Last updated on October 16th, 2025 at 10:20 am
ತೊರ್ತ್ತಲ್, ಅ. 16 : ಇಲ್ಲ ಕೈತಲ್ ಅಂಗಡಿಗ್ ಪೋದಿತ್ತಿನ ಪೊಣ್ಣನ ಮಿತ್ತ್ ನಾಯಿಲು ದಾಳಿ ಮಲ್ತ್ದ್, ಬಾಲೆಗ್ ಗಾತಿದ ಗಡಿಕುಲಾತಿನ ನಡಕೆ ಬುಧವಾರ ಬಯ್ಯಡ್ ತೊರ್ತಲ್ ಕಾನ ಮೈಂದಗುರಿ ಟ್ ನಡತ್ದ್ಂಡ್.
ಮೈಂದಗುರಿ ನಿವಾಸಿ ಹೈದರ್ ಅಲಿ ಮೆರೆನ ಮಗಲ್ ರಿದಾ ಫಾತಿಮ (9) ಗಾತಿದ ಗಡಿಕುಲಾದ್ ಕುಡ್ಲದ ಪ್ರೈವೇಟ್ ಆಸ್ಪತ್ರೆಡ್ ಮರ್ದೊ ಮಲ್ತೊಂದುಲ್ಲೆರ್ ಪನ್ದ್ ತೆರಿದ್ ಬೈದ್ಂಡ್.
ರಿದಾ ಫಾತಿಮ ಬಯ್ಯದ ಪೊರ್ತುಡು ಇಲ್ಲದ ಕೈತಲ್ದ ಅಂಗಡಿಗ್ ಪೋವೊಂದಿತ್ತಲ್. ಈ ಪೊರ್ತುಡು ಒಲ್ಪರ್ದ ತುಚ್ಚಿಡೊಂದು ನಾಯಿಲು ಅಡೆಗ್ ಬತ್ತ್ದ್. ನಾಯಿಲೆನ್ ತೂದು ಪೋಡಿನ ಪೊಣ್ಣು ಇಲ್ಲಗ್ ಬಲ್ತೊಂದು ಪಿರಬನ್ನಗ ಕೈಟಿತ್ತಿನ ಕಾಸ್ ತಿರ್ತ್ ಬೂರ್ದ್ಂಡ್. ಅವೆನ್ ಪೆಜ್ಜುನಾತೆಟ್ ನಾಯಿಲು ಪೊಣ್ಣನ ಮಿತ್ತ್ ದಾಳಿ ಮಲ್ತ್ದ.
ದಾಳಿರ್ದಾವರ ಪೊಣ್ಣನ ಕೈ, ಕಾರ್ಗ್ ತುಚ್ಚಿನ ಗಾತಿದ ಗಡಿಕುಲಾತ ಪನ್ದ್ ತೆರಿದ್ ಬೈದ್ಂಡ್. ಪೊಣ್ಣನ ಬೊಬ್ಬೆ ಕೇನ್ದ್ ಅಡೆ ಬತ್ತಿನ ಸಾರ್ವಜನಿಕೆರ್ ನಾಯಿಲೆ ಬಾಯಿರ್ದ್ ಬಾಲೆನ್ ಬುಡ್ಪಾದ್ ತೊರ್ತಲ್ ಸಮುದಾಯ ಆರೋಗ್ಯ ಕೇಂದ್ರೊಗು ಲೆತೊಂದು ಪೋದು, ಪ್ರಾಥಮಿಕ ಆರೋಗ್ಯ ಕೇಂದ್ರೊಗು ದಾಕಲ್ತ್ದ್ ಬೊಕ್ಕ ಕುಡ್ಲದ ವೆನ್ಲಾಕ್ ಆಸ್ಪತ್ರೆಗ್ ಲೆತೊಂದು ಪೋತೆರ್. ಬೊಕ್ಕ ಅಲ್ಪರ್ದ್ ಪೇಂಟೆದ ಪ್ರೈವೇಟ್ ಆಸ್ಪತ್ರೆಗ್ ದಾಕಲ್ತ್ದ್ ಮರ್ದ್ ಮಲ್ತೊಂದುಲ್ಲೆರ್ ಪನ್ದ್ ತೆರಿದ್ ಬೈದ್ಂಡ್.