Last updated on November 21st, 2025 at 11:06 am
ನ.21: ನೇಮದ ಕಲಕ್ ಪೋದು ನಮ ನಂಬಿ ಸತ್ಯೊಲೆನ ನೇಮ ತೂದು ಭಕ್ತಿ-ಪೋಡಿಗೆಡ್ ಪತ್ತ್ ಬಿರೆಲೊಪ್ಪ ಗೋಡ್ಯಾದ್, ತರೆತಗ್ಗಾದ್ ಈಯೇ ಕಾಪೊಡು ಪನ್ದ್ ನಟ್ಟೊಂದಿತ್ತಿನ ತುಳುವೆರೆಗ್ ಇತ್ತೆ ನೇಮನಡಾವಳಿಲೆನ್ ತೂಯೆರ ದುಂಬುದ ಲೆಕ, ಎಡ್ಡೆ ಕುಂಟು ತುತ್ತೊಂದು, ಪೊರ್ತು ಕಂತಿ ಬೊಕ್ಕ ಕತ್ತಲೆ ತಾದಿಡೇ ದೂರ ದೂರ ಪೋವೊಡೂಂದು ಇಜ್ಜಿ. ಇಲ್ಲಡೇ ಶಾರ್ಟ್ಸ್, ನೈಟಿ ಪಾಡೊಂದು, ಕಾರ ಮಿತ್ತ್ ಕಾರ್ ಪಾಡ್ದ್ ಇಲ್ಲದ ಟಿವಿದ ಎದುರು ಕುಲ್ಲುಂಡ ಯಾರು, ತುಳುವ ಮಣ್ಣ್ದ ಸತ್ಯೊಲೆನ ಗಂಧಗಾಳಿ ದಾಂತಿನ ಬಚ್ಚಾಲಿಲು ಮಾತಾ ಇತ್ತೆ ಮನೋರಂಜನೆಗ್ ಬೋಡಾದ್ ನೇಮ ಕಟ್ಟ್ದ್, ಅವೆಟ್ ತನ್ಕುಲೆ ಪಿಚ್ಚರ್, ಸೀರಿಯಲ್ಲೆನ್ ಗೆಂದಾದ್, ಕಾಸ್ ಮಲ್ಪೆರೆ ಪಿದಡ್ದ. ಉಡಲ್ ಉರ್ಕುದ್ ಬರ್ಪುಂಡು ಇಂಚ ಬರೆನಗ…ಆಂಡ ದಾದ ಮಲ್ಪುನು…ನಡತೊಂದುಪ್ಪಿ ಅಧರ್ಮ ಅನ್ಯಾಯೊನು ತುಳುವೆರೆಗ್ ಎತ್ತಾವೊಡತ್ತೇ…
ಇಂಚಿಪ ತುಳು-ಕನ್ನಡೊದ ಕೆಲ ಪಿಚ್ಚರ್ದಕ್ಲೆಗ್ ಅಕ್ಲೆನ ಕತೆಟ್ ಸತ್ಯೊಲೆನ ಕಾರ್ನಿಕ ತೋಜಾಗ ಪನ್ಪಿ ಅಂಗಲ್ಪು. ನಮ್ಮ ಮಣ್ಣ ಕಮ್ಮೆನ ನಾಲೂರುಗು ಪಸೆರಾಗ ಪನ್ದ್ ಆದುಪ್ಪು, ಅತ್ತ್ ಉಂದೆನ್ ತೂದು ಎನ್ನ ಪಿಚ್ಚರ್ಗ್ ನಾಲ್ ಜನ ಎಚ್ಚ್ ಬರುವೆರ್ ಪನ್ದ್ ಆದುಪ್ಪು, ಅತ್ತ್ ಕೋಂಗಿ ಪಾತೆರುನಕುಲು ದರ್ಮೊಗು ಪ್ರಮೋಷನ್ ಮಲ್ಪೆರ್ಂದ್ಲಾ ಆದುಪ್ಪು. ಆಂಡ ಈ ಅಂಗಲ್ಪು ಕೊಡಿಯಡಿಟ್ ನಡತೊಂದಿತ್ತಿನ ನಮ್ಮ ಆರಾಧನೆ ಇನಿ ಈ ಮಣ್ಣ ಬಗೆಟ್ ತೆರಿಯಂದಿನ ಏತೋ ಜನಕ್ ಕಾಲಿ, ಕಾಲಿ ಪನ್ಡ ಕಾಲಿ ಮನೋರಂಜನೆ, ಎಂಟರ್ಟೈನ್ಮೆಂಟ್ದ ಒಂಜಿ ಸೊತ್ತು ಆದ್ ಪೋತುಂಡು. ಎಂಕ್ಲ ದಾಲ ಪೊಕ್ಕಡೆ ಪೊಕ್ಕಡೆ ಪನೊದಿಜ್ಜ. ಒಂಜಿ ಹಿಂದಿ ಸೀರಿಯಲ್ಡ್ ಎಲ್ಲೆ ಎಲ್ಲಂಜಿ ದೈವೊದ ಏಸ ಪಾಡೊಂದು ನಲಿಪುನ ಸೀನ್ ತೂಪಾಯೆರ ಉಲ್ಲೆರ್ಗೆ.
ತುಳು-ಕನ್ನಡ ಪಿಚ್ಚರ್ದಕುಲು ಈತ್ನೇಟ ಕೋಂಗಿ ಕಟ್ಟಿನ ಯಾರ್ದಿಜಿ ಪನ್ದ್ ಇತ್ತೆ ಹಿಂದಿದಕುಲುಲಾ ಸುರು ಮಲ್ತೊಂದುಲ್ಲೆರ್. ನನ ಎಲ್ಲೆ ತಮಿಳ್, ತೆಲುಗು, ಬಿಹಾರಿ ಪಿಚ್ಚರ್, ಸೀರಿಯಲ್ಡ್ ಬತ್ತ್ಂಡಲಾ ಸೋದ್ಯ ಇಜ್ಜಿ.
ZeeTV ಪನ್ಪಿ ಹಿಂದಿ ಚಾನೆಲ್ಡ್ ರಾತ್ರೆ ‘ತುಮ್ಸೆ ತುಮ್ ತಕ್’ ಪನ್ಪಿ ಒಂಜಿ ಸೀರಿಯಲ್ಡ್ ಏರೆನೋ ರಡ್ಡ್ ಜನೊನು ಒಟ್ಟು ಮಲ್ಪರೆ ಆ ಕತೆತ ಉಲಯಿ ಅವೇತೋ ತುಳುವೆರ್ ನಂಬೊಂದು ಬೈದಿನ ದೈವೊನು ಗಲಸೊಂದುಲ್ಲೆರ್. ಅರ್ದಲ ಪೂಜೊಂದು, ತರೆಪಟ್ಟ, ಗಗ್ಗರ ದೀವೊಂದು ನಲಿಪುನ ಸೀನ್ಲಾ ಉಂಡು, ಒಂಜಿ ಪೊಂಜೊವುನು ಕೈಟ್ ಪತೊಂದು ಒಯ್ತೊಂದು ಪೋಪಿನ ಸೀನ್ ಉಂಡು, ಆಲೆನ ಕೈನ್ ಕುಡೊಂಜಿ ಆಂಜೊವುನ ಕೈಟ್ ದೀಪುನ ಸೀನ್ ಉಂಡು…! ಆಂಡತ್ತಾ.. ಇಡೀ ಭಾರತೊಗು ದೈವಾರಾಧನೆದ ಗುರ್ತ, ಯಾರಂದಾ ನಮ್ಮ ಸಂಸ್ಕೃತಿಗ್ ಮರ್ಯಾದಿ ಈತ್??
ಸೀರಿಯಲ್ದ ಟಿಆರ್ಪಿ ಕಮ್ಮಿ ಆನಗ, ಕತೆ ಬರೆಪುನ ಚಾತುರ್ಪು ದಾಂತಿನಕುಲು ಮಲ್ಪುನ ಬೇಲೆಲೇ ಇಂಚಿನವು. ZeeTV ಈ ವಿಷಯೊನು ಅನೌನ್ಸ್ ಮಲ್ತಿನೇ ಪಾಕ ತುಳುವೆರ್ ಇಂದೆನ್ ವಿರೋಧಿತ್ಂಡಲಾ, ನಮನೇ ನಮ್ಮ ಸಂಸ್ಕೃತಿದ ಕೋಂಗಿ ಕಟ್ಟ್ಲೆ ಪನ್ದ್ ಬಂಗಾರಿನ್ನ ಅರಿವಾಣೊಡು ಕೈಏರಾದ್ ಕೊರ್ದಾದುಪ್ಪುನಗ ಅಕುಲಾಂಡಲಾ ದಾಯೆ ಉಂತಾವೆರ್??? ನಮ್ಮ ಕೈ ತತ್ತ್ದ್ ಪೋವೊಂದುಂಡು, ನಮ್ಮ ಊರುದಕುಲು ಮಲ್ಪುನಗ ಉಂತಾಯೆರಾವಂದಿನಕುಲು ಅಕಲೆಡ ಉಂತಾಲೆ ಪನ್ದ್ ವಾ ಮೋನೆಡ್ ಪನ್ಪುನು..! ಸುರುರ್ದು ಕೈಕಾರ್ ಬಾಯಿ ಆಕೊಂಡಿನಕುಲು ಮರ್ಲೆರ್…ಇತ್ತೆ ಏರೆಗ್ ಮರ್ಲ್ ಪನ್ದ್ ತೋಜೊಂದುಂಡು.
ಕಾಂತಾರದ ಮರ್ಲ್ ಜತ್ತೊಂದುಂಡು ಪನ್ದ್ ಎನ್ನೊಂದುಪ್ಪುನಗನೇ, ಕುಡೊಂಜಿ ಕಡೆಟ್ ಹಿಂದಿಕಲ್ಲೆನ ಸುರು ಆತ್ಂಡ್. ಅವೆತ ಇಡೆಟ್ ಊರುದಕುಲೇ ಮಲ್ತೊಂದುಪ್ಪುನ ಕೊರಗ ತನಿಯನ ಬಗೆತ ಪಿಚ್ಚರ್ದ ಒಂಜಿ ವೀಡಿಯೋಲಾ ಬುಡುಗಡೆ ಮಲ್ದೆರ್. ತೂಯಿನಾಯೆ ‘ವಾ ಮರ್ಲ್ ಮಾರೇ’ ಪನೊಡು ಆ ನಮೂನೆದ ವೀಡಿಯೋ..
ಬರೆಯೆರ ಪೋಂಡ ದಿನ ಕರಿನ ತೆರಿಯಂದ್ ಆತ್ ಕೋಂಗಿ, ಮಕ್ಕರ್ಲ್ ಉಲ್ಲ. ದಾದ ಮಲ್ಪುನು ಪನ್ಲೆ… ನಮ್ಮ ಸೋಲು, ಇತ್ತೆಲಾ ಬುದ್ದಿ ಬತ್ತಿಜಿಂಡ ನನ ಪೋಯಿಬೊಕ್ಕ ಬುದ್ದಿ ಬತ್ತ್ದ್ ದಾದ ಪ್ರೇಜನ…?