Last updated on November 19th, 2025 at 08:59 am
ವಿಜಯಪುರ, ನ. 19: ಇಂಚಿಪದ ದಿನೊಟು ಹನಿಟ್ರ್ಯಾಪ್ ಪ್ರಕರಣೊಲು ಎಚ್ಚ ಎಚ್ಚನೇ ಆವೊಂದುಲ್ಲ. ಇತ್ತೆ ಉಂದೇ ಹನಿಟ್ರ್ಯಾಪ್ ವಿಚಾರೊಡು ನಾಗರಿಕ ಸಮಾಜ ತರೆ ತಗ್ಗಾವುನ ನಡಕೆ ನಡತ್ದ್ಂಡ್. ಪೆದ್ದಿನ ಅಪ್ಪೆನೇ ಗಲಸೊಂದು ಸರ್ಕಾರಿ ಸ್ವಾಮ್ಯೊದ ಬ್ಯಾಂಕ್ ಒಂಜೆತ ಮ್ಯಾನೇಜರ್ನ್ ಹನಿಟ್ರ್ಯಾಪ್ ಮಲ್ತ್ದ್ ಲಕ್ಷ ಲಕ್ಷ ಪೀಂಕಾಯೆರ ತೂತಿನ ನಡಕೆ ವಿಜಯಪುರ ಜಿಲ್ಲೆದ ಇಂಡಿ ಡ್ ನಡತ್ದ್ಂಡ್.
ಇಂಡಿ ಪೇಂಟೆಡ್ ಬೊಂಡ ಮಾರೊಂದಿತ್ತಿನ 44 ವರ್ಸ ಪ್ರಾಯೊದ ಪೊಂಜೊವು ಸರ್ಕಾರಿ ಬ್ಯಾಂಕ್ಡ್ ಮ್ಯಾನೇಜರ್ ಆದಿತ್ತಿನ ಆಂಜೊವುಡ ಏಕರೆ ಪಾತೆರೊಂದು ಮುಟ್ಟ ಆದ್ ಕರಿನ ನವೆಂಬರ್ 1 ತಾನಿ ತನ್ನ ದೋಸ್ತಿನ ಇಲ್ಲಗ್ ಲೆತೊಂದು ಪೋದು ದೈಹಿಕ ಸಂಪರ್ಕ ಮಲ್ತಿತ್ತೆರ್. ಆ ಪೊರ್ತುಡು ಇಲ್ಲದ ಕಂಡಿಡ್ ಮೊಬೈಲ್ ದೀದಿತ್ತಿನೆನ್ ತೂದು ಮ್ಯಾನೇಜರ್, ಪ್ರಶ್ನೆ ಮಲ್ಪುನಗ ಫೋನ್ ಸಮ ಇಜ್ಜಿ ಪನ್ದ್ ಪನ್ಡ್ದ್ ತಪ್ಪಾವೊಂದೆರ್. ಬೊಕ್ಕ ನವೆಂಬರ್ 5 ತಾನಿ ಬ್ಯಾಂಕ್ ಮ್ಯಾನೇಜರ್ಗ್ ಕಾಲ್ ಮಲ್ತಿನ ಪೊಂಜೊವು , ನಮ ರಡ್ಡ್ ಜನ ಒಟ್ಟುಗು ಇತ್ತಿನೆನ್ ಏರೋ ವಿಡಿಯೋ ಮಲ್ತ್ದೆರ್. ಅಕ್ಲೆಡ ಪಾತೆರ್ದ್ ಪಿರಿಕಟ್ಟ್ ಮಲ್ತೊನ್ಲೆ ಪನ್ದ್ ಪನ್ದಿತ್ತಲ್.
ಅವ್ವೇ ಪೊರ್ತುಡು ಪೊಂಜೊವುನ ಮರ್ಮಯೆ ಮಹೇಶ ಬಗಲಿ ಪಾತೆರ್ದ್, ಪತ್ರಕರ್ತೆ ತೌಶೀಫ್ ಖುರೇಷಿ ಪನ್ಪಿನಾರೆಗ್ ನಿಕಲೆನ ಇರ್ವೆರೆನ ವಿಡಿಯೋ ತಿಕ್ಕ್ದ್ಂಡ್ ಪನ್ದ್ ಮ್ಯಾನೇಜರ್ಗ್ ಪೋಡಿಕಟ್ಟಾದೆ. ಈ ಕುರ್ತೆಲ್ ಬೇಲೆಡ್ ಪೊಂಜೊವುನ ಸ್ವಂತ ಮಗೆಲಾ ಸೇರ್ದುಲ್ಲೆ ಪನ್ದ್ ತೆರಿದ್ ಬೈದ್ಂಡ್. ತೌಶೀಫ್ ಖುರೇಷಿ, ಮಹೇಶ ಬಗಲಿ ಬೊಕ್ಕ ಪೊಂಜೊವುನ ಮಗೆ ಅಮೂಲ್ ಸೇರೊಂದು ಬ್ಯಾಂಕ್ ಮ್ಯಾನೇಜರ್ಡ, ಬತ್ತ್ದ್ ಮಾತಾ ಸಮ ಮಲ್ತೊನ್ಲೆ, ಮಾತೆರೆಗ್ಲಾ ಸೇರ್ದ್ 10 ಲಕ್ಷ ಕಾಸ್ ಕೊರೊಡು. ಇಜಿಂಡ ಮಾಧ್ಯಮೊಲೆಡ್ ವಿಡಿಯೋ ಲೀಕ್ ಆಪುಂಡು ಪನ್ದ್ ಪೋಡಿಕಟ್ಟಾದೆರ್. ಉಂದೆರ್ದ್ ಪೋಡಿನ ಬ್ಯಾಂಕ್ ಮ್ಯಾನೇಜರ್ ಇಂಡಿ ಪೊಲೀಸ್ ಸ್ಟೇಶನ್ಡ್ ಪೊಂಜೊವು ಬೊಕ್ಕ ಒರಿನ ಮುಜಿ ಜನೊತ ಮಿತ್ತ್ ಒಯಿಲ್ ಬರೆಪಾದೆರ್.
ಈ ಪ್ರಕರಣೊದ ಬಗೆಟ್ ಒಯಿಲ್ ದಾಕಲ್ತೊಂದಿನ ಇಂಡಿ ಪೇಂಟೆ ಸ್ಟೇಷನ್ದ ಪೊಲೀಸೆರ್ ಜಡ್ತೆ ಮಲ್ತೊಂದುಲ್ಲೆರ್. ಪ್ರಕರಣ ದಾಕಲಾವೊಂದಿತ್ತಿನೇ ತೌಶೀಫ್, ಮಹೇಶೆ ಬೊಕ್ಕ ಪೊಂಜೊವು ಪದ್ರಾಡಾತೆರ್. ಇತ್ತೆ ಪೊಂಜೊವುನ ಮಗನ್ ವಶೊಕು ಗೆತೊಂದು, ಒರಿನಕ್ಲೆನ್ ನಾಡೊಂದುಲ್ಲೆರ್.