Last updated on October 7th, 2025 at 12:51 pm
ಅ. 07:‘ಕಾಂತಾರಾ ಚಾಪ್ಟರ್ 1’ (Kantara Chapter 1) ಸಿನಿಮಾ ಬುಡುಗಡೆ ಆದ್ ಕೆಲ ದಿನ ಆದಿತ್ತ್ದ್ ಸಿನಿಮಾ ಬಾಕ್ಸ್ ಆಫೀಸ್ಡ್ ಯಶಸ್ವಿ ಆವೊಂದುಂಡು, ಆಂಡ ದಾನೆ ಉಂದೆನೇ ಪತೊಂದು ತುಳುನಾಡ ಸಂಸ್ಕೃತಿನ್ ಕೋಂಗಿ ಕಟ್ಟಾದ್ ತೋಜಾವುನಕ್ಲುಲಾ ಎಚ್ಚ ಆತೆರ್. ದುಂಬು 2022 ಟ್ ‘ಕಾಂತಾರ’ ಸಿನಿಮಾ ಬುಡುಗಡೆ ಆಯಿನ ಪೊರ್ತುಡು ಆರ್ಕೆಸ್ಟ್ರಾಲೆಡ್, ಖಾಸಗಿ ಕಾರ್ಯಕ್ರಮೊಲೆಡ್, ಟಿವಿ ಶೋ ಲೆಡ್ ದೈವೊದ ಲೆಕ ಏಸ ಪಾಡೊಂದು ಬರ್ಪುನ ಟ್ರೆಂಡ್ ಆದಿತ್ತ್ಂಡ್. ಇತ್ತೆ ‘ಕಾಂತಾರ: ಚಾಪ್ಟರ್ 1’ ಸಿನಿಮಾ ಬುಡುಗಡೆ ಆಯಿನೇ ಕುಡ ಈ ಕೋಂಗಿ ಕಟ್ಟುನ ನಡಕೆಲು ನಡತೊಂದುಲ್ಲ. ಉಂದೆನ್ ತುಳುಕೂಟ ವಿರೋಧ ಮಲ್ತಿತ್ತ್ದ್, ರಿಷಬ್ ಶೆಟ್ಟಿಗ್ ಓಲೆ ಬರೆದ್ ತನ್ಕುಲೆ ಅಸಮಾಧಾನನ್ ತೆರಿಪಾದೆರ್.
‘ರಿಷಬ್ ಶೆಟ್ರೇ, ಈರ್ ದೈವೊಲೆ ಮಿತ್ತ್ ಎಡ್ಡೆ ನಂಬಿಕೆ ಇತ್ತಿನಾರ್ ಪನ್ದ್ ಪಾಕ ಸರ್ತಿ ಪನ್ಡೊನ್ದರ್. ಈರ್ ದೈವೊದ ಬಗೆಟ್ ಸಿನಿಮಾ ಮಲ್ತ್ದರ್, ಅವೆಕ್ ಎಂಕ್ಲೆನ ಅಭ್ಯಂತರ ಇಜ್ಜಿ. ಆಂಡ ಈರೆನ ಸಿನಿಮಾ ತೂಪುನ ಅಭಿಮಾನಿಲೆಗ್ ದೈವಾರಾಧನೆದ ಬಗೆಟ್ ಜಾಗೃತಿ ಪುಟ್ಟಾಲೆ. ‘ಕಾಂತಾರ’ ಬತ್ತಿನೆರ್ದಿಂಚಿ ದೈವೊಲೆಗ್ ಕೋಂಗಿ ಕಟ್ಟುನ ಎಚ್ಚ ಆವೊಂದುಂಡು. ಇಂಚಿಪ ಆಂಜೊವು ಒರಿ ದೈವೊದ ಏಸ ಪಾಡೊಂದು ಚಿತ್ರಮಂದಿರೊಗು ಬತ್ತಿನ ವಿಡಿಯೋ ವೈರಲ್ ಆದಿತ್ತ್ಂಡ್. ಸಿನಿಮಾ ತೂನಗನೇ ಕೆಲ ಪ್ರೇಕ್ಷಕೆರ್ ಮೆಯಿಟ್ ಬತ್ತಿಲೆಕ ಮಲ್ತೊಂದುಲ್ಲೆರ್. ಕುಡ ಒಂತೆ ಜನ ಚಿತ್ರಮಂದಿರೊರ್ದು ಪಿದಯಿ ಬನ್ನಗ ಕಲ್ಕುನ ವಿಡಿಯೋಲು ವೈರಲ್ ಆತ’.
‘ದಿನೊಲಾ ಇಂಚೀನ ವಿಡಿಯೋಲೆನ್ ತೂದು ಸಾಕಾಂಡ್. ಉಂದೆನ್ ಮಾತಾ ತೂದು ಈರ್ ದಾಯೆ ಮನಿಪುಜರ್ ಪನ್ದ್ ತೆರಿಯುಜಿ. ಸಿನಿಮಾ ಪ್ರದರ್ಶನೊಗು ದುಂಬು ಈ ಬಗೆಟ್ ಒಂಜಿ ಡಿಸ್ಕ್ಲೇಮರ್ (ಎಚ್ಚರ್ಗೆ) ಪಾಡ್ಯೆರ ದುಂಬೇ ಕಾಯೆಸ್ ಮಲ್ತಿತ್ತ. ಆಂಡ ಈ ಬಗೆಟ್ ಈರೆಗ್ ದಾಯೆ ಈತ್ ನಾಮಾಸ್ ಪನ್ದ್ ತೆರಿಯುಜಿ. ದೈವಾರಾಧನೆ ಎಂಕ್ಲೆನ ನಂಬಿಕೆ. ಇತ್ತೆನೇ ಸುದ್ದಿಗೋಷ್ಠಿ ಲೆತ್ತ್ದ್, ಈ ಬಗೆಟ್ ಜಾಗೃತಿ ಪುಟ್ಟಾದ್, ಸಿನಿಮಾ ಪ್ರದರ್ಶನೊಗು ದುಂಬು ಡಿಸ್ಕ್ಲೇಮರ್ ಪಾಡ್ಲೆ’ ಪನ್ದ್ ತುಳುಕೂಟ ಆಗ್ರಹ ಮಲ್ದ್ಂಡ್.
ಇಂಚಿಪ ತಮಿಳುನಾಡ್ದ ದಿಂಡಿಗಲ್ದ ಒಂಜಿ ಚಿತ್ರಮಂದಿರೊಡು ‘ಕಾಂತಾರ: ಚಾಪ್ಟರ್ 1’ ಸಿನಿಮಾ ಪ್ರದರ್ಶನೊಗು ದುಂಬು ಆಂಜೊವು ಒರಿ ದೈವೊದ ಲೆಕ ಏಸ ಪಾಡೊಂದು ಬತ್ತಿತ್ತೆ. ಈ ನಡಕೆದ ವಿಡಿಯೋ ವೈರಲ್ ಆದಿತ್ತ್ಂಡ್. ಅವೆಕ್ ದುಂಬು ಕುಡೊರಿ ‘ಕಾಂತಾರ’ ಪ್ರದರ್ಶನ ಆವೊಂದಿತ್ತಿನ ಚಿತ್ರಮಂದಿರೊದ ಎದುರು ಚಿತ್ರ-ವಿಚಿತ್ರವಾದ್ ಕಲ್ಕೊಂದು, ‘ಕಾಂತಾರ’ ಸಿನಿಮಾ ತೂಯಿಜಿಂಡ ದೈವ ಶಾಪ ಕೊರ್ಪುಂಡು ಪನ್ದ್, ರಿಷಬ್ ಶೆಟ್ಟಿಡ ದೈವೊನು ತೂಯೆ ಪನ್ದ್ ಲೆಕ್ಕೇಸ್ ದೀವೊಂದಿತ್ತೆ, ಆ ವಿಡಿಯೋಲಾ ವೈರಲ್ ಆದಿತ್ತ್ಂಡ್. ಇತ್ತೆ ಈ ಮರ್ಲ್ಲೆನ್ ತೂದು ಬೆಸರ್ಡ್ ತುಳುಕೂಟ ರಿಷಬ್ ಶೆಟ್ಟಿಗ್ ಕೊಲ್ಪುಲೆಕ ಓಲೆ ಬರೆತ್ಂಡ್.