Last updated on December 4th, 2025 at 09:32 am
ಉಬಾರ್, ಡಿ. 03 : ಅಪ್ರಾಪ್ತ ಪೊಣ್ಣು ಒರ್ತಿ ಕೀಟನಾಶಕ ಪರ್ದ್ ಆತ್ಮಹತ್ಯೆ ಮಲ್ತೊಂದಿನ ಪ್ರಕರಣೊಗು ಸಂಬಂಧಿತಿನ ಇರ್ವೆರ್ ಆರೋಪಿಲೆಡ್ ಪ್ರಮುಖ ಆರೋಪಿ ಅಪ್ರಾಪ್ತೆ ಆಣ್ ಪನ್ದ್ ಪ್ರಾಥಮಿಕ ಜಡ್ತೆಡ್ ತೋಜಿದ್ ಬತ್ತಿತ್ತ್ದ್, ನನದ ಕಾನೂನು ಕ್ರಮ ಗೆತೊನರೆ ಉಲ್ಲೆರ್.
ಒಯಿಲ್ ಬರೆಪಾದಿನಾರೆನ ಅಪ್ರಾಪ್ತ ಪ್ರಾಯೊದ ಮಗಲ್, ನ.4 ತಾನಿ ಇಲ್ಲಡ್ ಕೀಟನಾಶಕ ಪರ್ದ್ ಉಸಾರ್ ತತ್ತ್ದ್, ನ. 12ತಾನಿ ಆಸ್ಪತ್ರೆಡ್ ತೀರ್ದಿನ ಬಗೆಟ್ ಉಬಾರ್ ಪೊಲೀಸ್ ಸ್ಟೇಶನ್ಡ್ ಯು.ಡಿ.ಆರ್ ನಂಬ್ರ: 56/2025 ಕಲಂ: 194 (3) (IV)BNSS ದ ಪ್ರಕಾರ ಪ್ರಕರಣ ದಾಕಲಾದಿತ್ತ್ಂಡ್.
ಪ್ರಕರಣ ದುಂಬರಿನ ಲೆಕನೆ, ತೀರ್ದಿನ ಪೊಣ್ಣನ್ ಒರಿ ಆರೋಪಿ ಲೈಂಗಿಕವಾದ್ ಗಲಸೊಂದು, ಕುಡೊರಿ ಆರೋಪಿನೊಟ್ಟುಗು ಸೇರ್ದ್ ಪೊಣ್ಣಗ್ ಕಿರುಕುಳ ಕೊರ್ದು, ಪೋಡಿಕಟ್ಟಾದಿನೆರ್ದಾವರ ಪೊಣ್ಣು ಆತ್ಮಹತ್ಯೆ ಮಲ್ತೊಂದಲ್ ಪನ್ದ್ ತೀರ್ದಿನ ಪೊಣ್ಣನ ಅಪ್ಪೆ ನ. 28ದಾನಿ ಉಬಾರ್ ಪೊಲೀಸ್ ಸ್ಟೇಶನ್ಡ್ ಒಯಿಲ್ ಬರೆಪಾದೆರ್. ಒಯಿಲ್ದ ಆಧಾರೊಡು ಅ.ಕ್ರ: 111/2025 ಕಲಂ: 74, 79, 108 ಒಟ್ಟುಗು 3(5) BNS & ಕಲಂ: 8 ಪೋಕ್ಸೋ ಕಾಯ್ದೆ ದ ಪ್ರಕಾರ ಪ್ರಕರಣ ದಾಕಲಾತ್ಂಡ್.