Last updated on December 19th, 2025 at 12:37 pm
ಢಾಕಾ, ಡಿ. 19: ವಿಪಕ್ಷ ನಾಯಕೆ ಉಸ್ಮಾನ್ ಹಾದಿನ್ ಕೆರ್ನ ಬೆರಿಟೇ ಬಾಂಗ್ಲಾದೇಶೊಡು ಕುಡ ಹಿಂಸಾಚಾರ ಸುರು ಆತ್ಂಡ್. ಎಲೆಕ್ಷನ್ ಪ್ರಚಾರೊದ ಪೊರ್ತುಡು ಅವಾಮಿ ಲೀಗ್ ಪಕ್ಷೊದ ನಾಯಕೆ ಉಸ್ಮಾನ್ ಹಾದಿನ ಮಿತ್ತ್ ಫೈರಿಂಗ್ ನಡತಿತ್ತ್ದ್, ಮರ್ದ್ಗ್ ಸಿಂಗಾಪುರಗ್ ಲೆತೊಂದು ಪೋದಿತ್ತೆರ್. ಆಂಡ ಮರ್ದ್ ಪಲಿಪಂದೆ ಆರ್ ತೀರ್ದೆರ್.
ಉಸ್ಮಾನ್ ಹಾದಿ ಸೈದಿನೆಕ್ ಪಿಸ್ರ್ಡ್ ಆರೆನ ಜನೊಕುಲು ಬೊಕ್ಕ ಪೊರ್ಮ್ಬಾಟಗಾರೆರ್ ಕೋಡೆ ರಾತ್ರೆ ಬಾಂಗ್ಲಾದೇಶೊದ ಪಾಕ ಕಡೆಟ್ ಹಿಂಸಾತ್ಮಕ ಪೊರ್ಮ್ಬಾಟ ಮಲ್ತ್ದೆರ್. ರಾಜಧಾನಿ ಢಾಕಾಡ್ ಇಪ್ಪುನ ಪುಗರ್ತೆದ ಪ್ರೋಥೋಮ್ ಅಲೋ ಪತ್ರಿಕೆದ ಕಟ್ವಾನೊದ ಮಿತ್ತ್ ದಾಳಿ ನಡತಿತ್ತ್ದ್, ಬೇತೆ ಬೇತೆ ಜಾಗೆಲೆಡ್ ಸೂ ಪಾಡ್ದ್ ಆಕ್ರೋಶ ತೂಪಾದೆರ್.
ಈ ನಡಕೆರ್ದ್ ಬೊಕ್ಕ ಮೊಹಮ್ಮದ್ ಯೂನಸ್ ಮುತಾಲಿಕೆದ ಸರ್ಕಾರೊದ ವಿರುದ್ಧ ಬಾರೀ ವಿರೋಧ ತೋಜಿದ್ ಬರೊಂದುಂಡು. ಕಾನೂನು ಸುವ್ಯವಸ್ಥೆ ಅಲಕ್ಕ ತೆಟ್ಟ್ದ್ ಪೋತುಂಡು ಪನ್ಪಿ ಆರೋಪಲಾ ಕೇನ್ದ್ ಬೈದ್ಂಡ್. ಪರಿಸ್ಥಿತಿನ್ ಅಂಕೆಗ್ ಕನಯೆರೆ ಭದ್ರತಾ ಪಡೆಕ್ಲೆನ್ ಉಂತಾದೆರ್.
ಕರಿನ ವರ್ಸ ಪ್ರಧಾನಿ ಶೇಖ್ ಹಸೀನಾರೆನ್ ಅಧಿಕಾರೊರ್ದು ಜಪ್ಪಾಯೆರ ಬಾಂಗ್ಲಾದೇಶೊಡು ಬಾರೀ ಪ್ರತಿಭಟನೆಲು ನಡತಿತ್ತ. ಅವೆರ್ದ್ ಬೊಕ್ಕ ಶೇಖ್ ಹಸೀನಾ ದೇಶ ಬುಡ್ದ್ ಭಾರತೊಗು ಬತ್ತಿತ್ತೆರ್. ಬೊಕ್ಕ ಮೊಹಮ್ಮದ್ ಯೂನಸ್ನ ಮುತಾಲಿಕೆಡ್ ಮಧ್ಯಂತರ ಸರ್ಕಾರ ಉಂಡಾದಿತ್ತ್ಂಡ್. ಇತ್ತೆ ಉಸ್ಮಾನ್ ಹಾದಿ ಸೈತಿಬೊಕ್ಕ ಬಾಂಗ್ಲಾದೇಶ ಕುಡೊರ ಅಸ್ಥಿರತೆದಂಚಿ ಪೋವೊಂದುಂಡು.