Last updated on November 29th, 2025 at 12:27 pm
ಕುಡ್ಲ, ನ, 29: ಅಪ್ಪೆ ಮಗಲ್ ಸಾರ್ವಜನಿಕವಾದ್ ಲಡಯಿ ಮಲ್ತೊಂದು ಆಕೊಂದಿನ ವಿಡಿಯೊ ಸಾಮಾಜಿಕ ಬಲೆತ್ತಾನೊಡು ವೈರಲ್ ಆತ್ಂಡ್.
ಮೂಡುಶೆಡ್ಡೆ ಗ್ರಾ.ಪಂ. ಡ್ ನಡತ್ದ್ಂಡ್ ಪನೊಂದುಪ್ಪುನ ಈ ನಡಕೆದ ವಿಡಿಯೊ ಸಾಮಾಜಿಕ ಬಲೆತ್ತಾನೊಡು ತಿರ್ಗೊಂದಿತ್ತ್ದ್, ತೂಯಿನಕುಲು ಆಕ್ರೋಶ ತೂಪಾವೊಂದುಲ್ಲೆರ್. ಮೂಡುಶೆಡ್ಡೆದ ಶಿವನಗರ ಪನ್ಪಿನಲ್ಪ ಅಪ್ಪೆ ಮಗಲ್ ಇತ್ತ್ದ್, ಮೊಕಲೆನ ನಡುಟು ಅಪಗಪಗ ಲಡಯಿ ಆಪೆದ್ಂಡ್ಗೆ. ಈ ಬಗೆಟ್ ಅಪ್ಪೆ ಕಾವೂರು ಸ್ಟೇಶನ್ಡ್ ಪೋದು ಪನೊಂದುಪ್ಪೆದೆರ್ ಪನ್ದ್ ತೆರಿದ್ ಬೈದ್ಂಡ್. ಪೊಲೀಸೆರ್ ಅಪ್ಪೆ ಮಗಲೆಗ್ ಬುದ್ದಿ ಪಾತೆರ ಪನ್ಡ್ದ್ ಕಡಪುಡೊಂದಿತ್ತೆರ್ಗೆ.
ಇಂಚಿಪ ಅಪ್ಪೆ ಮೂಡುಶೆಡ್ಡೆ ಗ್ರಾ.ಪಂ.ಗ್ ಪೋದು ಮಗಲೆನ ವಿರುದ್ಧ ದೂರು ಪನೊಂದಿತ್ತೆರ್ಗೆ. ಮೂಜಿ ದಿನೊಕು ದುಂಬು ಅಪ್ಪೆ ಗ್ರಾ.ಪಂ. ಗ್ ಪೋದು ದೂರು ಕೊರ್ನಗ ಮಗಲ್ ಅಪ್ಪೆನ್ ನೂಕುದಲ್. ಅಪ್ಪೆಲಾ ಮಗಲೆಗ್ ತಿರ್ಗಾದ್ ರಡ್ಡ್ ಕೊರ್ನ್ಡಲಾ ಪಿಸ್ರ್ಡ್ ಮಗಲ್ ಜೋಡುಡು ಅಪ್ಪೆನ ಮೋನೆಗ್ ಅಮಾನವೀಯವಾದ್ ಹಲ್ಲೆ ಮಲ್ದಿನ ವೀಡಿಯೋಡು ತೋಜಿದ್ ಬೈದ್ಂಡ್. ಉಂದೆನ್ ಗ್ರಾ.ಪಂ. ಕಚೇರಿಡ್ ಇತ್ತಿನಕುಲು ವೀಡಿಯೋ ಮಲ್ತಿತ್ತ್ದ್, ಅವು ಇತ್ತೆ ಸಾಮಾಜಿಕ ಬಲೆತ್ತಾನೊಡು ತಿರ್ಗೊಂದುಂಡು. ಮಗಲೆನ ಅಮಾನವೀಯ ಬೇಲೆಗ್ ಸಾಮಾಜಿಕ ಬಲೆತ್ತಾನೊಡು ಆಕ್ರೋಶ ತೋಜಿದ್ ಬರೊಂದುಂಡು.
ಮಗಲ್ ಪ್ರಾಯೊದ ಅಪ್ಪೆಗ್ ಆಕೊಂದಿತ್ತ್ಂಡಲಾ ಜನ ತೂವೊಂದು ಉಂತುದಿತ್ತೆರ್. ಉಂದುಲಾ ಬಾರಿ ಆಕ್ರೋಶಗ್ ನೆವನ ಆತ್ಂಡ್. ಪ್ರಕರಣೊದ ಬಗೆಟ್ ಒವ್ವೇ ದೂರು ದಾಕಲಾತಿಜಿ.