Last updated on November 18th, 2025 at 02:32 pm
ಜೋಕುಲೆನ ಆರೋಗ್ಯದಂಚಿ ಗೇನ ಕೊರ್ಪುನ ಪೆದ್ದಿ ಅಪ್ಪೆಅಮ್ಮನ ಜಬದರಿ. ವಾ ಬಗೆತ ತೆನಸ್ ಕೊರೊಡು, ಒವ್ವು ಕೊರ್ನ್ಡ ಎಡ್ಡೆ? ಒವೆನ್ ಕೊರ್ರೆ ಬಲ್ಲಿ- ಇಂಚ ಪಾಕ ಪ್ರಶ್ನೆಲೆನ ನಡುಟು ಜೋಕುಲೆನ ಪಾಲನೆ ಪೋಷಣೆ ಮಲ್ಪುನ ಪೆದ್ದಿನಕ್ಲೆನ ಕರ್ತವ್ಯ. ಅವೆಟ್ಲಾ ಎಚ್ಚಿನ ಅಪ್ಪೆಅಮ್ಮಗ್ ತನ್ಕುಲೆ ಜೋಕುಲೆಗ್ ಸಕ್ಕರೆ ಕೊರೊಡಾ ಬೆಲ್ಲ ಕೊರೊಡಾ ಪನ್ದ್ ಬಾರೀ ಕನ್ಫ್ಯೂಷನ್ ಇಪ್ಪುಂಡು. ಎಚ್ಚಿನಕುಲು ಉಂದೆತ ಬಗೆಟ್ ದಾಲ ಅಲೆಚನೆ ಮಲ್ಪಂದೆ ಎಚ್ಚಿಗೆ ಸಕ್ಕರೆದ ಅಂಶ ಇಪ್ಪುನ ತೆನಸ್ಲೆನ್ ಜೋಕುಲೆಗ್ ಕೊರ್ಪೆರ್. ಉಂದು ಎಡ್ಡೆ ಅತ್ತ್! ಅಂಚಾಂಡ ಎಲ್ಯ ಜೋಕುಲೆಗ್ ಬೆಲ್ಲ ಅತ್ತ್ಂಡ ಸಕ್ಕರೆ, ಉಂದೆಟ್ ಒವೆನ್ ಕೊರೊಡು? ರಡ್ಡೆಟ್ ಒವ್ವು ಎಡ್ಡೆ? ಏತ್ ವರ್ಸ ಕರಿದ್ ಜೋಕುಲೆಗ್ ಕೊರೊಲಿ ಪನ್ದ್ ತೂಕ.
ಸಕ್ಕರೆ ಬೊಕ್ಕ ಬೆಲ್ಲ ರಡ್ಡ್ಲಾ ಒಂಜೇ ನೈಸರ್ಗಿಕ ಮೂಲೊರ್ದು ಬತ್ತಿತ್ತ್ಂಡಲಾ ಅವೆನ್ ಮಲ್ಪುನ ವಿಧಾನೊಲು ಬೇತೆ ಬೇತೆ. ಈ ವಿಧಾನೊಲೇ ಉಂದೆತ ಪೋಷಕಾಂಶೊಲೆನ್ ಡಿಸೈಡ್ ಮಲ್ಪುವ.
ಡಾಕ್ಟರ್ನಕ್ಲೆನ ಪ್ರಕಾರ, ರಡ್ಡ್ ವರ್ಸೊದ ಉಲಯಿದ ಜೋಕುಲೆಗ್ ಬೆಲ್ಲ ಅತ್ತ್ಂಡ ಸಕ್ಕರೆ ಕೊರ್ಯೆರನೇ ಬಲ್ಲಿಗೆ. ರಡ್ಡ್ ವರ್ಸ ಕರಿನ ಜೋಕುಲೆಗ್ ಎಲ್ಯ ಪ್ರಮಾಣೊಡು ಬೆಲ್ಲ ಕೊರೊಲಿ. ಸಕ್ಕರೆದ ಒಟ್ಟುಗು ತೂನ್ಡ, ಬೆಲ್ಲ ಜೋಕುಲೆಗ್ ಕೊರೊಲಿ. ಆಂಡ ಎಲ್ಯ ಪ್ರಮಾಣೊಡು ಮಾತ್ರ ಕೊರೊಡು. ಚೀಪೆ ಅಂಶೊದ ಒಟ್ಟುಗು, ಬೆಲ್ಲಡ್ ಕರ್ಬ, ಪೊಟ್ಯಾಷಿಯಂ, ಕ್ಯಾಲ್ಸಿಯಂ, ಫಾಸ್ಫರಸ್ ಬೊಕ್ಕ ಮೆಗ್ನೀಸಿಯಮ್ದಂಚಿನ ಖನಿಜೊಲು ಉಲ್ಲ, ಉಂದು ಜೋಕುಲೆನ ಆರೋಗ್ಯಗ್ ಬಾರೀ ಎಡ್ಡೆ. ಈ ಖನಿಜೊಲು ಸರ್ರೊಗು ಎಡ್ಡೆ ಆಂಡಲಾ ಬೆಲ್ಲ ಮಲ್ಪುನ ಪ್ರಕ್ರಿಯೆದ ಮಿತ್ತ್ ಈ ಖನಿಜೊಲು ಉಲ್ಲನಾ ಇಜ್ಜನಾ ಪನ್ದ್ ತಾಂಗ್ದಿಪ್ಪುಂಡು.
ಸಕ್ಕರೆ, ತನ್ನ ಚೀಪೆ ಬೊಕ್ಕ ರಪಕ್ಕ ಎನರ್ಜಿ ಬೂಸ್ಟ್ ಮಲ್ಪುನ ವಿಶೇಷತೆರ್ದೇ ಪುದರ್ ಪೋದಿತ್ತ್ಂಡಲಾ, ಉಂದೆಟ್ ಕ್ಯಾಲೊರೀಸ್ ಜಾಸ್ತಿ ಉಂಡು. ಸಕ್ಕರೆಡ್ ನಮಕ್ ಬೋಡಾಪಿನ ಖನಿಜೊಲು, ವಿಟಮಿನ್ಲು, ಫೈಬರ್ ಒವ್ಲಾ ಇಜ್ಜ. ಸಕ್ಕರೆ ನೆತ್ತೆರ್ದ ಶುಗರ್ ಲೆವೆಲ್ನ್ಲಾ ಒರಾನೆ ಎಚ್ಚ ಮಲ್ಪಾವುಂಡು. ಅಂಚಾದ್ ಎಲ್ಯ ಜೋಕುಲೆಗ್ ಆಯಿನಾತ್ ಸಕ್ಕರೆ ಕೊರಂದೇ ಇಪ್ಪುನನೇ ಎಡ್ಡೆ.
ಬೆಲ್ಲಡ್ ಚೀಪೆದೊಟ್ಟುಗು ಬೇತೆ ಬೋಡಾಪಿನ ಖನಿಜೊಲು ವಿಟಮಿನ್ಲು, ಫೈಬರ್ ಮಾತಾ ಇತ್ತ್ಂಡಲಾ ಉಂದೆಟ್ ಮುಟ್ಟ ಮುಟ್ಟ ಸಕ್ಕರೆಡ್ ಇತ್ತಿನಾತೇ ಕ್ಯಾಲೊರೀಸ್ ಇಪ್ಪುಂಡು.
ರಡ್ಡ್ ವರ್ಸೊರ್ದು ಎಲ್ಯ ಜೋಕುಲೆಗ್ ಸಕ್ಕರೆ ಬೆಲ್ಲ ರಡ್ಡ್ಲಾ ಕೊರ್ಯೆರ ಬಲ್ಲಿ ಪನ್ದ್ ನೆಮ್ಪು ದೀವೊಂದು ಮಲ್ಲ ಜೋಕುಲೆಗ್ ಚೀಪೆ ಕೊರೊಡೂಂದೆ ಆನಗ ಸಕ್ಕರೆದ ಪಗತೆಗ್ ಎಲ್ಯ ಪ್ರಮಾಣೊಡು ಬೆಲ್ಲ ಕೊರೊಲಿ. ಆಂಡ ಮಲ್ಲ ಪ್ರಮಾಣೊಡು ಬೆಲ್ಲಲಾ ಆತೊಂಜಿ ಎಡ್ಡೆ ಅತ್ತ್.
ಬೆಲ್ಲ
• ಬೆಲ್ಲಡ್ಲಾ ಚೀಪೆದ ಅಂಶೊ ಉಂಡು, ತಿನ್ದ್ದ್ ಸಮ ಕೂಲಿ ದೆಕ್ಕಂದೆ ಇತ್ತ್ಂಡ ಕೂಲಿ ಪುರಿ ತಿನ್ಪುನ ಸಾಧ್ಯತೆ ಉಂಡು
• ಎಚ್ಚ ಬೆಲ್ಲ ತಿನ್ದ್ನ್ಡ ಸರ್ರೊದ ಉಷ್ಣ ಎಚ್ಚ ಆವು, ಉಂದು ಗ್ಯಾಸ್, ಪಿದಯಿ ಪೋವಂದಿನ, ಬಂಜಿ ಬೇನೆಗ್ಲಾ ಸಾದಿ ಆವು.
• ಜೋಕುಲು ಎಚ್ಚೆಚ್ಚ ಬೆಲ್ಲ ತಿನ್ದ್ನ್ಡ, ಅವು ಮೆಲ್ಲ ಮೆಲ್ಲ ಅಕ್ಲೆನ ಇನ್ಸುಲಿನ್ ಸೆನ್ಸಿಟಿವಿಟಿ ದ ಮಿತ್ತ್ ಪರಿಣಾಮ ಆಪುಂಡು, ಶುಗರ್ ಬರ್ಪಿನ ಸಾಧ್ಯತೆನ್ ಎಚ್ಚ ಮಲ್ಪುಂಡು.
ಸಕ್ಕರೆ
•ಸಕ್ಕರೆಡ್ ಎಚ್ಚಿನ ಕ್ಯಾಲೋರಿ ಅಂಶ ಇತ್ತ್ದ್, ಉಂದು ಜೋಕುಲೆನ ತೂಕ ಬೊಕ್ಕ ಚರ್ಬಿದ ಪಡಾಯಿನ್ ಎಚ್ಚ ಮಲ್ಪುಂಡು.
• ಎಚ್ಚ ಸಕ್ಕರೆ ತಿನ್ಪುನೆರ್ದ್ ಜೋಕುಲೆನ ಮನಸ್ಥಿತಿಡ್ ಎಚ್ಚಿಕಮ್ಮಿ ಆವು. ಸಕ್ಕರೆ ಸರ್ರೊಡು ಇನ್ಸುಲಿನ್ ಮಟ್ಟೊನು ಎಚ್ಚ ಮಲ್ಪುಂಡು.
• ಸಕ್ಕರೆ ಕೂಲಿಗ್ ಅಂಟೊಂದು ಬ್ಯಾಕ್ಟೀರಿಯಾ ಬುಲೆಯೆರ ಸಕಾಯ ಮಲ್ಪುಂಡು, ಉಂದು ಕೂಲಿ ಒಟ್ಟೆ ಆಯೆರ, ಪುರಿ ತಿನ್ಯೆರ ನೆವನ ಆಪುಂಡು.
• ಎಚ್ಚ ಸಕ್ಕರೆ ತಿನ್ದ್ನ್ಡ ದೀರ್ಘಾವಧಿಡ್ ಹೃದಯೊದ ಆರೋಗ್ಯಗ್ ತೆಟ್ಟಾಪುಂಡು. ಉಂದು ನೆತ್ತೆರ್ಡ್ ಟ್ರೈಗ್ಲಿಸರೈಡ್ಗಳು ಬೊಕ್ಕ ತೆಟ್ಟ್ ಕೊಲೆಸ್ಟ್ರಾಲ್ (LDL) ಮಟ್ಟೊನು ಏರ್ಪುಂಡು.