ಕುಂಬ್ಳೆ: ಅನಂತಪುರ ಫ್ಯಾಕ್ಟರಿಡ್ ಮಲ್ಲ ಸ್ಪೋಟ, ಒರಿ ಕಾರ್ಮಿಕೆ ತೀರ್ಯೆರ್

Last updated on October 28th, 2025 at 07:18 am

ಕುಂಬ್ಳೆ, ಅ. 28: ಅನಂತಪುರ ಪ್ಲೈವುಡ್ ಪ್ಯಾಕ್ಟರಿ ಒಂಜೆಟ್ ಬಾಯ್ಲರ್ ಸ್ಪೋಟ ಆದ್ ಒರಿ ತೀರ್ದ್, ಪಾಕ ಜನೊಕು ಗಡಿಕುಲಾತಿನ ನಡಕೆ ಕೋಡೆ ನಡತ್‌ದ್ಂಡ್.

ಕೋಡೆ (ಸೋಮಾರ) ಬಯ್ಯ ಸುಮಾರ್ 7 ಗಂಟೆರ್ದ್ 7.30ತ ಉಲಯಿ ನಡತಿನ ನಡಕೆಡ್ ಪಿದಯಿ ರಾಜ್ಯೊದ ಕಾರ್ಮಿಕೆ ಒರಿ ತೀರ್ದೆರ್. ಪಾಕ ಜನ ಕಾರ್ಮಿಕೆರೆಗ್ ಗಾತಿದ ಗಡಿಕುಲಾತ. ಅನಂತಪುರ ಕೈತಲ್ದ ಕಣ್ಣೂರು ಕುನ್ನಿಲ್ ಮುಟ್ಟದ ಡೆಕ್ಕೂರು ಪ್ಲೈವುಡ್ ಫ್ಯಾಕ್ಟರಿಡ್ ಬಾಯ್ಲರ್ ಸ್ಪೋಟ ಆದಿತ್ತ್‌ದ್ ಒರ್ಮೆಲಾ ಸೂ ಪತೊಂದುಂಡು. ಸುಮಾರ್ 300 ಜನ ಕಾರ್ಮಿಕೆರ್ ಸ್ಪೋಟ ಆತಿನ ಜಾಗೆಡ್ ಇತ್ತೆರ್ ಪನ್ದ್ ತೆರಿದ್ ಬೈದ್ಂಡ್.

ಪೆರಾಲ್ ಕಣ್ಣೂರು, ಸಿದ್ದಿಬೈಲ್ ಮುಟ್ಟ ಸ್ಫೋಟದ ಪಡಾಯಿ ಇತ್ತ್ಂಡ್. ಈ ಬಗೆಟ್ ಅಗ್ನಿಶಾಮಕ ದಳ ಸೇರ್ದ್ ಪಾಕ ಜನ ಪರಿಸ್ಥಿತಿನ್ ಅಂಕೆಡ್ ಕನಯೆರ ಪತ್ತ್‌ದೆರ್. ಈ ಭಾಗೊಗು ವಾಹನ ಸಂಚಾರ ನಿಷೇಧ ಮಲ್ದೆರ್. ನನಲ ಎಚ್ಚಿನ ಜನೊತ ಪೆರಣ ಪೋದುಪ್ಪು ಪನ್ದ್ ಅಂದಾಜಿ ಮಲ್ದೆರ್.