Last updated on October 7th, 2025 at 06:49 pm
ಕುಡ್ಲ, ಅ. 07: ದೈವಾರಾಧನೆಗ್ ಮುಲ್ಪದ ಸಂಸ್ಕೃತಿದ ಗಂಧಗಾಳಿ ತೆರಿಯಂದಿನಕುಲು ದುಂಬುರ್ದೇ ಮಕ್ಕರ್ ಮಲ್ಪುನ ನಡತೊಂದುಂಡು, ಆಂಡ ಕಾಂತಾರ ಪಿಚ್ಚರ್ ಬತ್ತಿ ಬೊಕ್ಕ ಉಂದು ಅಂಕೆ ತತ್ತ್ದ್ ಪೋದಿತ್ತ್ಂಡ್. ಇತ್ತೆ ಕಾಂತಾರಾ ಚಾಪ್ಟರ್ 1 ಬುಡುಗಡೆ ಆಯಿ ಬೊಕ್ಕ ಸಾದಿಯೆ ಪೋಪಿನ ಬರ್ಪಿನಾಯನ ಮಿತ್ತ್ಲಾ ಬರ್ಯೆರೆ ಸುರು ಆತ್ಂಡ್, ಸಾದಿ ಸಾದಿಡ್ ನೇಮ ತೂಪುಲೆಕ ಆತ್ಂಡ್.
ಈ ಮಾತಾ ಕೋಂಗಿಲೆನ ನಡುಟು ನಡೀರ್ ಸುಮಾರ್ 1 ಗಂಟೆದಾತ್ ಪೊರ್ತುಗು ಕಾಂತಾರ ಪಿಚ್ಚರ್ನ್ ಮಲ್ದಿನ ಹೊಂಬಾಳೆ ಫಿಲ್ಮ್ಸ್ ದ X (ಟ್ವಿಟ್ಟರ್) ಅಕೌಂಟ್ಡ್ ಬಾರೀ ಉದ್ದ ಉದ್ದ ಕ್ಯಾಪ್ಷನ್ ಬರೆದ್, ‘ದೈವಾರಾಧನೆ ತುಳುನಾಡ ನಂಬಿಕೆದ ಪ್ರತೀಕ, ಉಂದು ತುಳುವೆರೆನ ಅಸ್ಮಿತೆ. ದೈವೊಲೆಗ್ ಚ್ಯುತಿ ಬರಂದಿಲೆಕ, ದೈವೊಲೆನ ಮೈಮೆನ್ ಭಕ್ತಿಪೂರ್ವಕವಾದ್ ಸಿನಿಮಾಡ್ ತೋಜಾದ. ತುಳು ಮಣ್ಣ್ದ ಮಹತ್ವ ಬೊಕ್ಕ ಕಟ್ಟ್ ಕಟ್ಲೆಲೆನ್ ಲೋಕೊರ್ಮೆ ಪಟ್ಯೆರ ಎಂಕ್ಲೆನ ಕೈರ್ದಾಪಿನೆನ್ ಮಲ್ತ್ದ. ಆಂಡ ಕೆಲ ಜನೊಕುಲು ಪಿಚ್ಚರ್ಡ್ ಬರ್ಪಿನ ಪಾತ್ರೊಲೆನ ಅನುಕರಣೆ ಮಲ್ತೊಂದು, ತತ್ತ್ದ್ ನಡತೊಂದುಪ್ಪುನೆನ್ ತೂತ. ಉಂದು ಎಂಕ್ಲೆನ ನಂಬೊಲಿಗೆಗ್ ಮಲ್ಪುನ ಅಪಚಾರ, ಮಾಪು ಮಲ್ಪೆರಾವಂದಿ ಅಪರಾಧ, ಇಂಚ ಮಲ್ತ್ಂಡ ಎಂಕುಲು ತಡೆತೊನುಜ. ಅಂಚಾದ್ ಸಾರ್ವಜನಿಕ ಜಾಗೆಲೆಡ್, ಸಭೆ, ಸಮಾರಂಭೊಲೆಡ್ ಏರಾಂಡಲಾ ದೈವೋದ ಏಸ ಪಾಡೊಂದು ನಲ್ತ್ಂಡ ಅಕ್ಲೆನ ಮಿತ್ತ್ ಬೋಡಾಪಿನ ಕಾನೂನು ಕ್ರಮ ಗೆತೊನುವ’ ಪನ್ದ್ ಪೋಸ್ಟರ್ಡ್ ಬರೆದ್, ತಿರ್ತ್ ಹೊಂಬಾಳೆ ಫಿಲ್ಮ್ಸ್ ಬೊಕ್ಕ ರಿಷಬ್ ಶೆಟ್ಟಿನ ಪುದರ್ ಪಾಡ್ದ್ ಪೋಸ್ಟ್ ಮಲ್ತಿತ್ತೆರ್. ಕನ್ನಡ ಬೊಕ್ಕ ಇಂಗ್ಲಿಷ್ಡ್ ಈ ಪೋಸ್ಟರ್ ಶೇರ್ ಆದಿತ್ತ್ಂಡ್.
ಆಂಡ ಇನಿ ಕಾಂಡೆ ತೂನಗ ಈ ಪೋಸ್ಟ್ ಡಿಲೀಟ್ ಆತ್ಂಡ್. ಉಂದೆನ್ ಡಿಲೀಟ್ ಮಲ್ಪೆರ ಏರ್ನಲಾ ಕಾಯೆಸ್ ಇತ್ತ್ಂಡಾ? ತುಳು ಮಣ್ಣ್ ಪನ್ದ್ ಬರೆತಿನ ಏರ್ನಲಾ ಕಣ್ಣ್ ಕೊಲ್ತ್ಂಡಾ?ಪನ್ದ್ ಇತ್ತೆ ತುಳುವೆರ್ ಪ್ರಶ್ನೆ ಮಲ್ತೊಂದುಲ್ಲೆರ್.
ಕೆಲ ಜನ, ನಿಕುಲು ಪಿಚ್ಚರ್ಡ್ ದೈವೊದ ಏಸ ಪಾಡೊಂದು ನಲಿಪೊಲಿಂದಾಂಡ, ಬೇತೆಕ್ಲೆಡ ಏಸ ಪಾಡೊರ್ಚಿ ಪನ್ದ್ ವಾ ನೈತಿಕತೆಡ್ ಪ್ರಶ್ನೆ ಮಲ್ಪುವರ್ ಪನ್ದ್ಲಾ ಕೇನೊಂದುಲ್ಲೆರ್.
ನಮ ನಂಬಿ ಸತ್ಯೊಲು, ಪುದರ್ ದೆಪ್ಪೆರೆ ಪೋಡ್ಯೆದಿನ ಸತ್ಯೊಲೆನ್ ಇನಿಕಾನಗ ಈ ಮಟ್ಟ್ಡ್ ಕೋಂಗಿ ಕಟ್ಟಾವೊಂದುಲ್ಲೆರ್ ಪನ್ಡ ಅವೆಕ್ ಕಾಂತಾರಾ ನೇ ನೆವನ ಪನ್ದ್ ಜನ ಪಾತೆರೊಂದುಲ್ಲೆರ್.
ಅಂಚೆನೇ ವಾ ಕಾನೂನು ಕ್ರಮ ಗೆತೊನುವೆರ್? ಈ ಕಾನೂನು ಕ್ರಮ ದೈವೊದ ಏಸ ಪಾಡ್ದಿನ ಸ್ವರಾಜ್ ಶೆಟ್ಟಿ, ರಿಷಬ್ ಶೆಟ್ಟಿನ ಮಿತ್ತ್ ದಾಯೆ ದೆತೊನರೆ ಬಲ್ಲಿ ಪನ್ಪಿ ಚರ್ಚೆಲಾ ಈ ಪೋಸ್ಟರ್ದ ಬೆರಿಟೇ ಸಾಮಾಜಿಕ ಬಲೆತ್ತಾನೊಡು ಲಕ್ಕೊಂದುಂಡು.
ದೈವಾರಾಧನೆಗ್ ಈತ್ ಮಾತಾ ಅವೊಂದುಪ್ಪುನಗ ದಾನೆ ಮನಿತೊಂದಿಜ್ಜರ್ ಪನ್ದ್ ಒರ್ಮೆಲಾ ಕೇನರೆ ಪತ್ತ್ನಗ, ಇನಿ ಬಯ್ಯಡ್ ಕುಡ ಪೊಸತೊಂಜಿ ಪೋಸ್ಟರ್ನ್ ಹೊಂಬಾಳೆ ಫಿಲ್ಮ್ಸ್ ಪಟ್ಟೊಂದೆರ್.
https://www.facebook.com/share/p/1BYH3cXGT9/
