Last updated on November 16th, 2025 at 07:53 am
ಬೆಂಗಳೂರು: ಕೆಎಂಎಫ್ ‘ನಂದಿನಿ’ ಬ್ರಾಂಡ್ ಪುದರ್ಡ್ ಕಲ್ವಮಾಲ್ ನೆಯಿ ಮಾರೊಂದಿತ್ತಿನ ನಾಲ್ವೆರೆನ್ ಕೇಂದ್ರ ಅಪರಾಧ ವಿಭಾಗ (ಸಿಸಿಬಿ)ದ ಪೊಲೀಸೆರ್ ಪತ್ತ್ದೆರ್.
ನಂದಿನಿ ಉತ್ಪನ್ನೊಲೆನ ಅಧಿಕೃತ ಮಾರಾಟಗಾರೆ ಚಾಮರಾಜಪೇಟೆದ ಮಹೇಂದ್ರೆ (50) ಬೊಕ್ಕ ಆಯನ ಮಗೆ ದೀಪಕ್ (27) ಬೊಕ್ಕ ತಮಿಳುನಾಡು ಮೂಲೊದ ಮುನಿರಾಜು (40) ಬೊಕ್ಕ ಅಭಿಅರಸು (37) ಕೈದಾತಿನಕುಲು. ಆರೋಪಿಲೆನ ಕೈರ್ದ್ 1.26 ಕೋಟಿ ರೂ. ಮೌಲ್ಯೊದ 8136 ಲೀಟರ್ ನಂದಿನಿ ಬ್ರಾಂಡ್ದ ಕಲ್ವಮಾಲ್ ಬೆರಕೆ ನೆಯಿ ಬೊಕ್ಕ 4 ಗಾಡಿಲು, ಕಲ್ವಬೆರಕೆ ನೆಯಿ ಮಲ್ಪೆರೆ ಗಲಸೊಂದಿತ್ತಿನ ಯಂತ್ರೊಲು, ತಾರಾಯಿದೆಣ್ಣೆ ಬೊಕ್ಕ ಪಾಮ್ ಆಯಿಲ್ ನ್ ವಶೊಕು ಗೆತೊಂದೆರ್. ನಂದಿನಿ ನೆಯಿಕ್ ಇಪ್ಪುನ ಡಿಮ್ಯಾಂಡ್ನ್ ಗಲಸೊಂದು ಕಲ್ವಮಾಲ್ ಮಾರ್ದ್ ಕಾಸ್ ಮಲ್ಪರೆ ಪಿದಡಿನಕುಲು, ತಮಿಳುನಾಡ್ಡ್ ಬೆರಕೆ ನೆಯಿ ಮಲ್ತ್ದ್ ಪೇಂಟೆಡ್ ಮಾರೊಂದಿತ್ತೆರ್ ಪನ್ದ್ ಸಿಸಿಬಿ ಪೊಲೀಸೆರ್ ಒಲವು ಕೊರ್ತೆರ್.
ಆರೋಪಿಲೆಡ್ ಮಹೇಂದ್ರೆ ಪನ್ಪಿನಾಯೆ ಲೈಸೆನ್ಸ್ ಗೆತೊಂದು ನಂದಿನಿ ಉತ್ಪನ್ನೊಲೆನ ಅಧಿಕೃತ ಮಾರಾಟಗಾರೆ ಆದುಲ್ಲೆ. ಉಂಬ್ಯನ ಮಗೆ ದೀಪಕ್ ಲಾ ಉಂದೇ ವೈವಾಟ್ ಮಲ್ತೊಂದುಲ್ಲೆ. ಮುನಿರಾಜು ಬೊಕ್ಕ ಅಭಿಅರಸು ಕಲ್ವಮಾಲ್ ನೆಯಿ ಮಲ್ತ್ದ್ ಬೆಂಗಳೂರ್ಗ್ ಸಪ್ಲೈ ಮಲ್ತೊಂದಿತ್ತೆರ್. ಇಂಚಿಪ ಮಹೇಂದ್ರನ ವೈವಾಟ್ಡ್ ಒಂತೆ ಎಚ್ಚಿಕಮ್ಮಿ ತೋಜಿದ್ ಬತ್ತಿತ್ತ್ಂಡ್. ಅಂಚಾದ್ ಕೆಎಂಎಫ್ದ ಜಾಗೃತ ದಳೊದ ಅಧಿಕಾರಿಲು ಆಂತರಿಕ ಜಡ್ತೆ ಮಲ್ಪುನಗ 1 ವರ್ಸೊರ್ದಿಂಚಿ ಅಕ್ರಮ ನಡತೊಂದುಪ್ಪುನ ಬೊಲ್ಪುಗು ಬೈದ್ಂಡ್ ಪನ್ದ್ ಪೊಲೀಸೆರ್ ತೆರಿಪಾದೆರ್.
ಬೊಕ್ಕ ಸಿಸಿಬಿ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದಿತ್ತ್ದ್, ನ.14ತಾನಿ ಮಹೇಂದ್ರನ ಚಾಮರಾಜಪೇಟೆದ ನಂಜಾಂಬ ಅಗ್ರಹಾರಡ್ ಇಪ್ಪುನ ಕೃಷ್ಣ ಎಂಟರ್ ಪ್ರೈಸಸ್ ಪನ್ಪಿ ಗೋಡೌನ್ ಬೊಕ್ಕ ಅಕ್ಲೆನ ಗೂಡ್ಸ್ ಸಪ್ಲೈ ಗಾಡಿಲೆನ ಮಿತ್ತ್ ಸಿಸಿಬಿ ಪೊಲೀಸೆರ್ ಬೊಕ್ಕ ಕೆಎಂಎಫ್ ಜಾಗೃತ ದಳ ಅಧಿಕಾರಿಲು ಒಟ್ಟುಗು ದಾಳಿ ಮಲ್ತಿತ್ತೆರ್. ಈ ಪೊರ್ತುಡು ತಮಿಳುನಾಡ್ರ್ದ್ ಕಲ್ವಮಾಲ್ ನೆಯಿನ್ ನಂದಿನಿ ಬ್ರಾಂಡ್ ಸ್ಯಾಚೆಟ್ಲೆಗ್ ಬೊಕ್ಕ ಪ್ಲಾಸ್ಟಿಕ್ ಬಾಟಲಿಲೆಗ್ ದಿಂಜಾದ್ ಮಹೇಂದ್ರನ ಗೋಡೌನ್ಗ್ ಕನಪುನ ತಿಕ್ಕ್ದ್ ಬೂರ್ದ್ಂಡ್ ಪನ್ದ್ ಪೊಲೀಸೆರ್ ಒಲವು ಕೊರ್ತೆರ್.