Last updated on December 18th, 2025 at 08:13 am
ಬೆರ್ಮಾರ, ಡಿ. 18: ಅಕ್ಷತಾ ಪೂಜಾರಿನ ಮಿತ್ತ್ ಪೊಲೀಸೆರ್ ದೌರ್ಜನ್ಯ ಮಲ್ತ್ದೆರ್ ಪನ್ದ್ ಆರೋಪ ಮಲ್ತ್ದ್ ಅಂಚೆನೇ ಕಲು ಎಫ್ಐಆರ್ ದಾಕಲ್ತಿನ ಪೊಲೀಸ್ ಅಧಿಕಾರಿಲೆನ್ ಡಿಸ್ಮಿಸ್ ಮಲ್ಪೊಡು ಪನ್ದ್ ಆಗ್ರಹ ಮಲ್ತ್ದ್ ಒಡಿಪು ಜಿಲ್ಲಾ ಬಿಲ್ಲವ ಯುವ ವೇದಿಕೆದ ಮುತಾಲಿಕೆಡ್ ಬಿಲ್ಲವ ಸಮಾಜದಕುಲು ಬೆರ್ಮಾವರ ಪೊಲೀಸ್ ಸ್ಟೇಶನ್ದ ಎದುರು ಕೋಡೆ, ಬುಧವಾರ ಬಯ್ಯಡ್ ಪೊರ್ಮ್ಬಾಟ ಮಲ್ತೆರ್.
ಪೊಲೀಸ್ ಸ್ಟೇಶನ್ದ ಎದುರು ಪಾಕ ಸಂಖ್ಯೆಡ್ ಸೇರ್ನ ಬಿಲ್ಲವ ಸಮಾಜದಕುಲು ಅಕ್ಷತಾ ಪೂಜಾರಿನ ಮಿತ್ತ್ ಪೊಲೀಸೆರ್ ದೌರ್ಜನ್ಯ ಮಲ್ತ್ದೆರ್. ಆತೇ ಅತ್ತಂದೆ, ಆರೆನ ಮಿತ್ತ್ ಬೊಕ್ಕ ಆರೆನ ಅಪ್ಪೆನ ಮಿತ್ತ್ ಕಲು ಕೇಸ್ ಪಾಡ್ದೆರ್ ಪನ್ದ್ ಆಕ್ರೋಶ ತೂಪಾಯೆರ್. ದೌರ್ಜನ್ಯ ಮಲ್ದಿನ ಅಧಿಕಾರಿಲೆನ ಮಿತ್ತ್ ಇತ್ತೆನೇ ಎಫ್ ಐಆರ್ ಪಾಡೊಡು. ಇಜ್ಜಿಂಡ ಮುಲ್ಪರ್ದ್ ಪೋಪುಜ ಪನ್ದ್ ರಂದಿಯೆರ್. ಅಕ್ಷತಾಗ್ ನ್ಯಾಯ ತಿಕ್ಕಂದೆ ಎಂಕ್ಲ ಪೊರ್ಮ್ಬಾಟ ಉಂತಾವುಜ. ದೌರ್ಜನ್ಯ ಮಲ್ದಿನ ಅಧಿಕಾರಿಲೆನ ಮಿತ್ತ್ ಕೇಸ್ ಪಾಡ್ದ್ ಅಕ್ಲೆನ್ ಬೇಲೆರ್ದ್ ದೆಪ್ಪೊಡು ಪನ್ದ್ ಒತ್ತಾಯ ಮಲ್ತ್ದೆರ್.
ಒಡಿಪು ಜಿಲ್ಲಾ ಬಿಲ್ಲವ ಯುವ ವೇದಿಕೆದ ಅಧ್ಯಕ್ಷೆ ಪ್ರವೀಣ್ ಪೂಜಾರಿ ಪಾತೆರ್ದ್, ಅಕ್ಷತಾ ಪೂಜಾರಿ ಬರೆಪಾದಿನ ಒಯಿಲ್ದ ಪ್ರಕಾರ ಎಫ್ಐಆರ್ ಆವೊಡು. ಪೊಲೀಸೆರೆ ಬೇಲೆಗ್ ಅಡ್ಡ ಬತ್ತೆರ್ ಪನ್ದ್ ಕಲು ಎಫ್ಐಆರ್ ಪಾಡ್ದೆರ್, ಪೊಲೀಸೆರ್ ಪುಲ್ಯ ನಾಲ್ ಗಂಟೆಗ್ ಇಲ್ಲಗ್ ಪೋತಿನನೇ ಅಕ್ರಮ. ಅಂಚಾದ್ ಅಕ್ಷತಾನ ಇಲ್ಲಗ್ ಪೋದು ದೌರ್ಜನ್ಯ ಮಲ್ದಿನ ಅಧಿಕಾರಿಲೆನ್ ಇತ್ತೆನೇ ವಜಾ ಮಲ್ಪೊಡು ಪನ್ದ್ ಒತ್ತಾಯ ಮಲ್ತೆರ್.
ಬುಧವಾರ ಬಯ್ಯಡ್ ತೊಡಂಗಿನ ಪೊರ್ಮ್ಬಾಟ ರಾತ್ರೆ ಮುಟ್ಟಲಾ ದುಂಬರಿದ್ಂಡ್. ಅಂಚಾದ್ ಪ್ರತಿಭಟನೆ ನಡತೊಂದಿತ್ತಿನ ಜಾಗೆಗ್ ಎಸ್ ಪಿ ಹರಿರಾಮ ಶಂಕರ್ ಬತ್ತಿತ್ತೆರ್. ಆಂಡ ಒವ್ವೇ ರೀತಿದ ಸಂಧಾನೊಗು ಪೊರ್ಮ್ಬಾಟಗಾರೆರ್ ಒತ್ತೊನಂದಿನೆರ್ದಾವರ ಎಚ್ಚಿಗೆ ಪೊಲೀಸೆರೆನ್ ಜಾಗೆಗ್ ಬೆರ್ಮಾವರ ಪೋಲೀಸೆರ್ ಬರ್ಪಾದೆರ್.