Last updated on December 19th, 2025 at 10:51 am
ಒಡಿಪು, ಡಿಸೆಂಬರ್ 19: ವಿಧ್ಯಾರ್ಥಿನಿ ಅಕ್ಷತಾ ಪೂಜಾರಿಗ್ ಪುಲ್ಯಕಾಂಡೆ ನಾಲ್ ಗಂಟೆಗ್ ಇಲ್ಲಗ್ ಪೊಗ್ಗುದು ಪೊಲೀಸೆರ್ ಹಲ್ಲೆ ಮಲ್ತ್ದೆರ್ ಪನ್ಪಿ ಆರೋಪನ್ ಈ ಪ್ರಕರಣೊದ ಸಂತ್ರಸ್ತೆ ವಡ್ಡರ್ಸೆದ ದೇವೇಂದ್ರ ಸುವರ್ಣೆ ಕಲು ಪನ್ದ್ ಪನ್ತೆರ್.
ಒಡಿಪು ಪ್ರೆಸ್ ಕ್ಲಬ್ಡ್ ಬೊಡೆದಿ ಶಕುಂತಳಾ ಬೊಕ್ಕ ತಾಯಿ ಪದ್ದಿ ಮೆರೆನ ಒಟ್ಟುಗು ಸುದ್ದಿಗೋಷ್ಠಿಡ್ ಪಾತೆರ್ನ ದೇವೇಂದ್ರ ಸುವರ್ಣೆರ್, ಈ ಪ್ರಕರಣೊಡು ಎಂಕ್ ಅನ್ಯಾಯ ಆತ್ಂಡ್. ಬೆನ್ದ್ದ್ ತಿನೊಂದಿತ್ತಿನ ಯಾನ್ ಇತ್ತೆ 11 ವರ್ಸೊರ್ದಿಂಚಿ ಬೇನೆ ತಿನೊಂದುಲ್ಲೆ. ದೇಶೊದ ಸಂವಿಧಾನ, ನ್ಯಾಯ ವ್ಯವಸ್ಥೆನ್ ನಂಬುದ್ ನ್ಯಾಯಂತಡೆದ ಮುಕೇನ ಪೊರ್ಮ್ಬೊಂದುಪ್ಪುನ ಎಂಕ್ ಮಾತಾ ಕಡೆರ್ದ್ಲಾ ಅನ್ಯಾಯೊನೇ ಆವೊಂದುಂಡು ಪನ್ದ್ ಪನ್ಡೆರ್.
ಬೆನ್ಯೆರ ಆವಂದಿನ ಎಂಕ್ ನ್ಯಾಯಂತಡೆ ಕೊರ್ತಿನ ಪಿರಿಕಟ್ಟ್ ಕೈಕ್ ತಿಕ್ಕೊಂದಿಜ್ಜಿ. ಮಾತೆಕ್ಲಾ ಯಾನ್ ಅಪ್ಪೆ-ಬೊಡೆದಿನೇ ತಾಂಗ್ದುಲ್ಲೆ. ನ್ಯಾಯೊಗು ಬೋಡಾದ್ ಒರಿಯೇ ಪೊರ್ಮ್ಬೊಂದಿತ್ತಿನ ಯಾನ್, ಅಕ್ಷತಾನ ಕಲು ಆರೋಪನ್ ನಂಬ್ದ್ ಆರೆನ ಸಮುದಾಯ ಪೊರ್ಮ್ಬಾಟೊಗ್ ಜತ್ತಿ ಬೊಕ್ಕ ಯಾನ್ಲಾ ಎನ್ನ ಸಮುದಾಯೊದ (ಮರಕ್ಕಲೆರ್) ಜನೊಕ್ಲೆನ ಬೆರಿತಾಂಗ್ಡ್ ಪೊರ್ಮ್ಬಾಟ ಮಲ್ಪುನ ಬಗೆಟ್ ಯೋಜನೆ ಮಲ್ತೊಂದುಲ್ಲೆ ಪನ್ದ್ ಪನ್ಡೆರ್.
ಅಕ್ಷತಾ ಪೂಜಾರಿ ಮಾತೆರ್ಲಾ ನಂಬುನಲೆಕ ಪೊಲೀಸೆರ್ ಬೊಕ್ಕ ಎನ್ನ ಮಿತ್ತ್ ಮಲ್ಲ ಮಟ್ಟ್ಡ್ ಕಲು ಆರೋಪಲೆನ್ ಮಲ್ತೊಂದುಲ್ಲಲ್. ಸತ್ಯ ಇನಿ ಅತ್ತ್ಂಡ ಎಲ್ಲೆ ತೆರಿದೇ ತೆರಿಯುಂಡು. ಇಡೀ ಪ್ರಕರಣೊಡು ಯಾನ್ ನ್ಯಾಯಬದ್ಧೆ ಆದ್ ನಡತೊಂದೆ. ನ್ಯಾಯಾಂಗ ವ್ಯವಸ್ಥೆದ ಮಿತ್ತ್ ನಂಬಿಕೆ ದೀತೆ. ಆಂಡ ಕೋಡೆದ ಪೊರ್ಮ್ಬಾಟೊಡು ಎನ್ನ ಮಿತ್ತೇ ಎಫ್ಐಆರ್ ದಾಕಲಾಪುಲೆಕ ಮಲ್ತ್ದೆರ್ ಪನ್ದ್ ಪನ್ಡೆರ್.
ದ್ರೇವೇಂದ್ರೆಗ್ ಆತಿನ ಅನ್ಯಾಯ
2014ಟ್ ದೇವೇಂದ್ರ ಸುವರ್ಣೆರೆಗ್ ಆಶಿಕ್ ಪನ್ಪಿ ಜವನೆ ಬೈಕ್ಡ್ ಎಡ್ತ್ದ್, ಆರೆಗ್ ಗಾತಿದ ಗಡಿಕುಲಾದಿತ್ತ್ದ್, ಇನಿಕ್ಲಾ ಆರೆಗ್ ಮರ್ದ್ ನಡತೊಂದುಂಡು. ಈ ಪ್ರಕರಣೊಗು ಸಂಬಂಧಿತ್ದ್ ಕೋರ್ಟ್ ಆಶಿಕ್ಗ್ 25 ಲಕ್ಷ ಪಿರಿಕಟ್ಟ್ ಕೊರೊಡು ಪನ್ದ್ ಆದೇಶ ಕೊರ್ದಿತ್ತ್ಂಡ್. ಆಂಡ ಆಶಿಕ್ ಪಿರಿಕಟ್ಟ್ದ ಕಾಸ್ ಕೊರಂದೆ ದೆಂಗ್ತಪ್ಪಾದುಲ್ಲೆ. ಅಕ್ಷತಾ ಆಶಿಕ್ನ ಸೋದರ ಸಂಬಂಧಿ.