Last updated on November 28th, 2025 at 10:36 am
ಉಳ್ಳಾಲ, ನ. 28: ತೊಕ್ಕೊಟ್ಟುದ ಫೈನಾನ್ಸ್ ಒಂಜೆಟ್ ಡೂಪ್ಲಿಕೇಟ್ ಬಂಗಾರ್ ಅಡವು ದೀದ್ ಲಕ್ಷಗಟ್ಲೆ ರೂಪಾಯಿ ದಗೆ ಮಲ್ದಿನ ಗ್ಯಾಂಗ್ದ ಆಜಿ ಜನ ಆರೋಪಿಲೆನ್ ಉಳ್ಳಾಲ ಪೊಲೀಸೆರ್ ಕೈದ್ ಮಲ್ತ್ದೆರ್. ಈ ಪ್ರಕರಣೊಡು ಒರಿ ಆರೋಪಿ ಮಾತ್ರ ನನಲಾ ದೆಂಗ್ತಪ್ಪಾದುಲ್ಲೆ.
ಕೈದಾತಿನಕ್ಲೆನ್ ಮಹಾರಾಷ್ಟ್ರ ಮೂಲೊದ ವಿಕ್ರಮ್ ಅಮೃತ್ ಲಾಲ್ ಬಫ್ನ (48), ಹರೇಕಳದ ಮಹಮ್ಮದ್ ಇಸ್ಮಾಯಿಲ್ (35), ಮಹಮ್ಮದ್ ಮಿಸ್ಬಾ (30), ಸುರತ್ಕಲ್ ಕಾಟಿಪಳ್ಳದ ಉಮರ್ ಫಾರೂಕ್ (52), ಉಳ್ಳಾಲ ಮೇಲಂಗಡಿದ ಇಮ್ತಿಯಾಝ್ (29), ಬೊಕ್ಕ ಮಂಚಿಲದ ಝಹೀಮ್ ಅಹ್ಮದ್ (20) ಪನ್ದ್ ಗುರ್ತ ಪತ್ತ್ದೆರ್. ಈ ಗ್ಯಾಂಗ್ದ ಕುಡೊರಿ, ಪೆಜಮಾಡಿದ ನೌಫಾಲ್ ಪನ್ಪಿನಾಯೆ ದೆಂಗ್ತಪ್ಪಾದೆ.
ತೊಕ್ಕೊಟ್ಟು ಕೇಂದ್ರ ಭಾಗೊದ ಕೊಣಾಜೆ ವಿವಿ ಸಾದಿದ ದ್ವಾರಕ ಕಾಂಪ್ಲೆಕ್ಸ್ ಡ್, ಗುರು ರಾಘವೇಂದ್ರ ಫೈನಾನ್ಸ್ & ಇನ್ವೆಸ್ಟ್ ಮೆಂಟ್ ಕಚೇರಿ ಇತ್ತ್ದ್ ಕರಿನ 25 ವರ್ಸೊರ್ದಿಂಚಿ ಫೈನಾನ್ಸ್ ವೈವಾಟ್ ಮಲ್ತೊಂದುಪ್ಪುನ ದಿನೇಶ್ ರೈ ಕಳ್ಳಿಗೆ ಪನ್ಪಿನಾರೆಗ್ ದಗೆ ಆದಿತ್ತ್ದ್ ಉಳ್ಳಾಲ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದಿತ್ತೆರ್.
ನವೆಂಬರ್ 22ತ ಸನಿಯಾರ ಬಯ್ಯ ಸುಮಾರ್ 5 ಗಂಟೆಗ್ ದಿನೇಶ್ ರೈ ಮೆರೆನ ಫೈನಾನ್ಸ್ ಗ್ ಬತ್ತಿನ ಪೆಜಮಾಡಿ ನಿವಾಸಿ ನೌಫಾಲ್ ಬೊಕ್ಕ ಉಳ್ಳಾಲ ಮಂಚಿಲದ ನಿವಾಸಿ ಝಹೀಮ್ ಅಹ್ಮದ್ ಮೊಕುಲು 41 ಗ್ರಾಂ ತೂಕೊದ ರಡ್ಡ್ ಚೈನ್ ಲೆನ್ ಕೊರ್ದು ಕಡ ಕೊರ್ಯೆರ ಪನ್ತೆರ್. ಫೈನಾನ್ಸ್ ಕಚೇರಿಡ್ ಇತ್ತಿನ ದನಿ ದಿನೇಶ್ ರೈ ಬೊಕ್ಕ ಸಿಬ್ಬಂದಿ ನಿಕೇಶ್ ಪರಿಶೀಲನೆ ಮಲ್ಪುನಗ ಚೈನ್ದ ಕೊಂಡಿಡ್ ಇತ್ತಿನ ಬಂಗಾರ್ದ ಪರಿಶುದ್ಧತೆದ 916 ಸಂಕೇತ ಇತ್ತಿನೆನ್ ತೂದು ಉರ್ದುನ ಕಲ್ಲ್ಡ್ ಚೆಕ್ ಮಲ್ಪುನಗ ಬಂಗಾರ್ ಪನ್ದ್ ತೋಜಿದ್ ಬೈದ್ಂಡ್. ಫೈನಾನ್ಸ್ದ ದನಿ ಝಹೀಮ್ ಅಹ್ಮದ್ನ ಪುದರ್ಡ್ ಬಂಗಾರ್ ಅಡವು ದೆತೊಂದು 3 ಲಕ್ಷದ 55 ಸಾರ ರೂಪಾಯಿ ಕಡ ಕೊರ್ತೆರ್.
ನವೆಂಬರ್ 24 ತಾನಿ ಬಯ್ಯ 5 ಗಂಟೆಗ್ ಇಮ್ತಿಯಾಝ್ ಪನ್ಪಿನಾಯೆ 55 ಗ್ರಾಂ ತೂಕೊದ ರಡ್ಡ್ ಚೈನ್ ಬೊಕ್ಕ ಒಂಜಿ ಬ್ರೇಸ್ಲೆಟ್ ಅಡವು ದೀದ್ ರೂ. 4,80,000 ಕಡ ಕೊರ್ಯೆರ ಕೇನ್ದೆ. ಉಂದೆತ ಮಿತ್ತ್ಲಾ 916 ಸಂಕೇತ ಇತ್ತ್ದ್ ಉರ್ದುದ್ ತೂನಗ ಬಂಗಾರ್ ಪನ್ದೇ ತೋದಿದ್ ಬೈದ್ಂಡ್. ಬಂಗಾರ್ ಒಲ್ಪರ್ದ್ ದೆತೊಂದಿನ ಪನ್ದ್ ಕೇನ್ನಗ, ಆರೋಪಿ ದುಬೈ ಬಂಗಾರ್ ಪನ್ದ್ ಪನ್ದಿತ್ತೆಗೆ.
ಇಮ್ತಿಯಾಝ್ನ ಪಾತೆರೊದ ಮಿತ್ತ್ ದಿನೇಶ್ ರೈ ಮೆರೆಗ್ ಡೌಟ್ ಬತ್ತ್ದ್, ಇಮ್ತಿಯಾಝ್ ಬೊಕ್ಕ ದುಂಬು ಝಹೀಮ್ ಅಹ್ಮದ್ ಅಡವು ದೀತಿನ ಬಂಗಾರ್ದ ಪರಿಶುದ್ಧತೆ ತೆರಿಯೊನೆರ ಕುಡ್ಲಡ್ ಬಂಗಾರ್ದ ಬೇಲೆ ಮಲ್ಪುನ ದೋಸ್ತಿ ಉದಯ್ ಆಚಾರ್ಯ ಮೆರೆಡ ಪರೀಕ್ಷೆಗ್ ಕೊರ್ತೆರ್. ಪರೀಕ್ಷೆದ ಪೊರ್ತುಡು, ಬಂಗಾರ್ನ್ ಆಸಿಡ್ಡ್ ಮುರ್ಕಾದ್ ಬೆಚ್ಚ ಮಲ್ಪುನಗ ನೊರೆ ಬತ್ತಿತ್ತ್ದ್, ಅವು ಡೂಪ್ಲಿಕೇಟ್ ಬಂಗಾರ್ ಪನ್ದ್ ಪತ್ತ ಆತ್ಂಡ್. ದಿನೇಶ್ ರೈ ಅಪಗನೇ ಉಳ್ಳಾಲ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್. ಪೊಲೀಸೆರ್ ಸುರುಕ್ ಇಮ್ತಿಯಾಝ್ನ್ ಕೈದ್ ಮಲ್ತ್ದ್, ಆಯನ ಒಲವುದ ಆಧಾರೊಡು ಒರಿನ ಆರೋಪಿಲೆನ್ ಕೈದ್ ಮಲ್ತ್ದೆರ್. ಕಿಂಗ್ಪಿನ್ ಮಹಮ್ಮದ್ ಇಸ್ಮಾಯಿಲ್, ಮಹಾರಾಷ್ಟ್ರ ಮೂಲೊದ ವಿಕ್ರಮ್ನ ಕೈರ್ದ್ ಕಮ್ಮಿ ಕ್ಯಾರೆಟ್ದ ಡೂಪ್ಲಿಕೇಟ್ ಬಂಗಾರ್ ತರ್ಪಾದ್, ತನ್ನ ದೋಸ್ತಿಲೆ ಮುಕೇನ ಅವೆನ್ ಫೈನಾನ್ಸ್ಲೆಡ್ ಅಡವು ದೀದ್ ದಗೆ ಮಲ್ತೊಂದಿತ್ತೆ ಪನ್ದ್ ತೆರಿದ್ ಬೈದ್ಂಡ್.
ಪೊಲೀಸ್ ಜಡ್ತೆ ಮಲ್ತ್ದ್ ಕೈದಾತಿನ ಆರೋಪಿಲೆರ್ದ್ ಆಜಿ ಮೊಬೈಲ್ ಫೋನ್ಲು, 47,000 ರೂಪಾಯಿ ಪಣವು ಬೊಕ್ಕ 9 ಕ್ಯಾರೆಟ್ದ 141 ಗ್ರಾಂ ಡೂಪ್ಲಿಕೇಟ್ ಬಂಗಾರ್ನ್ ವಶೊಕು ಗೆತೊಂದೆರ್. ಆರೋಪಿಲು ಬೇತೆ ಸಂಸ್ಥೆಲೆಗ್ಲಾ ದಗೆ ಮಲ್ದಿನ ಸಾಧ್ಯತೆ ಇತ್ತ್ದ್, ಉಳ್ಳಾಲ ಪೊಲೀಸೆರ್ ಈ ಬಗೆಟ್ ಜಡ್ತೆ ಮಲ್ತೊಂದುಲ್ಲೆರ್.