Last updated on December 19th, 2025 at 08:23 am
ಬಜ್ಪೆ, ಡಿ. 19: ಸಾಮಾಜಿಕ ಬಲೆತ್ತಾನೊಡು ಬಜ್ಪೆ ಪೊಲೀಸೆರೆಗ್ ನೆರ್ತಿನ ಆರೋಪಡ್ ಒರಿಯನ್ ಪೊಲೀಸೆರ್ ಕೈದ್ ಮಲ್ತ್ದೆರ್.
ತೊರ್ತಲ್ ಕಾಟಿಪಳ್ಳ ನಿವಾಸಿ ಅಭಿಷೇಕ್ ಎಂ. (23) ಕೈದಾತಿನ ಆರೋಪಿ ಪನ್ದ್ ಪೊಲೀಸೆರ್ ಒಲವು ಕೊರ್ತೆರ್. ಆರೋಪಿ mr_a_titude 22 ಪನ್ಪಿ Instagram ಪೇಜ್ಡ್ ಬಜ್ಪೆ ನಿಸರ್ಗ ಹೋಟೆಲ್ದ ಫೋಟೊ ಪಾಡ್ದ್ ಅವೆತ ಮಿತ್ತ್ “ಬಜ್ಪೆ ಪೊಲೀಸ್ ಸ್ಟೇಶನ್ ಸೀಮೆಡ್ ವರದಿ ಆತಿನ ಕೆರ್ತಿನ ಪ್ರಕರಣೊದ ಆರೋಪಿಲೆಗ್ ಬಜ್ಪೆ ಪೊಲೀಸೆರೆರ್ದ್ ರಾಜಾತಿಥ್ಯ, ದಿನೊಲಾ ನಿಸರ್ಗ ಹೋಟೆಲ್ ಬಜ್ಪೆ ರ್ದ್ ಬೀಫ್ ವನಸ್ ಕೊರೊಂದುಲ್ಲೆರ್. ಜನೊಕ್ಲೆನ್ ಕಾಪೊಡಾಯಿನ ಪೊಲೀಸ್ ಅಪರಾಧಿಲೆನೊಟ್ಟುಗು ಕೂಡೊಂದು ಪೊಲೀಸ್ ಇಲಾಖೆನ್ ಬೊರ್ಚಂದಿನೆಕ್ ಗಲಸೊಂದುಲ್ಲೆರ್. ಮುಲ್ಪ ಬೇಲಿಯೇ ಲಕ್ಕ್ದ್ ಕಂಡ ಮೇಯೊಂದುಂಡು. ಮುಲ್ಪ ಪೊಲೀಸ್ದಕ್ಲೆನ ಮಿತ್ತ್ ದೀತಿನ ನಂಬಿಗೆ ಕಲು ಆವೊಂದುಂಡು” ಪನ್ದ್ ಪೊಲೀಸೆರೆಗ್ ನೆರ್ಪುಲೆಕ ಬರೆದ್ ಪೋಸ್ಟ್ ಮಲ್ತ್ದೆ ಪನ್ದ್ ಆರೋಪ ಮಲ್ತ್ದೆರ್. ಈ ಬಗೆಟ್ ಪ್ರಕರಣ ದಾಕಲ್ತೊಂದು ಬಜ್ಪೆ ಪೊಲೀಸೆರ್ ಆರೋಪಿ ಅಭಿಷೇಕ್ನ್ ಕೈದ್ ಮಲ್ತ್ದೆರ್.
ಅಭಿಷೇಕ್ನ ಮಿತ್ತ್ ತೊರ್ತಲ್ ಪೊಲೀಸ್ ಸ್ಟೇಶನ್ಡ್ ಮಂಗಳಪೇಟೆ ನಿವಾಸಿ ಫಾಝಿಲ್ನ್ ಕೆರ್ತಿನ, ಕೆರ್ಪುನ ಪುನೆಪು, ಹಲ್ಲೆ ಪ್ರಕರಣ, ಕಾಪು ಪೊಲೀಸ್ ಸ್ಟೇಶನ್ಡ್ ಕಲ್ವೆ ಪ್ರಕರಣೊಲು ದಾಕಲಾದುಲ್ಲ.
ಆರೋಪಿನ್ ಕೈದ್ ಮಲ್ದಿನ ಪೊಲೀಸೆರ್ ನನದ ಜಡ್ತೆಗ್ ಸೆನ್ ಪೊಲೀಸೆರೆ ವಶೊಕು ಒಪ್ಯಾದೆರ್. ಬೊಕ್ಕ ನ್ಯಾಯಂತಡೆಕ್ ಲೆತೊಂದು ಪೋತ ಪನ್ದ್ ಪೊಲೀಸೆರ್ ಒಲವು ಕೊರ್ತೆರ್.