Last updated on November 13th, 2025 at 12:12 pm
ಬೊಲ್ತೇರ್, ನ. 13: ಬೊಲ್ತೇರ್ ತಾಲೂಕ್ದ ಕುತ್ಲೂರ್ ಗ್ರಾಮೊಡು ಬಂಗಾರ್ ಕನ್ಡ್ದಿನ ಪ್ರಕರಣೊಡು ಮಲ್ಲ ಅಂತಾರಾಜ್ಯ ಕಲ್ವೆ ಇತ್ತೆ ಬರ್ಪೆ ಅಬೂಬಕ್ಕರ್ (71) ಪನ್ಪಿನಾಯನ್ ವೇಣೂರು ಪೊಲೀಸೆರ್ ಕೈದ್ ಮಲ್ತ್ದೆರ್. ಮಂಜುಶ್ರೀ ನಗರೊದ ಒಂಜಿ ಇಲ್ಲಡ್ ಏರ್ಲಾ ಇಜ್ಜಂದಿನ ಪೊರ್ತುಡು ಕನ್ಡ್ದಿತ್ತ್ದ್, ಮೈನ್ ಡೋರ್ದ ಬೀಗ ಪೊಲ್ತ್ದ್ ಸುಮಾರ್ 9.50 ಲಕ್ಷ ರೂ. ಮೌಲ್ಯೊದ ಪದ್ದೈ ಬಂಗಾರ್ ಕನ್ಡ್ದಿತ್ತೆರ್.
ನವೆಂಬರ್ 11 ತ ರಾತ್ರೆ, ಪಿಎಸ್ಐ ಓಮನ್ ಬೊಕ್ಕ ಆರೆನ ಸಿಬ್ಬಂದಿ ಗಾಡಿಲೆನ ಚೆಕಪ್ ಮಲ್ಪುನಗ, ಸ್ಕೂಟರ್ಡ್ ಬತ್ತಿನ ಒರಿಯನ್ ಡೌಟ್ಡ್ ಉಂತಾದೆರ್. ಆಯನ ದಾಕಲೆಲೆನ್ ಪರಿಶೀಲಿತ್ದ್ ವಿಚಾರಣೆ ಮಲ್ಪುನಗ, ಪೊಲೀಸೆರ್ ಆಯನ್ ಕಲ್ವೆ ‘ಇತ್ತೆ ಬರ್ಪೆ’ ಅಬೂಬಕ್ಕರ್ ಪನ್ದ್ ಗುರ್ತ ಪತ್ತ್ದೆರ್. ಕುಡ್ಲಡ್ ನಡತಿನ ಕಲ್ವೆಡ್ಲಾ ಉಂಬ್ಯನ ಕೈ ಉಂಡು ಪನ್ದ್ ಪ್ರಾಥಮಿಕ ಜಡ್ತೆಡ್ ತೆರಿದ್ ಬೈದ್ಂಡ್ ಅಂಚೆನೇ ಕುತ್ಲೂರ್ದ ಉಂಬ್ಯೆ ಕನ್ಡ್ದೆ ಪನ್ದ್ ದೃಢ ಆತ್ಂಡ್.
ಮಂಜುಶ್ರೀ ನಗರದ ನಿವಾಸಿ ಅವಿನಾಶ್ ಪನ್ಪಿನಾರೆನ ಇಲ್ಲಡ್ ಈ ಕಲ್ವೆ ನಡತಿತ್ತ್ಂಡ್. ಅಕ್ಟೋಬರ್ 2 ತಾನಿ ಆರ್ ಇಲ್ಲಗ್ ಬೀಗ ಪಾಡ್ದ್ ಪಿದಯಿ ಪೋದಿತ್ತೆರ್, ಅಕ್ಟೋಬರ್ 6 ತ ಬಯ್ಯ 5 ಗಂಟೆದ ಅಂದಾಜಿಗ್ ಆರ್ ಪಿರಬನ್ನಗ ಕಲ್ವೆರ್ ಪೊಗ್ಗುದಿನ ತೆರಿದ್ಂಡ್. ಕನ್ಡಿನ ಸೊತ್ತುಲೆಡ್ ಕರಿಮಣಿ, ಮುತ್ತುದ ಮಾಲೆ ಬೊಕ್ಕ ಒಟ್ಟು 149 ಗ್ರಾಂ ತೂಕೊದ ಬಂಗಾರ್ ಇತ್ತ್ದ್, ಉಂದೆತ ಮೌಲ್ಯ ಸುಮಾರ್ 9.50 ಲಕ್ಷ ರೂ.ದಾತ್ ಇತ್ತ್ಂಡ್. ಈ ಬಗೆಟ್ ವೇಣೂರು ಪೊಲೀಸ್ ಸ್ಟೇಶನ್ಡ್ ಪ್ರಕರಣ ದಾಕಲಾತ್ಂಡ್.
ಆರೋಪಿನ್ ಬೊಲ್ತೇರ್ ನ್ಯಾಯಂತಡೆದ ಎದುರು ಲೆತೊಂದು ಪೋತೆರ್, ಪೊಲೀಸೆರೆ ಬಿನ್ನಪುಗು ನ್ಯಾಯಂತಡೆ ನವೆಂಬರ್ 15 ಮುಟ್ಟ ಪೊಲೀಸ್ ಕಸ್ಟಡಿಗ್ ಒಪ್ಯಾದ್ಂಡ್. ಕನ್ಡಿನ ಪದ್ದೈ ಬಂಗಾರ್ನ್ ಮಾರ್ದೆ ಪನ್ದ್ ಆಯೆ ಒತ್ತೊಂದೆ ಪನ್ದ್ ವರದಿ ಆತ್ಂಡ್. ಬೊಲ್ತೇರ್ ಇನ್ಸ್ಪೆಕ್ಟರ್ ಸುಬ್ಬಾಪುರಮಠ ಬೊಕ್ಕ ವೇಣೂರು ಪೊಲೀಸೆರೆ ಮುತಾಲಿಕೆಡ್ ಕಾರ್ಯಾಚರಣೆ ನಡತ್ಂಡ್.
ಇತ್ತೆ ಬರ್ಪೆ ಅಬೂಬಕ್ಕರ್ ಚಿಕ್ಕಮಗಳೂರುದ ಜನ, ಇತ್ತೆ ತೋರ್ತಲ್ದ ಕೈತಲ್ ಕಾನ ಡ್ ಇತ್ತೆರ್. ಕರಿನ ನಾಲ್ ದಶಕೊಡು, ಮಂಗಳೂರು, ಒಡಿಪು ಬೊಕ್ಕ ಚಿಕ್ಕಮಗಳೂರು ಜಿಲ್ಲೆಲೆನ ಬೇತೆ ಬೇತೆ ಪೊಲೀಸ್ ಸ್ಟೇಶನ್ಲೆಡ್ ಅಂಚೆನೇ ಕೇರಳಡ್ ದಾಕಲಾತಿನ 50 ರ್ದ್ಲಾ ಎಚ್ಚ ಕಲ್ವೆ ಪ್ರಕರಣೊಲೆಡ್ ಪಾಲ್ಪಡೆತಿನೆಕ್ ಆಯನ್ ಪಾಕ ಸರ್ತಿ ಕೈದ್ ಮಲ್ತ್ದ್ ಕರ್ಪಿಲ್ಲ್ಗ್ ಪಾಡ್ದೆರ್.
71 ವರ್ಸ ಪ್ರಾಯೊದ ಅಬೂಬಕ್ಕರ್ ಗ್ ಕನ್ಡುನವೇ ಕಸುಬು. ಈ ವರ್ಸ ಜೂನ್ 27 ತಾನಿ ಶಿರ್ವ ಪೊಲೀಸ್ ಸ್ಟೇಶನ್ ಸೀಮೆದ ಮಟ್ಟಾರ್ ದೇಲಂತಡೆದ ಕೈತಲ್ದ ಇಲ್ಲ್ ಪೊಗ್ಗುದು 7.50 ಲಕ್ಷ ರೂ. ಮೌಲ್ಯೊದ 66.76 ಗ್ರಾಂ ಪದ್ದೈ ಬಂಗಾರ್ನ್ ಕನ್ಡ್ದೆ. ಆಯನ್ ಇಂಚಿಪ ಕೈದ್ ಮಲ್ತಿತ್ತ್ದ್, ಬುಡುಗಡೆ ಆದಿತ್ತೆ.
ಅಬೂಬಕ್ಕರ್ ‘ಇತ್ತೆ ಬರ್ಪೆ ಅಬೂಬಕ್ಕರ್’ ಪನ್ದೇ ಪುದರಾತಿನ ಕಲ್ವೆ. 1980 ದ ಪೊರ್ತುಡು, ಚಿಕ್ಕಮಗಳೂರುಡು ರಿಕ್ಷಾ ಡ್ರೈವರ್ ಆದುಪ್ಪುನಗ, ತನ್ನ ರಿಕ್ಷಾದ ಪಿರವು ‘ಇತ್ತೆ ಬರ್ಪೆ’ ಪನ್ಪಿ ಪುಗರ್ತೆದ ಯಕ್ಷಗಾನೊದ ಪುದರ್ ಬರೆದಿತ್ತೆರ್. ಅಂಚಾದ್, ಆರ್ ಆ ಪುದರ್ಡೇ ಪುದರಾತೆರ್.