Last updated on October 8th, 2025 at 10:21 am
ಕುಡ್ಲ, ಅ. 08: 134 ದಿನೊರ್ದಿಂಚಿ ಸಾವು-ಬದ್ಕ್ದ ಪೋರ್ಮ್ಬಾಟೊಡು ಅಪೂರ್ವ ಭಟ್ ಕೋಡೆ, ಅಂಗಾರೆ ಕುಡ್ಲದ ಪ್ರೈವೇಟ್ ಆಸ್ಪತ್ರೆಡ್ ತೀರ್ದೆರ್. ಭೀಕರ ಎಡ್ತೆ ಅಪೂರ್ವ ಭಟ್ನ್ 134 ದಿನ ಮುಟ್ಟ ಕೋಮಾಗ್ ನೂಕ್ದಿತ್ತ್ಂಡ್. ಆರ್ ಉಸಾರಾವಡ್ ಪನ್ದ್ ಸಾರಗಟ್ಲೆ ಜನ ಪ್ರಾರ್ಥನೆ ಮಲ್ತೊಂದಿತ್ತೆರ್, ಆಂಡ ಕಡೆಕ್ಲಾ ಆರ್ ವಿಧಿತ ಗೊಬ್ಬುದ ಎದುರು ಸೋಪೊಡಾಂಡ್.
ನಾಲ್ ತಿಂಗೊಳು ದುಂಬು ಮಾಣಿ-ಮೈಸೂರು ರಾಷ್ಟ್ರೀಯ ಪೆರ್ಸಾದಿ ಮುರ ತ ಕೈತಲ್ ಪ್ರೈವೇಟ್ ಬಸ್ ಒಂಜಿ ಕಾರ್ಗ್ ಎಡ್ತ್ದಿತ್ತ್ಂಡ್. ಅಂಡೆಪುಣಿ ಈಶ್ವರ ಭಟ್ ಬೊಕ್ಕ ಆರೆನ ಮಗಲ್ ಅಪೂರ್ವ ಭಟ್(30) ಗ್ ಗಾತಿದ ಗಡಿಕುಲಾದಿತ್ತ. ಈಶ್ವರ ಭಟ್ ಬೊಕ್ಕ ಆರೆನ ಪುಲ್ಲಿ ಕಿಞ್ಞ ಕಿಞ್ಞ ಗಡಿಕುಲಾದ್ ಬಚಾವಾತೆರ್. ಗಾತಿದ ಗಡಿಕುಲಾದಿತ್ತಿನ ಈಶ್ವರ ಭಟ್ರೆನ ಮಗಲ್ ಅಪೂರ್ವಗ್ ಕುಡ್ಲದ ಆಸ್ಪತ್ರೆಡ್ ಮರ್ದ್ ನಡತೊಂದಿತ್ತ್ಂಡ್. ಮತಿ ಕಡಿದಿತ್ತಿನ ಅಪೂರ್ವಗ್ ಎಂಚೆಂಚಿನ ಮಲ್ತ್ಂಡಲಾ ಕುಡ ಮತಿ ಬತ್ತ್ದಿಜಿ.
ಅಪೂರ್ವನ ಕಂಡನೆ ಆಶಿಶ್ ಸಾರಡ್ಕ ಮೇರ್ ಬೊಡೆದಿನ ಮರ್ದ್ದ ಬಗೆಟ್ ಸಾಮಾಜಿಕ ಬಲೆತ್ತಾನೋಡು ಒಲವು ಪಟ್ಟೊಂದುಪ್ಪೆದೆರ್. ಬೆಂಗಳೂರ್ಡ್ ಆಶಿಶ್ ಬೊಕ್ಕ ಅಪೂರ್ವ ಬೇಲೆ ಮಲ್ತೊಂದಿತ್ತೆರ್. ಈ ಜೋಡಿಗ್ ಕೊಂಡಾಟೊದ ಒರ್ತಿ ಮಗಲ್ ಉಲ್ಲಲ್. ಬಸ್ ಎಡ್ತೆರ್ದಾವರ ಮೊಕ್ಲೆನ ಜೂವನೊನೇ ಅಡಿಮೇಲಾಂಡ್. ಕರಿನ ನಾಲ್ ತಿಂಗೊಲುರ್ದಿಂಚಿ ಅಪೂರ್ವ ಆಸ್ಪತ್ರೆಡ್ ಇತ್ತೆರ್. ಬೊಡೆದಿ ಉಸಾರಾವಡ್ ಪನ್ದ್ ಆಶಿಶ್ ಸೋಶಿಯಲ್ ಮೀಡಿಯಾದಲ್ಲಿ ಅಪ್ಪೆನ ಮೋಕೆಗ್ ಕಾತೊಂದುಪ್ಪುನ ಬಾಲೆಗ್ ಬೋಡಾದ್ ನಟ್ಟೊನುಲೆ ಪನ್ದ್ ನಿಚ್ಚೊಲಾ ಪೋಸ್ಟ್ ಪಟ್ಟೊಂದುಪ್ಪೆದೆರ್.
ಆಶಿಶ್ ಸಾರಡ್ಕ ಸೋಶಿಯಲ್ ಮೀಡಿಯಾ ಪೋಸ್ಟ್ ಮಲ್ತಿತ್ತ್ದ್, “134 ದಿನೊತ ಪ್ರಯಾಣ ಇನಿ ಬಯ್ಯ 6 ಗಂಟೆಗ್ ಮುಗೀಂಡ್.. ಅಪೂರ್ವ ಇತ್ತೆ ನಮ್ಮೊಟ್ಟುಗು ಇಜ್ಜಲ್! ಆಲ್ ನನ ನೆನ್ಪು ಮಾತ್ರ. ಪ್ರಾರ್ಥನೆ ಮಲ್ತಿನ ಮಾತೆರೆಗ್ಲಾ ಯಾನ್ ಚಿರಋಣಿ!” ಪನ್ದ್ ಬರೆತೆರ್.