Last updated on December 8th, 2025 at 12:02 pm
ಕುಡ್ಲ, ಡಿಸೆಂಬರ್ 08: ಅಪ್ರಾಪ್ತ ಪ್ರಾಯೊದ ಆಣಗ್ ಲೈಂಗಿಕ ಕಿರುಕುಳ ಕೊರ್ತಿನ ಆರೋಪಡ್ ತೊರ್ತಲ್ ಪೊಲೀಸೆರ್ ಆಂಜೊವು ಒರಿಯನ್ ಕೈದ್ ಮಲ್ತ್ದ್, ಆಯನ ಮಿತ್ತ್ ಪೋಕ್ಸೋ ಪ್ರಕರಣ ದಾಕಲ್ತ್ದೆರ್.
ತೊರ್ತಲ್ದ ಚೊಕ್ಕಬೊಟ್ಟು ಜುಮ್ಮಾ ಪಲ್ಲಿದ ಕೈತಲ್ದ ಹನಿ ಫ್ಯಾಶನ್ ಶಾಪ್ ಬೊಕ್ಕ ಜನರಲ್ ಸ್ಟೋರ್ದ ದನಿ ಮೊಹಮ್ಮದ್ ಇಸ್ಮಾಯಿಲ್ ಕೈದಾತಿನ ಆರೋಪಿ. ಸನಿಯಾರ 6ನೇ ಕ್ಲಾಸ್ದ ಆಣ್ ಒರಿ ಚಾಕೊಲೇಟ್ ಗೆತೊನ್ರ ಅಂಗಡಿಗ್ ಬತ್ತಿತ್ತೆ. ಅಪಗ ಆರೋಪಿ, ಆಣನ್ ಅಂಗಡಿದ ಅದೆತುಲಯಿ ಪತ್ತ್ದ್ ಪಾಡ್ದ್, ಕೈಕಾರ್ನ್ ಬಲ್ಲ್ಡ್ ಕಟ್ಟ್ದ್, ಲೈಂಗಿಕ ಕಿರುಕುಳ ಕೊರ್ತೆ ಪನ್ದ್ ಆರೋಪ ಮಲ್ತ್ದೆರ್.
ಬೇನೆಡ್ ಆಣ್ ವಿಷಯ ತನ್ನ ಅಪ್ಪೆಡ ಪನ್ಡ್ದ್, ಅಪ್ಪೆ ಬರೆಪಾದಿನ ಒಯಿಲ್ದ ಆಧಾರೊಡು, ಪೋಕ್ಸೋ ಕಾಯ್ದೆದಡಿಟ್ ಬಿಎನ್ಎಸ್ ಸೆಕ್ಷನ್ 351(2) ಬೊಕ್ಕ 127(2) ತ ಅಡಿಟ್ ಪ್ರಕರಣ ದಾಕಲಾತ್ಂಡ್. ತಾಪುರ್ತೋಪು ಕಾರ್ಯಾಚರಣೆ ಮಲ್ತಿನ ತೊರ್ತಲ್ ಪೊಲೀಸ್ ಸ್ಟೇಶನ್ ಇನ್ಸ್ಪೆಕ್ಟರ್ ಪ್ರಮೋದ್ ಕುಮಾರ್ ಬೊಕ್ಕ ಆರೆನ ಕೂಟ ಆರೋಪಿನ್ ಪತ್ತ್ದ್ ನ್ಯಾಯಂತಡೆದ ಎದುರು ಲೆತೊಂದು ಪೋತೆರ್. ನ್ಯಾಯಂತಡೆ ಆರೋಪಿಗ್ ನ್ಯಾಯಾಂಗ ಕೈದ್ ಕೊರ್ತುಂಡು.
ಕೈದಾತಿನ ಮೊಹಮ್ಮದ್ ಇಸ್ಮಾಯಿಲ್ ರಾಜಕೀಯ ಪಕ್ಷ ಒಂಜೆತ ಸ್ಥಳೀಯ ನಾಯಕೆ ಪನ್ದ್ಲಾ ತೆರಿದ್ ಬೈದ್ಂಡ್.