Last updated on December 19th, 2025 at 04:40 pm
ಡಬ, ಡಿ. 18: ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ, ನೇತ್ರಾವತಿ ತುಳು ಕೂಟ ರಾಮಕುಂಜ(ರಿ.) ಬೊಕ್ಕ ತೆಗ್ರ್ ತುಳುಕೂಟ ನೂಜಿಬಾಳ್ತಿಲ (ರಿ.) ಮೊಕಲೆನ ಮುತಾಲಿಕೆಡ್ ಕಡಬ ತಾಲೂಕ್ದ ಕಡೀರ ತುಳು ಸಮ್ಮೇಳನೊ ಡಿಸೆಂಬರ್ 20 ಬೊಕ್ಕ 21 ತಾನಿ ಕೇಪು ಕುಟ್ರುಪ್ಪಾಡಿ ಶ್ರೀ ಮಹಾಗಣಪತಿ ಲಕ್ಷ್ಮೀ ಜನಾರ್ಧನ ಆಂಜನೇಯ ದೇಲಂತಡೆದ ಸಭಾಂಗಣೊಡು ನಡಪರೆಗುಂಡು.
ತುಳು ಬಾಸೆದ ಒರಿಪು ಬುಲೆಪುಗು, ತುಳು ಬಾಸೆನ್ ಸಂವಿಧಾನೊದ 8ನೇ ಪರಿಚ್ಛೇದೊಗು ಗೋಡ್ಯಾವೊಡು ಪನ್ಪಿ ಹಕ್ಕೊತ್ತಾಯ ಮಂಡನೆ ಮಲ್ಪುನ ಉದ್ದೇಸೊಡು ಅಟ್ಟನೆ ಆತಿನ ತಾಲೂಕ್ದ ಕಡೀರ ತುಳು ಸಮ್ಮೇಳನೊದ ಗುರ್ಕಾರೆ ಆದ್ ಶ್ರೀ ರಾಮಕುಂಜೇಶ್ವರ ಆಂಗ್ಲ ಮಾಧ್ಯಮ ಶಾಲೆದ ಕಾರ್ಯಂತೆರ್ ಶ್ರೀ ಸೇಸಪ್ಪ ರೈ ರಾಮಕುಂಜ ಅಜತ್ ಬೈದೆರ್.
ತುಳುನಾಡ ಗೊಬ್ಬು, ನಲಿಕೆಲು, ತುಳು ಭಜನೆ ಇಂಚ ಸಾರ್ವಜನಿಕೆರೆಗ್ ಬೇತೆ ಬೇತೆ ಪಂತೊಲೆನ್ ಕಾಣಿಯೂರು, ರಾಮಕುಂಜ, ಸವಣೂರು, ನೂಜಿಬಾಳ್ತಿಲ ಭಾಗೊಲೆಡ್ ನಡಪಾದ್ ಡಿ. 20ನೇ ಸನಿಯಾರ ಪುದೆಕಾಣಿಗೆ ಮೆರವಣಿಗೆದ ಮುಕೇನ ಸಮ್ಮೇಳನೊಗು ಅಧಿಕೃತ ಚಾಲನೆ ತಿಕ್ಯೆರ ಉಂಡು. ಎಲ್ಲೆ, ಸನಿಯಾರ ಕಡಬದ ಅಪ್ಪೆ ದುರ್ಗಾಂಬಿಕೆನ ದೇಲಂತಡೆರ್ದ್ ಪಿದಡ್ದ್ ಕೇಪು ದೇಲಂತಡೆ ಮುಟ್ಟ ಪೋಯೆರ ಇಪ್ಪುನ ಮೆರವಣಿಗೆದ ಉದಿಪನ ಕಡಬ ಪಟ್ಟಣ ಪಂಚಾಯತ್ದ ಗುರ್ಕಾರ್ದಿ ತಮನ್ನಾ ಜಬೀನ್ ಮಲ್ಪೆರಗುಲ್ಲೆರ್, ದುರ್ಗಾಂಬಿಕಾ ದೇಲಂತಡೆದ ವ್ಯವಸ್ಥಾಪನ ಸಮಿತಿದ ಗುರ್ಕಾರ್ಲು ಚಂದ್ರಶೇಖರ್ ಕರ್ಕೇರ ತುಳುವಪ್ಪೆನ ಒರುಕು ಪೂತರ್ಚನೆ ಮಲ್ಪೆರಗುಲ್ಲೆರ್.
ಡಿಸೆಂಬರ್ 21ತಾನಿ ಐತಾರ ಕಾಂಡೆ ವಿಧಾನಸಭಾಧ್ಯಕ್ಷೆರ್ ಯು.ಟಿ. ಖಾದರ್, ಶಾಸಕೆದಿ ಭಾಗೀರಥಿ ಮುರುಳ್ಯ ಬೊಕ್ಕ ಸಮ್ಮೇಳನಾಧ್ಯಕ್ಷೆ ಸೇಸಪ್ಪ ರೈಕುಲು ಕೊಡಿ ಏರಾಯೆರ ಉಲ್ಲೆರ್. ಕುಡುಮದ ಖಾವಂದೆರ್ ಡಾ. ಡಿ. ವೀರೇಂದ್ರ ಹೆಗ್ಗಡೆರ್ ಸಮ್ಮೇಳನೊದ ಉದಿಪನ ಮಲ್ಪೆರಗುಲ್ಲೆರ್. ಸುಬ್ರಹ್ಮಣ್ಯ ಮಠೊತ ಸ್ವಾಮಿಲು, ಒಡಿಯೂರು ಸ್ವಾಮಿಲು ಆಶೀರ್ವಚನ ಕೊರ್ಯೆರ ಉಲ್ಲೆರ್.
ಆಳ್ವಾಸ್ ವಿದ್ಯಾ ಸಂಸ್ಥೆದ ಡಾ. ಮೋಹನ್ ಆಳ್ವೆರ್, ಉದ್ಯಮಿ ಶಶಿಧರ ಶೆಟ್ಟಿ ಬರೋಡ, ರಾಜ್ಯ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾರೆ ತಾರಾನಾಥ ಗಟ್ಟಿ, ಸಂಸದೆ ಕ್ಯಾ। ಬ್ರಿಜೇಶ್ ಚೌಟೆರ್, ಶಾಸಕೆ ಅಶೋಕ್ ಕುಮಾರ್ ರೈಕುಲು, ಕಿಶೋರ್ ಕುಮಾರ್ ಬೊಟ್ಯಾಡಿ, ವಿದ್ಯಾರಶ್ಮಿ ವಿದ್ಯಾಲಯೊದ ಸಂಚಾಲಕೆ ಕೆ. ಸೀತಾರಾಮ ರೈ ಸವಣೂರು ಬೊಕ್ಕ ಪಾಕ ಜನ ಬಿನ್ನೆರ್ ಪಾಲ್ಪಡೆಯೆರ ಉಲ್ಲೆರ್.
ತುಳನಾಡ್ಡ್ ನಿಚ್ಚಗಲಕೆದ ಪಿರಾಕ್ದ ಸೊತ್ತುಲೆನ ತೂಪರಿಕೆ ಇಪ್ಪುಂಡು. ಶಾಲೆಲೆಡ್ ತುಳುಕಲ್ಪಾಯೆರೆ ಸಮ್ಮೇಳನೊದ ಪಾತ್ರ, ತುಳುತ ಬುಲೆಚ್ಚಿಲ್ಡ್ ಸಂಘ ಸಂಸ್ಥೆಲೆನ ಪಾತ್ರ, ತುಳು ಕಲ್ಪಾವೊಂದುಪ್ಪುನ ಶಾಲೆಲೆನ್ ಎಂಚ ಎಚ್ಚ ಮಲ್ಪೊಲಿ ಪನ್ಪಿ ವಿಚಾರೊಲೆನ ಬಗೆಟ್ ವಿಚಾರಗೋಷ್ಠಿ ನಡಪುಂಡು. ಶ್ರೀಮತಿ ಸರಿತಾ ಜನಾರ್ದನ್ ಬರೆತಿನ ಮಸ್ತಿರೆ ಬುಡುಗಡೆ, ಕಬಿತೆ ಬೊಕ್ಕ ಕಥಾಗೋಷ್ಠಿಲೆನ ನಡುಟು ಸಾಂಸ್ಕೃತಿಕ ಕಾರ್ಯಕ್ರಮ ನಡಪುಂಡು. ಸಮ್ಮೇನಾಧ್ಯಕ್ಷರೆನೊಟ್ಟುಗು ಸಂವಾದ ಕಾರ್ಯಕ್ರಮ, ಸಾದಗೊ ಬೆನ್ತಿನಕ್ಲೆಗ್ ಸನ್ಮಾನ ನಡಪುಂಡು. ಬಯ್ಯದ ಸಮಾರೋಪ ಸಮಾರಂಭೊಡು ಪುತ್ತೂರು ಧರ್ಮ ಪ್ರಾಂತೊದ ಧರ್ಮಾಧ್ಯಕ್ಷೆರ್ ಡಾ| ಗೀವರ್ಗೀಸ್ ಮಕಾರಿಯೋಸ್ ಮೇರ್ ಗುರ್ಕಾರ್ಮೆ ವಯಿತೊನುವೆರ್. ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸದಸ್ಯೆ ದುರ್ಗಾಪ್ರಸಾದ್ ರೈ ಕುಂಬ್ರ ಸಮಾರೋಪ ಭಾಷಣ ಮಲ್ಪರೆ ಉಲ್ಲೆರ್.
ಈ ಬಗೆಟ್ ನಡತಿನ ಪತ್ರಿಕಾಗೋಷ್ಠಿಡ್ ಸಮ್ಮೇಳನೊದ ಸ್ವಾಗತ ಸಮಿತಿದ ಅಧ್ಯಕ್ಷೆ ಶಿವರಾಮ ಶೆಟ್ಟಿ ಕೇಪು, ಉಪಾಧ್ಯಕ್ಷೆ ಜಯಸೂರ್ಯ ರೈ ಮಾದೋಡಿ, ಕಾರ್ಯದರ್ಶಿ ಸರಿತಾ ಜನಾರ್ದನ್ ಬೇತೆ ಬೇತೆ ಕಾರ್ಯಕ್ರಮೊಲೆನ ಬಗೆಟ್ ಒಲವು ಕೊರ್ಯೆರ್. ಸಮಿತಿದ ಸಂಚಾಲಕೆ ಉಮೇಶ್ ಶೆಟ್ಟಿ ಸಾಯಿರಾಂ, ಪ್ರಧಾನ ಕಾರ್ಯದರ್ಶಿ ಗಿರಿಶಂಕರ ಸುಲಾಯ, ಕಾರ್ಯದರ್ಶಿ ಕಿಶೋರ್ ಕುಮಾರ್ ಬಿ., ಜತೆ ಕಾರ್ಯದರ್ಶಿ ಪ್ರೇಮಾ ಒತ್ತುಪಾಲ್ ಇತ್ತೆರ್.
ಈ ಲೇಸ್ಡ್ ಆಯಿನಾತ್ ಎಚ್ಚ ಸಂಖ್ಯೆಡ್ ತುಳುವೆರ್ ಪಾಲ್ಪಡೆದ್ ಸಮ್ಮೇಳನೊನು ಗೆಂದಾದ್ ಕೊರೊಡು ಪನ್ದ್ ಸಂಘಟಕೆರ್ ಬಿನ್ನೈತೊಂದೆರ್.