Last updated on December 8th, 2025 at 07:41 am
ಬೆಂಗಳೂರು, ಡಿ. 07: ಏಳ್ನೇ ಕ್ಲಾಸ್ ಕಲ್ತೊಂದಿಪ್ಪುನ ಆಣನ ಮಿತ್ತ್ ಹಲ್ಲೆ ಮಲ್ದಿನ ಆರೋಪಡ್ ಬೆಂಗಳೂರ್ದ ನಾರಾಯಣ ಇ-ಸ್ಕೂಲ್ದ ಪಿಟಿ ಶಿಕ್ಷಕೆ ರಾಜೇಶ್ ಪನ್ಪಿನಾರೆನ ಮಿತ್ತ್ FIR ದಾಕಲಾದಿತ್ತ್ದ್, ಇತ್ತೆ ಬೆಂಗಳೂರ್ದ ಹುಳಿಮಾವು ಪೊಲೀಸೆರ್, ಶಿಕ್ಷಕೆ ರಾಜೇಶ್ ನ್ ಕೈದ್ ಮಲ್ತ್ದೆರ್. ಶಿಕ್ಷಕೆ ರಾಜೇಶ್ ಸ್ಟಾಫ್ ರೂಮ್ಡ್ ಬೇತೆ ಶಿಕ್ಷಕೆರೆ ಎದುರು ಆಣನ ಕೆಪ್ಪೆಗ್ ಆಕ್ದಿತ್ತ್ದ್, ಆಕಿನ ಪೆಟ್ಟ್ಗ್ ಆಣನ ಕೆಪ್ಪೆ ಬಾತ್ದ್ಂಡ್. ಉಂದೆರ್ದಾವರ ಆಣ್ ಇಲ್ಲಗ್ ಪೋದಿಜ್ಜಂಡ್. ಅಂಚಾದ್ ಅಪ್ಪೆಅಮ್ಮೆ ಪೋಡಿದ್ ಶಾಲೆದಡೆ ಪೋದು ಕೇನ್ನಗ ಈ ನಡಕೆ ತೆರಿದ್ ಬೈದ್ಂಡ್.
ಬೆಂಗಳೂರ್ದ ಹುಳಿಮಾವು ಕೈತಲ್ದ ನಾರಾಯಣ ಇ-ಟೆಕ್ನೋ ಶಾಲೆದ ದೈಹಿಕ ಶಿಕ್ಷಕೆ ರಾಜೇಶ್, ಏಳನೇ ಕ್ಲಾಸ್ದ ಆಣನ ಕೆಪ್ಪೆಗ್ ನಾಲೈನ್ ಶಿಕ್ಷಕೆರೆ ಎದುರು ಆಕ್ದಿತ್ತೆರ್. ಆಣನ್ ಇಲ್ಲಗ್ ಪೋಯೆರ ಬುಡಂದೆ ಬಯ್ಯ ಮುಟ್ಟಲಾ ಶಾಲೆಡೇ ಉಂತಾದಿತ್ತೆರ್ ಪನ್ಪಿ ಆರೋಪಲಾ ಕೇನ್ದ್ ಬೈದ್ಂಡ್
ಬಯ್ಯಾಂಡಲಾ ಮಗೆ ಇಲ್ಲಗ್ ಬರಂದಿನೆನ್ ತೂದು ಆಯನ ಅಪ್ಪೆಅಮ್ಮೆ ಶಾಲೆದಂಚಿ ಬತ್ತ್ದೆರ್. ಶಾಲೆಗ್ ಬತ್ತ್ದ್ ತೂನಗ ಮಗನ ಕೆಪ್ಪೆ ಬಾತ್ದಿನ ವಿಷಯ ತೆರಿದ್, ಅಪಗನೇ ಆಯನ್ ಆಸ್ಪತ್ರೆಗ್ ಲೆತೊಂದು ಪೋದು ಮರ್ದ್ ಮಲ್ತ್ದೆರ್. ಬೊಕ್ಕ ಹುಳಿಮಾವು ಸ್ಟೇಶನ್ಡ್ ಶಿಕ್ಷಕೆ ರಾಜೇಶ್ನ ಮಿತ್ತ್ ಒಯಿಲ್ ಬರೆಪಾದೆರ್. ಒಯಿಲ್ದ ಆಧಾರೊಡು ಪ್ರಕರಣ ದಾಕಲ್ತೊಂದಿನ ಪೊಲೀಸೆರ್ ಎಫ್ಐಆರ್ ಪಾಡ್ದ್ ಕೈದ್ ಮಲ್ತ್ದೆರ್.
ಶಿಕ್ಷಕೆ ಆಕಿನಿ ದಾಯೆ?
ಆಣ್ ವನಸ್ದ ಪೊರ್ತುಡು ಕುಡೊರಿಯನ ಕುರ್ಚಿನ್ ಒಯ್ತ್ದೆ. ಕ್ಲಾಸ್ ರೂಮ್ಡ್ಲಾ ಇಂಚೆನೇ ಕುರ್ಚಿ ಒಯ್ತಿನೆರ್ದಾವರ ಆಣೊರಿ ತಿರ್ತ್ ಬೂರ್ದಿತ್ತೆ. ಬೂರ್ದಿನ ಆಣ್ ಸೀದಾ ಶಿಕ್ಷಕೆ ರಾಜೇಶ್ನಡೆ ಪೋದು ಪನ್ತೆ. ಶಿಕ್ಷಕೆ ರಾಜೇಶ್, ಆಣನ್ ಸ್ಟಾಫ್ ರೂಮ್ಗ್ ಲೆತೊಂದು ಪೋದು ಆಕ್ದೆರ್.