Last updated on December 4th, 2025 at 12:06 pm
ಪಡ್ಡೆದ್ರ, ಡಿ. 04: ಓಲು ಬೋಡಾ ಅಲ್ಪ ತ್ಯಾಜ್ಯ ಕಜವು ದಕ್ಕ್ದ್ ಪೋಪುನಕ್ಲೆನ ಮಿತ್ತ್ ಸ್ಥಳೀಯ ಆಡಳಿತ ವ್ಯವಸ್ಥೆ ಕಣ್ಣ್ ದೀವೊಂದಿತ್ತ್ದ್, ಅಂಚಿನಕ್ಲೆನ ಮಿತ್ತ್ ಶಿಸ್ತುಕ್ರಮ ಗೆತೊನುನ ಪ್ರಕ್ರಿಯೆ ಎಚ್ಚ ಆವೊಂದುಂಡು. ಪಡ್ಡೆದ್ರದ ಕೈತಲ್ ಕೋಡೆ, ಬುಧವಾರ ರಾಷ್ಟ್ರೀಯ ಪೆರ್ಸಾದಿದ ಬರಿಟ್ ಮೀನ್ದ ತ್ಯಾಜ್ಯ ನೀರ್ನ್ ಗುತ್ತಿನ ಒಂಜಿ ಗಾಡಿದ ಡ್ರೈವರ್ಗ್ ತೆಂಕ ಗ್ರಾಮ ಪಂಚಾಯತ್ 5 ಸಾರ ರೂ. ದಂಡ ಪಾಡ್ದ್ ಎಚ್ಚರ್ಗೆ ಕೊರ್ತುಂಡು. ಅಲ್ಪ ತ್ಯಾಜ್ಯ ದಕ್ಕಂದಿಲೆಕ ಎಚ್ಚರ್ಗೆದ ಪಲವೆ ಪಾಡ್ದಿತ್ತ್ಂಡಲಾ ಟೆಂಪೋ ಡ್ರೈವರ್ ಒರಿ ಐತ ಬರಿಟೇ ಮೀನ್ದ ನೀರ್ ಗುಪ್ಪುನ ಮುಕೇನ ಪಂಚಾಯತ್.ದ ಪಲವೆನ್ ಗೋಸ್ಮರಿ ಮಲ್ತ್ದೆ. ಉಂದೆನ್ ತೂಯಿನ ಸಾರ್ವಜನಿಕೆರ್ ಗ್ರಾ.ಪಂ.ಗ್ ಒಲವು ಕೊರ್ತೆರ್, ಅಪಗನೇ ಬತ್ತಿನ ಪಂಚಾಯತ್ ಸದಸ್ಯೆರ್ ಪಡ್ಡೆದ್ರ ಪೊಲೀಸೆರೆ ಸಕಾಯೊಡು ಫೈನ್ ಗೆತೊಂಡೆರ್.
ಆರೋಪಿ ಡ್ರೈವರ್ ಬಂಟ್ವಾಳ ದಂಚಿದಾಯೆ ಪನ್ದ್ ತೆರಿದ್ ಬೈದ್ಂಡ್. ಪೊಲೀಸೆರೆಡ ತನ್ನ ಪುದರ್ ಲತೀಫ್ ಪನ್ದ್ ಪನ್ತೆ ಆಂಡ ಪಂಚಾಯತ್ಗ್ ದಂಡ ಕಟ್ಟ್ನಗ ಸುಹೇನ್ ಪನ್ಪಿ ಪುದರ್ ಕೊರ್ತೆ.
ಇಂಚೆನೇ ಕೊಪ್ಪಲಂಗಡಿಡ್ ಕಜವು ದಕ್ಕಿನೆಕ್ ಕಾಪು ಪಂಚಾಯತ್ 2,000/-, ಸುಳ್ಯದ ಕನಕಮಜಲ್ಡ್ ಕಜವು ದಕ್ಕಿನಾಯಗ್ ಗ್ರಾಮ ಪಂಚಾಯತ್ 4,500/-, ಕುಕ್ಕೆಡ್ ರಡ್ಡ್ ಪ್ರತ್ಯೇಕ ಪ್ರಕರಣೊಲೆಡ್ ಪ್ರವಾಸಿಗೆರಗ್ 2,000/- ಬೊಕ್ಕ 1,500/- ಫೈನ್ ಇಂಚಿಪ ಪಾಡ್ದಿತ್ತೆರ್. ಸ್ಥಳೀಯ ಆಡಳಿತೊಲು ಈ ಬಗೆಟ್ ಲಕ್ಕೊಂದುಲ್ಲ.