Last updated on November 18th, 2025 at 04:08 pm
ಕುಡ್ಲ, ನ. 18: ಗುರ್ತದಾಂತಿನಾಯೆ ಒರಿ ಇಲ್ಲಡೆ ಅರ್ಜೆಂಟ್ ಕಾಲ್ ಮಲ್ಪೊಡು ಪನ್ಡ್ದ್ ಆಂಜೊವು ಒರಿಯಡ ಮೊಬೈಲ್ ಗೆತೊಂದು, ಮೊಬೈಲ್ದೊಟ್ಟುಗು ಪದ್ರಾಡಾತಿನ ನಡಕೆ ತೊರ್ತಲ್ಡ್ ನಡತ್ದ್ಂಡ್.
ತೊರ್ತಲ್ ಪೇಂಟೆಡ್ ಇಲ್ಲಡೆ ಇಲ್ಲಡೆ ಪೇಪರ್ ಪಾಡುನ ಮೊಹಮ್ಮದ್ ಇಕ್ಬಾಲ್ ಮೇರ್ ನವೆಂಬರ್ 17 ತಾನಿ ಪುಲ್ಯ 4 ಗಂಟೆದ ಅಂದಾಜಿಗ್ ತೊರ್ತಲ್ ಪೇಂಟೆದ ಕೆನರಾಬ್ಯಾಂಕ್ ಸರ್ಕಲ್ಡ್ ಪೇಪರ್ಲೆನ್ ಸೆಟ್ ಮಲ್ತ್ ದೀವೊಂದಿತ್ತೆರ್. ಅಪಗ ಸ್ಕೂಟರ್ ಡ್ ಬತ್ತಿನಾಯೆ ಒರಿ, ಇಲ್ಲಡೆ ಅರ್ಜೆಂಟ್ ಫೋನ್ ಮಲ್ಪೊಡು. ಒರ ಫೋನ್ ಕೊರ್ಪರಾ. ಯಾನ್ ಎನ್ನ ಪರ್ಸ್ ಬೊಕ್ಕ ಮೊಬೈಲ್ನ್ ಇಲ್ಲಡೇ ಬುಡ್ದು ಬತ್ತ್ದೆ ಪನ್ದ್ ಪನ್ತೆ.
ಸುರುಕು ಡೌಟ್ಡ್ ಇಕ್ಬಾಲ್, ಆಯಗ್ ಮೊಬೈಲ್ ಕೊರ್ದಿಜ್ಜಂಡ್. ಆಂಡಲಾ, ಆಯೆ ಗಡೀಗಡಿ ಮೊಬೈಲ್ ಕೊರ್ಯೆರ ನಟ್ಟೊನುನಗ, ಮಾನವೀಯ ದೃಷ್ಟಿಡ್ ಇಕ್ಬಾಲ್ ತನ್ನ ಮೊಬೈಲ್ನ್ ಆಯನ ಕೈಕ್ ಕೊರ್ತೆರ್. ಆತೇ.. ಮೊಬೈಲ್ ತಿಕ್ಕಿನೇ ಅಂಚೆನೇ ತನ್ನ ಇಲ್ಲಡೆ ಡಯಲ್ ಮಲ್ತಿಲೆಕ ನಾಟಕ ಮಲ್ತ್ದ್ ಆನ್ ಡೇ ಇತ್ತಿನ ಸ್ಕೂಟರ್ಡ್ ಪದ್ರಾಡಾತೆ.
ಅಪಗನೇ ಇಕ್ಬಾಲ್ ಆಯನ್ ಬೆರಿಪತೊಂದು ಪೋತೆರ್. ಆಯೆ ಸ್ಕೂಟರ್ಡ್ ಉಲತ್ತುಲಯಿ ಸಾದಿಡೆ ಪೋದು ಕಣ್ಣ್ಗ್ ತೋಜಂದಿಲೆಕ ಪದ್ರಾಡಾತೆ. ಅಂದಾಜಿ 27 ಸಾರ ರೂ. ಮೌಲ್ಯೊದ ಮೊಬೈಲ್ನ್ ಇಂಚ ಲಕ್ಕಾವೊಂದು ಪೋತೆ. ಇಕ್ಬಾಲ್ ತೊರ್ತಲ್ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್.