Last updated on December 17th, 2025 at 02:32 pm
ಮಲ್ಪೆ, ಡಿ. 17: ಮಲ್ಪೆದ ಕಡಲ ಕರೆನ್ ಒತ್ತರೆ ಮಲ್ಪೆರ 8 ವರ್ಸೊಗು ದುಂಬು ಗೆತೊಂದಿನ ಬೀಚ್ ಕ್ಲೀನಿಂಗ್ ಮೆಷಿನ್ ಮೈಂಟೆನೆನ್ಸ್ ದಾಂತೆ ಇತ್ತೆ ಬೀಚ್ದ ಮಸಣ ಸೇರ್ದ್ಂಡ್. ಇತ್ತೆ 80 ಲಕ್ಷೊದ ಈ ಮೆಷಿನ್ ಮಣ್ಣ್ ಪತ್ತೊಂದುಂಡು.
ಕಡಲತೀಕರೆನ್ ಒತ್ತರೆ ದೀಪುನ ದಿಟ್ಟಿಡ್ 2017ಟ್ ಅಪಗದ ಸಚಿವೆರಾದಿತ್ತಿನ ಪ್ರಮೋದ್ ಮಧ್ವರಾಜ್ ಮೇರ್ ಮುಖ್ಯಮಂತ್ರಿ ಚ್ಯಾಲೆಂಜ್ ಫಂಡ್ರ್ದ್ 80 ಲಕ್ಷ ರೂಪಾಯಿ ಕರ್ಚಿಡ್ ಟ್ರಾಕ್ಟರ್ ದೊಟ್ಟುಗು ಮೆಷಿನ್ ಗೆತೊಂದು ಮಲ್ಪೆ ಅಭಿವೃದ್ಧಿ ಸಮಿತಿಗ್ ಕೊರ್ದಿತ್ತೆರ್. ಜರ್ಮನಿ ಕಂಪೆನಿದ ಮೆಷಿನ್ಗ್ ಗಂಟೆಡ್ 20 ಎಕ್ರೆ ಜಾಗೆ ಕ್ಲೀನ್ ಮಲ್ಪುನ ಸಾಮರ್ತಿಗೆ ಇತ್ತ್ಂಡ್. ಅರ್ಧ ಫೀಟ್ ಪೊಯ್ಯೆದ ಅಡಿಟ್ ಇಪ್ಪುನ ಕುಪ್ಪಿ ಚೂರು, ಸಿಗರೇಟ್ ತುಂಡು, ಇಂಚ ಬೇತೆ ಕಜವುಲೆನ್ ಪಿದಯಿದೆಪ್ಪುನ ಸಾಮರ್ತಿಗೆ ಇತ್ತ್ಂಡ್. ಆಂಡ ಕರಿನ ಎಪ್ರಿಲ್ ತಿಂಗೊಲುರ್ದ್ ಈ ಮೆಷಿನ್ ಗಲಕೆ ಆವೊಂದಿಜ್ಜಿಗೆ.
ದುಂಬು ಬೀಚ್ದ ಮೈಂಟೆನೆನ್ಸ್ ಬೀಚ್ ಅಭಿವೃದ್ಧಿ ಸಮಿತಿಗ್ ಇಪ್ಪುನಗ ಸುದೇಶ್ ಶೆಟ್ಟಿ ಮೆರೆನ ಮುತಾಲಿಕೆಡ್ ಸೀವಾಕ್ರ್ದ್ ತೊಟ್ಟಂ ಪೊಟ್ಟಳಿವೆ ಮುಟ್ಟ ಸುಮಾರ್ 3 ಕಿ.ಮೀ. ಕಡಲಕರೆನ್ ನಿಚ್ಚೊಲಾ ಕ್ಲೀನ್ ಮಲ್ಪೆದೆರ್. ಡೀಪ್ ಕ್ಲೀನಿಂಗ್ ಬೊಕ್ಕ ಮೈಕ್ರೋ ಕ್ಲೀನಿಂಗ್ ಪನ್ದ್ ರಡ್ಡ್ ವಿಭಾಗೊಡು ನಿಚ್ಚೊಲಾ ಎಚ್ಚಾದ್ ರಾತ್ರೆದ ಪೊರ್ತುಡು ಕ್ಲೀನಿಂಗ್ ನಡಪೆದ್ಂಡ್. ದುಂಬು ಈ ಮೆಷಿನ್ನ್ ದೀಯೆರ ಮಸಣೊದ ಕೈತಲ್ ಶೆಡ್ ಮಲ್ತ್ದ್ ಜಾಗ್ರ್ತೆಡ್ ದೀದಿತ್ತೆರ್. ಆಂಡ ಇತ್ತೆ ಪಿದಯಿ ದೀದಿತ್ತ್ದ್ ದೊಂಬು ಬರ್ಸೊಗು ಮಣ್ಣ್ ಪತ್ತ್ದ್ಂಡ್.