Last updated on October 26th, 2025 at 06:48 am
ಕುಡ್ಲ: ಬಲ್ಮಠ ನಿವಾಸಿ, ಪುಗರ್ತೆದ ಉದ್ಯಮಿ ಬೊಕ್ಕ ದ. ಕ. ಆಟೋಮೊಬೈಲ್ ಬೊಕ್ಕ ಟೈರ್ ಡೀಲರ್ಸ್ ಅಸೋಸಿಯೇಷನ್ದ ಅಧ್ಯಕ್ಷೆರಾಯಿನ ಕಸ್ತೂರಿ ಪ್ರಭಾಕರ್ ಪೈ (75) ಮೇರ್ ಕೋಡೆ ಸನಿಯಾರ (ಅ.25) ಬಯ್ಯ 7:00 ಗಂಟೆಗ್ ಒಂತೆ ಸಮೆರ್ದಿಂಚಿ ಉಸಾರ್ ತತ್ತ್ದ್ ಇತ್ತ್ದ್ ಕುಡ್ಲದ ಪ್ರೈವೇಟ್ ಆಸ್ಪತ್ರೆಡ್ ತೀರ್ದೆರ್. ಮೇರ್ ಬೊಡೆದಿ, ಅಪ್ಪೆ, ಮಗೆ ಬೊಕ್ಕ ಮಗಲೆನ್ ಅಗತ್ದೆರ್.
1950 ಅಕ್ಟೋಬರ್ 26 ತಾನಿ ಕುಡ್ಲಡ್, ಕಸ್ತೂರಿ ಮಂಗೇಶ ಪೈಕ್ಲೆನ ಮಗೆ ಆದ್ ಪುಟ್ಟಿನ ಮೇರ್ ಕೆನರಾ ಹೈಸ್ಕೂಲ್ (ಮೈನ್)ಡ್ ಓದ್ದ್ ಬೊಕ್ಕ, 1968-73 ಮುಟ್ಟ ಮಣಿಪಾಲ ಎಂಜಿನಿಯರಿಂಗ್ ಕಾಲೇಜ್ಡ್ (ಇತ್ತೆದ ಎಂಐಟಿ, ಮಣಿಪಾಲ) ಮೆಕ್ಯಾನಿಕಲ್ ಎಂಜಿನಿಯರಿಂಗ್ ಮಲ್ತ್ದ್, ಬೊಕ್ಕ ಅಮೆರಿಕದ ಟೆಕ್ಸಾಸ್ದ ಡಲ್ಲಾಸ್ಡ್ ಇಪ್ಪುನ ಸದರ್ನ್ ಮೆಥೋಡಿಸ್ಟ್ ವಿಶ್ವವಿದ್ಯಾಲಯೊರ್ದು ಎಂಬಿಎ ಪದವಿ ಗೆತೊಂದೆರ್.
ಭಾರತೊಗು ಪಿರ ಬತ್ತ್ದ್, ಆರ್ ತನ್ನ ಕುಟುಮೊದ ಉದ್ಯಮ ಆಯಿನ ಕಸ್ತೂರಿ ಸಮೂಹ ಸಂಸ್ಥೆಗ್ ಸೇರ್ದ್ ಅಲ್ಪ ಆರ್ ಫಿಶ್ ಮೀಲ್ ಬೊಕ್ಕ ಫಿಶ್ ಆಯಿಲ್ ಉತ್ಪಾದನಾ ವಿಭಾಗೊನ್ ತೂವೊಂದಿತ್ತೆರ್. ಇಂಚಿಪ ಆರ್ ಆಟೋಮೊಬೈಲ್ ಸ್ಪೇರ್ ಪಾರ್ಟ್ಸ್ ಬೊಕ್ಕ ಸಿಮೆಂಟ್ ಸೇಲ್ಸ್ದ ಕ್ವೆಸ್ಟ್ ಮಾರ್ಕೆಟಿಂಗ್ & ಸರ್ವೀಸಸ್ದ ಮುಖ್ಯಸ್ಥೆ ಆದಿತ್ತೆರ್. ಒಟ್ಟುಗು ಸಾರಿಗೆ ಬೊಕ್ಕ ರೆಡಿ ಮಿಕ್ಸ್ ಕಾಂಕ್ರೀಟ್ ಪಂಪಿಂಗ್ ವೈವಾಟ್ಡ್ಲಾ ಇತ್ತೆರ್. ಆರ್ ಬೆಂಕೆಮ್ ಕಾರ್ಪೊರೇಷನ್ ಬೊಕ್ಕ ಅಸ್ಪಾ ಲಾಜಿಸ್ಟಿಕ್ಸ್ ಪ್ರೈವೇಟ್ ಲಿಮಿಟೆಡ್ದ ಡೈರೆಕ್ಟರ್ಲಾ ಆದಿತ್ತೆರ್.
ಸಾಮಾಜಿಕವಾದ್ ಸಕ್ರಿಯೆರಾದಿತ್ತಿನ ಕಸ್ತೂರಿ ಪ್ರಭಾಕರ್ ಪೈ ಮೇರ್ ಪಾಕ ಸಮುದಾಯ ಬೊಕ್ಕ ವೃತ್ತಿಪರ ಸಂಸ್ಥೆಲೆನ ಒಟ್ಟುಗು ಮುಟ್ಟ ಸಂಬಂಧ ಇತ್ತಿನಾರ್. ಮೇರ್ 2017 ರ್ದ್ ದ. ಕ. ಆಟೋಮೊಬೈಲ್ ಬೊಕ್ಕ ಟೈರ್ ಡೀಲರ್ಸ್ ಅಸೋಸಿಯೇಷನ್ ಅಧ್ಯಕ್ಷೆರಾದಿತ್ತ್ದ್, ಕರಿನ ಅವಧಿಡ್ ಕಾರ್ಯದರ್ಶಿಯಾದ್ (1999-2013) ಬೊಕ್ಕ ಉಪಾಧ್ಯಕ್ಷೆರಾದ್ (2013-2017) ಇತ್ತೆರ್.
ಮೆರೆನ ಅಂತಿಮ ದರ್ಶನ, ಇನಿ ಐತಾರ, ಅಕ್ಟೋಬರ್ 26 ತಾನಿ ಬಲ್ಮಠ ಡಿಸಿ ಬಂಗ್ಲೆದ ಕೈತಲ್ದ ಆರೆನ ಇಲ್ಲ್, ‘ಪ್ರಕೃತಿ’ ಡ್ ಕಾಂಡೆ 9 ಗಂಟೆರ್ದ್ ನಡಪುಂಡು.