Last updated on November 27th, 2025 at 01:15 pm
ಪುತ್ತೂರು, ನ. 27: ಕೆನರಾ ಬ್ಯಾಂಕ್ ಪುತ್ತೂರು ಶಾಖೆದ ಸಿಬ್ಬಂದಿ ಒರಿಯನ ಮಗೆ ಬೆಂಗಳೂರ್ಡ್ ಹಾರ್ಟ್ ಅಟ್ಯಾಕ್ ಆದ್ ತೀರ್ದಿನ ನಡಕೆ ನಡತ್ದ್ಂಡ್.
ಪುತ್ತೂರುದ ಧರ್ಮಸ್ಥಳ ಕಟ್ವಾನೊಡು ಇಪ್ಪುನ ಕೆನರಾ ಬ್ಯಾಂಕ್ ಶಾಖೆಡ್ ಅಟೆಂಡರ್ ಆದುಪ್ಪುನ ಪಡ್ನೂರು ಪಂಜಿಗುಡ್ಡೆ ನಿವಾಸಿ ತನಿಯಪ್ಪ ನಾಯ್ಕ್ ಪನ್ಪಿನಾರೆನ ಮಗೆ ಗುರುರಾಜ್ (22) ತೀರ್ದಿನಾರ್.
ಬೆಂಗಳೂರ್ಡ್ ಕಿಸ್ಕೋ ಕಂಪೆನಿಡ್ ಎಸಿ ಮೆಕ್ಯಾನಿಕ್ ಆದ್ ಬೇಲೆ ಮಲ್ತೊಂದಿತ್ತಿನ ಗುರುರಾಜ್ ರಾತ್ರೆದ ಶಿಫ್ಟ್ಡ್ ಬೇಲೆ ಮಲ್ತೊಂದಿತ್ತ್ದ್ ನ.25ತಾನಿ ಬೇಲೆಗ್ ಪಿದಡ್ರ ದುಂಬು ಬಾತ್ ರೂಂಗ್ ಪೋದುಪ್ಪುನಗ ಅಲ್ಪನೇ ಹಾರ್ಟ್ ಅಟ್ಯಾಕ್ ಆದ್ ತೀರ್ದೆರ್ ಪನ್ದ್ ತೆರಿದ್ ಬೈದ್ಂಡ್.
ಗುರುರಾಜ್ ಬೊಕ್ಕ ಕುಡ ರಡ್ಡ್ ಜನ ಪಿಜಿಡ್ ಒಟ್ಟುಗೇ ಇತ್ತ್ದ್, 25ತಾನಿ ಗುರುರಾಜ್ ಒರಿಯೇ ಇತ್ತೆರ್. ಬಯ್ಯದ ಪೊರ್ತುಡು ನನ ದಾನೆ ಬೇಲೆಗ್ ಪಿದಡೊಡು ಪನ್ದ್ ಬಾತ್ರಂಗ್ ಪೋದು ಅಲ್ಪ ಹಾರ್ಟ್ ಅಟ್ಯಾಕ್ ಆದ್ ಕುಸ್ಕ್ದ್ ಬೂರ್ದೆರ್.
ಆಂಡ ರೂಮ್ಡ್ ಏರ್ಲಾ ಇಜ್ಜಂದಿನೆರ್ದಾವರ ಏರೆಗ್ಲಾ ವಿಷಯ ತೆರಿದಿಜಿ. ಪಿಜಿಡ್ ಒಟ್ಟುಗು ಇಪ್ಪೆದಿನಕುಲು ನ.26ತ ಮಧ್ಯಾಹ್ನದ ಪೊರ್ತುಗು ಬತ್ತಿಬೊಕ್ಕನೇ ಗುರುರಾಜ್ ಬಾತ್ರೂಂಡ್ ಬೂರ್ದು ತೀರ್ದಿನ ಇಸಯ ತೆರಿದ್ಂಡ್.
ಸರ್ರೊನು ಬೆಂಗಳೂರುರ್ದ್ ಪಂಜಿಗುಡ್ಡೆಗ್ ಕನತ್ದ್ ಅಂತ್ಯ ಸಂಸ್ಕಾರ ನಡಪರೆ ಉಂಡು. ತೀರ್ದಿನ ಗುರುರಾಜ್ ಅಪ್ಪೆ, ಅಮ್ಮೆರ್ ಬೊಕ್ಕ ಸಂಗಡಿನ್ ಅಗತ್ದೆರ್.