Last updated on December 8th, 2025 at 10:22 am
ಒಡಿಪು, ಡಿ. 08: ಉಸಾರ್ ತತ್ತ್ದ್ ಗಾತಿದ ಸ್ಥಿತಿಟ್ ಇತ್ತಿನಾರೆನ್ ಜಿಲ್ಲಾ ಆಸ್ಪತ್ರೆಗ್ ಲೆತೊಂದು ಪೋಯೆರ ಸುಮಾರ್ ರಡ್ಡರೆ ಗಂಟೆದಾತ್ ಪೊರ್ತು 108 ಆಂಬ್ಯುಲೆನ್ಸ್ ಆವಡ್ ಬೇತೆ ಪ್ರೈವೇಟ್ ಆಂಬ್ಯುಲೆನ್ಸ್ ಆವಡ್ ತಿಕ್ಕಂದಿನೆರ್ದಾವರ, ಕಡೆಕ್ ಆರೆನ್ ಗೂಡ್ಸ್ ಟೆಂಪೋಡು ಆಸ್ಪತ್ರೆಗ್ ಲೆತೊಂದು ಪೋತಿನ ನಡಕೆ ಉದಿಯಾರ್ಡ್ ನಡತ್ದ್ಂಡ್.
ಉಸಾರ್ತತ್ತಿನಾರೆನ ಇಲ್ಲದಕುಲು ಬಯ್ಯ 7:00 ರ್ದ್ ರಾತ್ರೆ 9:30 ಮುಟ್ಟ 108 ತುರ್ತು ಸೇವೆಗ್ ಗಡೀ ಗಡಿ ಕಾಲ್ ಮಲ್ತ್ದೆರ್, ಆಂಡ ಒವ್ವೇ ಆಂಬ್ಯುಲೆನ್ಸ್ ತಿಕ್ಕ್ದಿಜಿ. ಪ್ರೈವೇಟ್ ಆಂಬ್ಯುಲೆನ್ಸ್ಲೆನ ವ್ಯವಸ್ಥೆಲಾ ಮಲ್ಪೆರಾತಿಜಿ. ಉಸಾರ್ ತತ್ತಿನಾರೆನ ಸ್ಥಿತಿ ಬೊಕಲಾ ತೆಟ್ಟೊಂದು ಬತ್ತಿನೆನ್ ತೂದು, ಇಲ್ಲದಕುಲು ಅಂಬಲ್ಪಾಡಿದ ವಿಷು ಶೆಟ್ಟಿ ಮೆರೆನ ಸಕಾಯ ಕೇನ್ದೆರ್.
ವಿಷು ಶೆಟ್ರ್ಲಾ ಆಂಬ್ಯುಲೆನ್ಸ್ ತರ್ಪಾಯೆರ ತೂಯೆರ್, ಆಂಡ ಒಂಜಿಲಾ ತಿಕ್ಕ್ದಿಜಿ. ಬೇತೆ ಸಾದಿದಾಂತೆ, ಆರೆನ ಆರೋಗ್ಯ ಬೊಕಲಾ ತೆಟ್ಟೊಂದು ಬತ್ತಿನೆರ್ದಾವರ, ವಿಷು ಶೆಟ್ರ್ ತನ್ನ ಗೂಡ್ಸ್ ಟೆಂಪೋದುಲಯಿ ಮಂಚ ದೀಪಾದ್, ಉಸಾರ್ ತತ್ತಿನಾರೆನ್ ಜಿಲ್ಲಾ ಆಸ್ಪತ್ರೆಗ್ ಲೆತೊಂದು ಪೋತೆರ್.
ಈ ನಡಕೆದ ಬಗೆಟ್ ಪಾತೆರ್ನ ವಿಷು ಶೆಟ್ಟಿ, “ಕರಿನ ಒಂಜಿ ವರ್ಸೊರ್ದಿಂಚಿ 108 ಆಂಬ್ಯುಲೆನ್ಸ್ಲ್ ಸಮ ಬೇಲೆ ಮಲ್ತೊಂದಿಜ್ಜ. ಅಂಚಾದ್ ಪಾಕ ಜನಕ್ ಬಂಙ ಆತ್ಂಡ್. ಈ ಸಮಸ್ಯೆನ್ ಯಾನ್ ಗಡೀ ಗಡಿ ಸರ್ಕಾರೊದ ಗುಮನೊಗು ಕನತ್ದೆ, ಆಂಡಲಾ ಎಡ್ಡೆ ಬುಲೆಚ್ಚಿಲ್ ದಾಲ ಆತಿಜಿ. ಈ ಪ್ರಕರಣೊಡ್ಲಾ ರಡ್ಡರೆ ಗಂಟೆ ಕಾತ್ಂಡಲಾ ಒವ್ವೇ ಆಂಬ್ಯುಲೆನ್ಸ್ ತಿಕ್ಕ್ದಿಜಿ. ಆರೆನ ಜೂವ ಒರಿಪಾಯೆರ ಎಂಕ್ಲ ಗೂಡ್ಸ್ ಟೆಂಪೋ ಗಲಸುನ ಅನಿವಾರ್ಯತೆ ಬತ್ತ್ಂಡ್. ಸರ್ಕಾರ ಬೊಕ್ಕ ಜಿಲ್ಲಾಡಳಿತ ಇತ್ತೆನೇ ತುರ್ತ ಕ್ರಮೊಕ್ಲೆನ್ ಗೆತೊನೊಡು. ಜನೊಕ್ಲೆ ಜೂವೊನು ಗೋಸ್ಮರಿ ಮಲ್ಪರೆ ಬಲ್ಲಿ. ಒಡಿಪು ಜಿಲ್ಲೆಡ್ 108 ಸೇವೆದ ಅಡಿಟ್ 18 ಆಂಬ್ಯುಲೆನ್ಸ್ಲ್ ಇತ್ತ್ಂಡಲಾ, ಕಾಲಿ ಐನ್ ಅತ್ತಂಡ ಆಜಿ ಮಾತ್ರ ಸಾರ್ವಜನಿಕ ಗಲಕೆಗ್ ತಿಕ್ಕುನು” ಪನ್ದ್ ಪನ್ಡೆರ್.
ಈ ನಡಕೆ ಒಡಿಪು ಜಿಲ್ಲೆಡ್ ತುರ್ತು ವೈದ್ಯಕೀಯ ಸೇವೆಲೆನ ಸ್ಥಿತಿತ ಬಗೆಟ್ ಪ್ರಶ್ನೆ ಮಲ್ಪುಲೆಕ ಮಲ್ದ್ಂಡ್. ಆಯಿನಾತ್ ಬೇಗೊಡು ಇಂಚಿನ ಸಮಸ್ಯೆಗ್ ಪಿರಿಕಟ್ಟ್ ಮಲ್ಪೊಡು.