ಲಿಂ ಮಕಾನ್ ಆದ್ ಪಗತ್‌ದ್ಂಡ್. ಮುಸ್ಲಿಂ ಜನೊಕುಲೇ ಇಜ್ಜಂದಿನ ಊರುಡು ಹಿಂದೂ ಮಸಣೊನು ಮುಸ್ಲಿಂ ಮಕಾನ್ ಮಲ್ದಿನೆಕ್ ಗ್ರಾಮಸ್ಥೆರ್ ಅಸಮಾಧಾನ ತೂಪಾದೆರ್.

ಮಸಣದ ಬುಲೆಚ್ಚಿಲ್‌ಗ್ ಕಾಯೆಸ್ ಮಲ್ತ್‌ದ್ ಗ್ರಾಮಸ್ಥೆರೆ ಪೊರ್ಮ್ಬಾಟ
2021 ಟ್ ಅಂತ್ಯ ಸಂಸ್ಕಾರ ಮಲ್ಪಂದಿಲೆಕ ವಕ್ಫ್ ಮಂಡಳಿ ಪನ್ತ್ಂಡ್. ಬೊಕ್ಕ ಗ್ರಾಮಸ್ಥೆರೆ ಪೊರ್ಮ್ಬಾಟೊಗು ಸೋತುದ್ ಜಿಲ್ಲಾಡಳಿತ ಮಸಣದ ಜಾಗೆನ್ ಗ್ರಾಮಸ್ಥೆರೆಗ್ ಕೊರ್ದಿತ್ತ್ಂಡ್. ಕಾಲಿ 24 ಗುಂಟೆ ಜಾಗೆಡ್ ಅಂತ್ಯಕ್ರಿಯೆಗ್ ಅವಕಾಶ ಕೊರ್ದಿತ್ತ್ಂಡ್. ಇತ್ತೆ ಆ ಜಾಗೆಡ್ಲಾ ಪುನತ ಅಂತ್ಯ ಸಂಸ್ಕಾರ ಮಲ್ಪೆರ ಬುಡೊಂದಿಜ್ಜೆರ್. ಗ್ರಾಮ ಪಂಚಾಯತಿರ್ದ್ ಮಸಣ ಅಭಿವೃದ್ದಿ ಆವೊಡಿತ್ತ್ಂಡಲಾ ತಹಶೀಲ್ದಾರೆರ್ ಬೇಲೆ ಉಂತಾದಿತ್ತೆರ್. ಉಂದೆರ್ದಾವರ ಜಿಲ್ಲಾಡಳಿತದ ಮಿತ್ತ್ ಪಿಸಿರಾದ್ ಗ್ರಾಮಸ್ಥೆರ್, ಮುಸ್ಲಿಂ ಮಕಾನ್‌ನ್ ಪಿರ ಹಿಂದೂ ಮಸಣ ಮಲ್ಪೆರ ಆಗ್ರಹ ಮಲ್ತ್‌ದ್ ಪೊರ್ಮ್ಬಾಟ ಮಲ್ತೊಂದುಲ್ಲೆರ್.