Last updated on October 16th, 2025 at 08:49 am
ಕುಡ್ಲ, ಅ. 15: ಪೇಂಟೆದ ಪಂಪ್ವೆಲ್ ಸರ್ಕಲ್ರ್ದ್ ಕಂಕನಾಡಿ ಬೈಪಾಸ್ ಮುಟ್ಟ ರೋಡ್ದ ಬೇಲೆ ಆವರೆಗುಂಡು. ಅಂಚಾದ್ 2026ತ ಏಪ್ರಿಲ್ 15 ಮುಟ್ಟ (7 ತಿಂಗೊಲು) ಗಾಡಿಲೆಗ್ ತಾದಿ ಪಗತ್ದ್ ತಾತ್ಕಾಲಿಕ ಅಧಿಸೂಚನೆ ಕೊರ್ತೆರ್.
ಪಂಪ್ವೆಲ್ ಸರ್ಕಲ್ರ್ದ್ ಕಂಕನಾಡಿ ಬೈಪಾಸ್ ಮುಟ್ಟ ಸಾದಿದ ಸುರುತ ಬೊಕ್ಕ ರಡ್ಡನೇ ನಿಲವುದ ಸಾದಿದ ಬೇಲೆ ನಡಪುನ ಪೊರ್ತುಡು ಟೂ-ವೇ ಸಾದಿದ ಒಂಜಿ ಬರಿನ್ ಕರಾವಳಿ ಜಂಕ್ಷನ್ರ್ದ್ ಪಂಪ್ವೆಲ್ ಮುಟ್ಟ ಗಾಡಿಲು ಪೋಯೆರ ಬೋಡಾದ್ ತಾತ್ಕಾಲಿಕವಾದ್ ವನ್-ವೇ ಸಾದಿ ಆದ್ ಘೋಷಣೆ ಮಲ್ತ್ದೆರ್.
ಅಂಚೆನೇ ಪಂಪ್ವೆಲ್ರ್ದ್ ಕಂಕನಾಡಿ ಓಲ್ಡ್ ರೋಡ್ – ಕಂಕನಾಡಿ ಜಂಕ್ಷನ್ ಸಾದಿನ್ ತಾತ್ಕಾಲಿಕವಾದ್ ವನ್-ವೇ ಆದ್ ಘೋಷಣೆ ಮಲ್ತ್ದೆರ್. ವನ್-ವೇ ದ ರಡ್ಡ್ ಮೆಯಿಟ್ಲಾ ಒವ್ವೇ ಗಾಡಿಲು ಉಂತುನೆನ್ ನಿಷೇಧ ಮಲ್ದೆರ್.
ಪಡೀಲ್ ಬೊಕ್ಕ ತೊಕ್ಕೊಟ್ಟು ದಂಚಿರ್ದ್ ಪಂಪ್ವೆಲ್ ಸರ್ಕಲ್ಗ್ ಡೆ ಆದ್ ಕರಾವಳಿ ಸರ್ಕಲ್ಗ್ ಪೋಪುನ ಮಾತಾ ಗಾಡಿಲು ಕಂಕನಾಡಿ ಓಲ್ಡ್ ರೋಡ್ಡೆ ಆದ್ ಕಂಕನಾಡಿ ಜಂಕ್ಷನ್ಗ್ ಬತ್ತ್ದ್ ಬಲಕ್ ತಿರ್ಗ್ದ್ ಕರಾವಳಿ ಸರ್ಕಲ್ದಂಚಿ ಪೋವೊಡು.
ಫಳ್ನೀರ್ ಸಾದಿರ್ದ್ ಬೊಕ್ಕ ವೆಲೆನ್ಸಿಯಾ ಸಾದಿರ್ದ್ ಪಂಪ್ವೆಲ್ ದಂಚಿ ಪೋಪುನ ಮಾತಾ ಗಾಡಿಲು ಕಂಕನಾಡಿ ಜಂಕ್ಷನ್ರ್ದ್ ಸೀದಾ ಕರಾವಳಿ ಜಂಕ್ಷನ್ಗ್ ಬತ್ತ್ದ್ ಬಲಕ್ ತಿರ್ಗ್ದ್ ಪಂಪ್ವೆಲ್ ಸರ್ಕಲ್ದಂಚಿ ಪೋವೊಡು ಪನ್ದ್ ನಗರ ಪೋಲಿಸ್ ಆಯುಕ್ತೆರ್ ಪ್ರಕಟನೆಡ್ ತೆರಿಪಾದೆರ್.