Last updated on December 19th, 2025 at 09:49 am
ಮುಲ್ಕಿ, ಡಿ. 19: ಇಂಚಿಪ ನಡತಿನ ಐಪಿಎಲ್ ಮಿನಿ ಆಕ್ಷನ್ಡ್ ಮೂಲ್ಕಿ ಮೂಲೊದ 19 ವರ್ಸ ಪ್ರಾಯೊದ ಯಶ್ರಾಜ್ ಪೂಂಜಾನ ಮಾತೆರ್ನ ಗುಮನ ಬೂರ್ದ್ಂಡ್. ಯುವ ಪ್ರತಿಭೆಲೆಗ್ ಏಪೊಲ ಮಣೆ ಪಾಡುನ ರಾಜಸ್ಥಾನ್ ರಾಯಲ್ಸ್ ಫ್ರಾಂಚೈಸಿ, ಈ ಸರ್ತಿ 14 ವರ್ಸ ಪ್ರಾಯೊದ ವೈಭವ್ ಸೂರ್ಯವಂಶಿನ ಒಟ್ಟುಗು ಯಶ್ರಾಜ್ ಪೂಂಜಾ ಮೆರೆನ್ಲಾ ತನ್ನ ಟೀಮ್ಗ್ ಗೋಡ್ಯಾವೊಂದುಂಡು.
ಮೂಲತಃ ಯುಎಇಡ್ ಪುಟ್ಟ್ದಿನ ಯಶ್ರಾಜ್ ಪೂಂಜಾ, ಬೊಕ್ಕ ತುಳುನಾಡ್ಗ್ ಬತ್ತ್ದ್ ಕ್ರಿಕೆಟ್ಡ್ ಪುದರ್ ಮಲ್ತೆರ್. 2025ತ ಮಹಾರಾಜ ಟ್ರೋಫಿ ಕ್ರಿಕೆಟ್ ಪಂದ್ಯಾವಳಿಡ್ ಹುಬ್ಬಳ್ಳಿ ಟೈಗರ್ಸ್ ಕೂಟೊನು ಪ್ರತಿನಿಧಿತಿತ್ತಿನ ಮೇರ್ 10 ಗೊಬ್ಬುಲೆಡ್ 23 ವಿಕೆಟ್ ದೆತ್ತ್ದ್ ಸಂಚಲನ ಉಂಡು ಮಲ್ತಿತ್ತೆರ್. ಎಚ್ಚ ವಿಕೆಟ್ ದೆತ್ತಿನಕ್ಲೆನ ಪಟ್ಟಿಡ್ ಮೇರ್ ರಡ್ಡನೇ ತಾನೊಡು ಇತ್ತ್ದ್ ಅಜಪುನಕ್ಲೆನ ಗೇನ ಒಯ್ತ್ದೆರ್.
ಕ್ವಾಲಿಫೈಯರ್ ಗೊಬ್ಬುಡು ಟೀಮ್ನ್ ಫೈನಲ್ಗ್ ಲೆತೊಂದು ಪೋಯೆರ ಮೆರೆನ 30 ರನ್ಗ್ 2 ವಿಕೆಟ್ ದೆತ್ತಿನ ಪ್ರದರ್ಶನ ಬಾರೀ ಪುಗರ್ತೆ ಪಡೆದುಂಡು.
ಇಯಾನ್ ಬಿಶಪ್ ಪುಗರ್ದಿನ ‘ಜೈಂಟ್’ ಬೌಲರ್:
ಯಶ್ರಾಜ್ಗ್ ಆರೆನ ಎತ್ತರೊನೇ ಮಲ್ಲ ಪ್ಲಸ್ ಪಾಯಿಂಟ್. 2024ಟ್ ರಾಜಸ್ಥಾನ್ ರಾಯಲ್ಸ್ಗ್ ನೆಟ್ ಬೌಲರ್ ಆದುಪ್ಪುನಗ, ವೆಸ್ಟ್ ಇಂಡೀಸ್ದ ಲೆಜೆಂಡ್ ಇಯಾನ್ ಬಿಶಪ್ನ ಕಣ್ಣ್ಗ್ ಮೇರ್ ಬೂರ್ದಿತ್ತೆರ್. ಚೆನ್ನೈ ವಿಮಾನ ಉಂತಡೆಡ್ ಸುಮಾರ್ 6 ಫೀಟ್ 6 ಇಂಚಿ ಎತ್ತರೊದ ಈ ಆಣನ್ ತೂದು ಬಿಶಪ್, ಫೋಟೋ ದೆತ್ತ್ದ್ ‘ಬ್ಯಾಂಗಲೋರ್ ಬಾಯ್’ ಎಂದು ಸೋಶಿಯಲ್ ಮೀಡಿಯಾಡ್ ಪಟ್ಟ್ದಿತ್ತೆರ್.
ಲಕ್ಷಗಟ್ಲೆ ಜನೊಕುಲು ತೂತಿನ ಈ ಪೋಸ್ಟ್ ಯಶ್ರಾಜ್ ಪೂಂಜಾ ನ ವೃತ್ತಿಜೀವನೊಗು ಮಲ್ಲ ತಿರ್ಗೆಲ್ ಆಂಡ್.
ಲೆಜೆಂಡರಿ ಸ್ಪಿನ್ನರ್ ಅನಿಲ್ ಕುಂಬ್ಳೆನ ಲೆಕನೇ ಯಶ್ರಾಜ್ಲಾ ಸುರುಟು ಫಾಸ್ಟ್ ಬೌಲರ್ ಆದಿತ್ತೆರ್. ಆಂಡ, ಬೌಲಿಂಗ್ ಆ್ಯಕ್ಷನ್ ಸಮಸ್ಯೆರ್ದಾವರ ಬೊಕ್ಕ ಆರ್ ಲೆಗ್ ಸ್ಪಿನ್ನರ್ ಆಯೆರ್.