Last updated on January 2nd, 2026 at 10:00 am
ಕಡಬ, ಜ. 01: ಬಸ್ ಸ್ಟ್ಯಾಂಡ್ಡ್ ಕಿಞ್ಞ ನಾಯಿದ ಕಿನ್ನಿಲೆನ್ ಪರಕ್ಕೊಲಿ ಮಲ್ತ್ ಬುಡ್ದ್ ಪೋತಿನ ಕೆಂಗುಡೆರೆಗ್ ಬುದ್ಧಿ ಕಲ್ಪಾಯೆರ ಗ್ರಾಮಸ್ಥೆರ್ ದೈವೊಲೆಗ್ ಪರಕೆ ಪನ್ಯೆರ ಪಿದಡ್ದಿನ ಪ್ರಸಂಗ ಕಡಬದ ಎಡಮಂಗಿಲ ಗ್ರಾಮೊಡು ನಡತ್ದ್ಂಡ್.
ಎಡಮಂಗಿಲ ಗ್ರಾಮೊದ ನಿಂತಿಕಲ್ಲ್ ಸಾದಿಡ್ ಇಪ್ಪುನ ಮಾಂಕಾಳಿ ಬಸ್ ಉಂತಡೆಡ್ ಈ ನಡಕೆ ನಡತ್ದ್ಂಡ್. ನನಲ ಕಣ್ಣ್ ಬುಡಂದಿನ ರಡ್ಡ್ ನಾಯಿದ ಕಿನ್ನಿಲೆನ್ ಏರೋ ಮುಲ್ಪ ಬಸ್ ಸ್ಟ್ಯಾಂಡ್ಡ್ ಬುಡ್ದು ಪೋತೆರ್. ಅಪ್ಪೆರ್ದ್ ದೂರ ಆದ್ ಪರಕ್ಕೊಲಿ ಆತಿನ ಈ ಕಿನ್ನಿಲು ಬಸ್ ಸ್ಟ್ಯಾಂಡ್ದ ಕೋಂಟುಡು ಕುಲೊಂದು ಬಡವುಡು ಅಪ್ಪೆನ್ ನೆನೆತೊಂದು ಚಳಿಕ್ ನಡ್ಗೊಂದು ಬುಲಿತೊಂದಿತ್ತ. ಈ ಕಿನ್ನಿಲೆನ ಬುಲಿಪು ತೂದು ಸಾದಿಯೆ ಪೋಪಿನಕ್ಲೆನ ಕಣ್ಣ ಅರುಟ್ ನೀರ್ ಕಟ್ಟೊಂದಿತ್ತ್ಂಡ್.
ಉಂದೆರ್ದಾವರ ಬೆಸರ್ಡ್ ನೆಟೆದಕುಲು ಇಂಚ ಕಿನ್ನಿಲೆನ್ ಬುಡ್ದು ಪೋತಿನಕ್ಲೆಗ್ ಪಾಠ ಕಲ್ಪಾಯೆರ ಪಿದಡ್ದೆರ್. ಕಿನ್ನಿಲೆನ್ ಬುಡ್ದು ಪೋತಿನ ಕೆಂಗುಡೆರೆನ್ ತೂವೊನ್ರ ದೈವೊಲೆಗ್ ಪರಕೆ ಪನ್ಯೆರ ಪಿದಡ್ದೆರ್.
‘ನಾಯಿದ ಕಿನ್ನಿಲೆನ್ ಕನತ್ ಬುಡ್ನಕಲೆಗ್ ಕೊರಗಜ್ಜಗ್ ಬೊಕ್ಕ ಕಾನತ್ತೂರ್ಗ್ ಪರಕೆ ಪನ್ಪ. ಪತೊಂದು ಪೋಲೆ ಇಜ್ಜಿಂಡ…’ ಪನ್ದ್ ಕನ್ನಡೊಡು ಬರೆದ್ ಬಸ್ ಸ್ಟ್ಯಾಂಡ್ಡ್ ಪಾಡ್ದಿನ ಪಲವೆ ಇತ್ತೆ ವೈರಲ್ ಆವೊಂದುಂಡು.
ಇಂಚಾಂಡಲಾ ಬಾಯಿ ಬರಂದಿನ ಕಿನ್ನಿಲೆನ್ ಕಣ್ಣ್ ಬುಲಾಯೆರ ದುಂಬೇ ಅಪ್ಪೆರ್ದ್ ದೂರ ಮಲ್ತ್ ಓಲೋಲು ಕೊನೊದು ಬುಡ್ಪಿನಕ್ಲೆಗ್ ಅಕಲ್ ಸಮ ಆದ್ ಕಿನ್ನಿಲೆಗ್ ಒಂಜಿ ವ್ಯವಸ್ಥೆ ಆವಡ್.