Last updated on January 2nd, 2026 at 10:55 am
ಕುಡ್ಲ, ಜ. 02: ಪೊಸ ವರ್ಸೊದ ಗಮ್ಮತ್ತ್ದ ನಡುಟು ಪೇಂಟೆದ ಬೇತೆ ಬೇತೆ ಕಡೆಟ್ ಪೊಲೀಸೆರ್ ದೀತಿನ ಕಣ್ಣ್ ಬೊಕ್ಕ ತಪಾಸಣೆದ ಪೊರ್ತುಡು 52 ಜನ ಮಾದಕ ಸೊತ್ತು ದೆತೊಂದಿನ ದೃಢ ಆತ್ಂಡ್. ಉಂದೆತ ಒಟ್ಟುಗು ಮೂವೆರ್ ಡ್ರಗ್ ಪೆಡ್ಲರ್ನಕ್ಲೆನ್ ಪೊಲೀಸೆರ್ ಕೈದ್ ಮಲ್ತ್ದೆರ್.
ಕುಡ್ಲನ್ ಮಾದಕ ಮುಕ್ತ ನಗರ ಮಲ್ಪೆರ ಬೂಡಂದೆ ಪುನೆಯೊಂದುಪ್ಪುನ ಪೋಲೀಸೆರ್ ಗುರುವಾರ ರಾತ್ರೆ ಪೇಂಟೆದ ಮಾತಾ ಪೊಲೀಸ್ ಸ್ಟೇಶನ್ಲೆನ ಸೀಮೆಡ್ ವಿಶೇಷ ಕಾರ್ಯಾಚರಣೆ ಮಲ್ತೆರ್. 1,000ರ್ದ್ಲಾ ಎಚ್ಚ ಶಂಕಿತ ಜನೊಕುಲೆನ ಚೆಕಪ್ ಮಲ್ತ್ದೆರ್. ಒಟ್ಟು 52 ಜನ ಡ್ರಗ್ಸ್ ಗೆತೊಂದಿನ ಪತ್ತೆ ಆತ್ಂಡ್.
ತಿಕ್ಕ್ದ್ ಬೂರ್ದಿನೆಟ್ 25 ಜನ ವಿದ್ಯಾರ್ಥಿಲು ಉಲ್ಲೆರ್ (ಇಂದೆಟ್ ಇರ್ವೆರ್ ಕುಡ್ಲದಕುಲು ಬೊಕ್ಕ ಒರಿನ 23 ಜನ ಪಿದಯಿ ಜಿಲ್ಲೆದಕುಲು). ಒರಿನ 27 ಜನೊಟು 17 ಜನ ಕಾರ್ಮಿಕೆರ್ ಬೊಕ್ಕ ಬೇತೆ ಬೇತೆ ಬೇಲೆಲೆಡ್ ಇತ್ತಿನ 10 ಜನ ಉಲ್ಲೆರ್.
ಬೇತೆ ಬೇತೆ ಕಾರ್ಯಾಚರಣೆಲೆಡ್ ಪೊಲೀಸೆರ್ ಭಾರೀ ಪ್ರಮಾಣೊದ ಮಾದಕ ಸೊತ್ತುಲೆನ್ ವಶೊಕು ಗೆತೊಂದೆರ್. ಅಂಗಾರೆ ಒರಿ ಜವನನ್ ಕೈದ್ ಮಲ್ತ್ದ್ ಆಯರ್ದ್ 50 ಗ್ರಾಂ ಎಂಡಿಎಂಎ ವಶೊಕು ಗೆತೊಂದೆರ್. ಬುದಾರ ಇರ್ವೆರ್ ಆರೋಪಿಲೆನ್ ಪತ್ತ್ದ್ ಅಕ್ಲೆಡ ಇತ್ತಿನ 200 ಗ್ರಾಂ ಎಂಡಿಎಂಎ ಜಪ್ತಿ ಮಲ್ತ್ದೆರ್. ಕೈದಾತಿನ ಮೂವೆರ್ ಆರೋಪಿಲು ಕ್ರಿಮಿನಲ್ ಬ್ಯಾಕ್ಗ್ರೌಂಡ್ ಇತ್ತಿನಕುಲು ಪನ್ದ್ ತೆರಿದ್ ಬೈದ್ಂಡ್. ಈ ಬಗೆಟ್ ಪೋಲೀಸ್ ಆಯುಕ್ತೆ ಸುಧೀರ್ ಕುಮಾರ್ ರೆಡ್ಡಿ ಮೇರ್ ಒಲವು ಕೊರ್ತೆರ್.