Last updated on October 8th, 2025 at 08:40 am
ಕುಡ್ಲ, ಅ. 08: ನಗರೊದ ಪ್ರಮುಖ ಕಾಂಪ್ಲೆಕ್ಸ್ಡ್ ಇಪ್ಪುನ ಅಂಗಡಿದ ಮಿತ್ತ್ ಬರ್ಕೆ ಪೊಲೀಸೆರ್ ಒರರ್ದ್ ಒರಾನೆ ದಾಳಿ ಮಲ್ತ್ದ್, ಇ-ಸಿಗರೇಟ್ ಬೊಕ್ಕ ಬೇತೆ ಸೊತ್ತುಲು ಸೇರ್ದ್ 9.72 ಲಕ್ಷ ರೂಪಾಯಿ ಮೌಲ್ಯೊದ ಸೊತ್ತುಲೆನ್ ಅಕ್ಟೋಬರ್ 7ತಾನಿ ಜಪ್ತಿ ಮಲ್ತ್ದೆರ್.
ಲಾಲ್ಬಾಗ್ ಕೈತಲ್ದ ಅಂಗಡಿ ಒಂಜಿ ಒವ್ವೇ ಲೈಸೆನ್ಸ್ದಾಂತೆ ಇ-ಸಿಗರೇಟ್, ಹುಕ್ಕಾದ ಸೊತ್ತುಲು ಬೊಕ್ಕ ಭಾರತೀಯ ಅಂಚೆನೇ ವಿದೇಶಿ ಸಿಗರೇಟ್ಲೆನ್ ಕಾನೂನುಬಾಹಿರವಾದ್ ದೀವೊಂದು, ಮಾರೊಂದುಂಡು ಪನ್ಪಿ ಪತ್ತ ಒಲವು ಇತ್ತ್ದ್ ದಾಳಿ ಮಲ್ತ್ದೆರ್. ಈ ಸೊತ್ತುಲೆನ್ ಸಾರ್ವಜನಿಕೆರೆಗ್, ವಿಶೇಷವಾದ್ ಜವನೆರೆಗ್ ಸಪ್ಲೈ ಮಲ್ತೊಂದಿತ್ತೆರ್ ಪನ್ದ್ ಆರೋಪ ಉಂಡು.
ಬರ್ಕೆ ಪೊಲೀಸ್ ಸ್ಟೇಶನ್ದ ಇನ್ಸ್ಪೆಕ್ಟರ್ ಮೋಹನ್ ಕೊಟ್ಟಾರಿ ಮೆರೆನ ಮುತಾಲಿಕೆಡ್, ಸ್ಟೇಷನ್ ಪಿಎಸ್ಐ ಬೊಕ್ಕ ಬೇತೆ ಸಿಬ್ಬಂದಿಲೆನ ಒಟ್ಟುಗು ಸೋಮವಾರ ಬಯ್ಯಡ್, ಅಕ್ಟೋಬರ್ 6 ತಾನಿ ಈ ದಾಳಿ ನಡತ್ಂಡ್.
ದಾಳಿದ ಪೊರ್ತುಡು, ಪೊಲೀಸೆರ್ ಬೇತೆ ಬೇತೆ ಬ್ರ್ಯಾಂಡ್ಲೆನ 847 ಇ-ಸಿಗರೇಟ್ಲೆನ್ (4,43,125 ಮೌಲ್ಯ), 86 ಸಿಗರೇಟ್ ಪ್ಯಾಕ್ಲೆನ್ (5,09,120 ಮೌಲ್ಯ) ಬೊಕ್ಕ ಹುಕ್ಕಾದ ಸೊತ್ತುಲೆನ್ (20,500 ಅಂದಾಜು ಮೌಲ್ಯ) ಜಪ್ತಿ ಮಲ್ತ್ದೆರ್. ಒಟ್ಟು 9,72,745 ಮೌಲ್ಯೊದ ಸೊತ್ತುಲೆನ್ ವಶೊಕು ಗೆತೊಂದೆರ್.
ಅಂಗಡಿದ ದನಿ ಶಿವು ದೇಶಕೋಡಿ, ಕುದ್ರೋಳಿ ನಿವಾಸಿ ಇಬ್ರಾಹಿಂ ಇರ್ಷಾದ್ (33) ಬೊಕ್ಕ ಬಂಟ್ವಾಳ ನಿವಾಸಿ ಸಂತೋಷ್ (32) ಮೊಕ್ಲೆನ ಮಿತ್ತ್ ಬರ್ಕೆ ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್. ಆರೋಪಿಲೆನ ಮಿತ್ತ್ ಬೇತೆ ಬೇತೆ ಕಾಯ್ದೆಲೆನ ಅಡಿಟ್ ಪ್ರಕರಣ ದಾಕಲ್ತ್ದ್ ಜಡ್ತೆ ಮಲ್ತೊಂದುಲ್ಲೆರ್.