Last updated on October 28th, 2025 at 09:10 am
ಪುತ್ತೂರು: ಆರ್ಎಸ್ಎಸ್ ಮುಖಂಡೆ ಡಾ. ಕಲ್ಲಡ್ಕ ಪ್ರಭಾಕರ ಭಟ್ ರೆನ ಮಿತ್ತ್ ದಾಕಲಾತಿನ ಪ್ರಕರಣೊದ ಜಡ್ತೆಡ್, ಆರೆನ್ ಕೈದ್ ಮಲ್ಪುನ ಆವಡ್ ಅತ್ತ್ಂಡ ಒವ್ವೇ ಬಲವಂತದ ಕ್ರಮ ಆವಡ್ ಗೆತೊನುನ ಬೊರ್ಚಿ ಪನ್ದ್ ಪುತ್ತೂರು ಗ್ರಾಮಾಂತರ ಪೊಲೀಸೆರೆಗ್ ಪುತ್ತೂರು 5ನೇ ಎಚ್ಚಿಗೆದ ಜಿಲ್ಲಾ ಬೊಕ್ಕ ಸತ್ರ ನ್ಯಾಯಂತಡೆ ತಾತ್ಕಾಲಿಕ ತಡೆಯಾಜ್ಞೆ ಕೊರ್ತುಂಡು.
ಮಧ್ಯಂತರ ಅರ್ಜಿನ್ ವಿಚಾರಣೆ ಮಲ್ತಿನ ನ್ಯಾಯಂತಡೆ, ನನದ ವಿಚಾರಣೆದ ದಿನೊ ಮುಟ್ಟ ಭಟ್ ರೆನ್ ಮಿತ್ತ್ ಬಲವಂತೊದ ಕ್ರಮ ಗೆತೊನಂದಿಲೆಕ ಆದೇಶ ಮಲ್ದ್ಂಡ್. ಅಂಚಾದ್ ಭಟ್ರೆಗ್ ತಾತ್ಕಾಲಿಕ ರಿಲೀಫ್ ತಿಕ್ಕ್ದ್ಂಡ್.
ಅಕ್ಟೋಬರ್ 20, 2025 ತಾನಿ ಉಪ್ಪಳಿಗೆ ಡ್ ನಡತಿನ ದೀಪೋತ್ಸವ ಕಾರ್ಯಕ್ರಮೊಡು ಡಾ. ಪ್ರಭಾಕರ ಭಟ್ ಮಲ್ದಿನ ಭಾಷಣ ಧಾರ್ಮಿಕ ಪಗೆ ಪುಟ್ಟಾವುಲೆಕ, ಪೊಂಜೊವುಲೆ ಘನತೆಗ್ ತೆಟ್ಟ್ ಮಲ್ಪುಲೆಕ ಅಂಚೆನೇ ಸಾರ್ವಜನಿಕ ಶಾಂತಿನ್ ತೆಟ್ಟಾವುಲೆಕ ಇತ್ತ್ಂಡ್ ಪನ್ಪಿ ಆರೋಪದ ಮಲ್ತ್ದ್ ಮಹಿಳಾ ಪೊರ್ಮ್ಬಾಟಗಾರ್ತಿ ಈಶ್ವರಿ ಪದ್ಮುಂಜ ಒಯಿಲ್ ಬರೆಪಾದಿತ್ತೆರ್.
ಅಂಚಾದ್ ಅಕ್ಟೋಬರ್ 25ತಾನಿ ಪುತ್ತೂರು ಗ್ರಾಮಾಂತರ ಪೊಲೀಸ್ ಸ್ಟೇಶನ್ಡ್ ಅಪರಾಧ ಕ್ರಮಾಂಕ 118/2025 ಅಡಿಟ್ BNS 079, 196, 299, 302 ಬೊಕ್ಕ ಭಾರತೀಯ ನಾಗರಿಕ ಸುರಕ್ಷಾ ಸಂಹಿತೆ 2023ತ ಕಲಂ 35(3) ಸೇರ್ದ್ ಬೇತೆ ಬೇತೆ ವಿಧಿಕ್ಲೆನ ಅಡಿಟ್ ಪ್ರಭಾಕರ ಭಟ್ ಬೊಕ್ಕ ಕಾರ್ಯಕ್ರಮ ಆಯೋಜಕೆರೆ ಮಿತ್ತ್ ಪ್ರಕರಣ ದಾಕಲಾದಿತ್ತ್ಂಡ್. ಅವೆರ್ದ್ ಬೊಕ್ಕ ಭಟ್ರೆಗ್ ಅಕ್ಟೋಬರ್ 30ದಾನಿ ವಿಚಾರಣೆಗ್ ಬರ್ಯೆರ ಪೊಲೀಸೆರೆ ನೋಟಿಸ್ ಜಾರಿ ಆದಿತ್ತ್ಂಡ್.
ಉಂದೆಕ್ ವಿರೋಧವಾದ್ ಭಟ್ ನ್ಯಾಯಂತಡೆಡ್ ಮಧ್ಯಂತರ ಅರ್ಜಿ ಪಾಡ್ದಿತ್ತ್ದ್, ಪುತ್ತೂರುದ ನ್ಯಾಯವಾದಿ ಮಹೇಶ್ ಕಜೆ ಆರೆನ ಪರವಾದ್ ವಾದ ಮಂಡನೆ ಮಲ್ತೆರ್. ವಾದೊನು ಕೇನ್ಡಿನ ನ್ಯಾಯಂತಡೆ, ತಾತ್ಕಾಲಿಕವಾದ್ ಒವ್ವೇ ಬಲವಂತೊದ ಕ್ರಮ ಗೆತೊನಂದಿಲೆಕ ಆದೇಶ ಮಲ್ದ್ಂಡ್.
ಪ್ರತಿವಾದಿ ಆಯಿನ ಪೊಲೀಸ್ ಇಲಾಖೆಗ್ ನೋಟಿಸ್ ಜಾರಿ ಮಲ್ದಿನ ಕೋರ್ಟ್, ಆಕ್ಷೇಪಣೆ ಇತ್ತ್ಂಡ ಅಕ್ಟೋಬರ್ 29, 2025 ತ ಉಲಯಿ ಸಂದಾಯೆರ ಸೂಚನೆ ಕೊರ್ತುಂಡು. ಪ್ರಕರಣೊದ ನನದ ವಿಚಾರಣೆ ಅಕ್ಟೋಬರ್ 29ದಾನಿಗ್ ಗೊತ್ತು ಮಲ್ದೆರ್.