Last updated on January 22nd, 2026 at 10:03 am
ಕೋಯಿಕ್ಕೋಡ್ ಜನವರಿ 22: ಗೋವಿಂದಪುರಂ ಮೂಲೊದ ದೀಪಕ್ ಯು ಆತ್ಮಹತ್ಯೆ ಪ್ರಕರಣೊದ ಪ್ರಮುಖ ಆರೋಪಿ ಸೋಶಿಯಲ್ ಮಿಡಿಯಾ ಕಂಟೆಂಟ್ ಕ್ರಿಯೆಟರ್ ಶಿಮ್ಜಿತಾ ಮುಸ್ತಫಾ ಪನ್ಪಿನಾಲೆನ್ ಬುಧಾರ ಪೊಲೀಸೆರ್ ಕೈದ್ ಮಲ್ತ್ದೆರ್.
ಮೆಡಿಕಲ್ ಕಾಲೇಜ್ ಪೊಲೀಸೆರೆ ವಿಶೇಷ ಕೂಟ ಕೋಡೆ ಮಧ್ಯಾಹ್ನ ವಟಕಾರಡ್ ಇಪ್ಪುನ ಬಿನ್ನೆರೆನ ಇಲ್ಲರ್ದ್ ಶಿಮ್ಜಿತಾನ್ ವಶೊಕು ಗೆತೊಂಡೆರ್. ಬೊಕ್ಕ ಕೊಯಿಲಾಂಡಿ ತಾಲ್ಲೂಕ್ ಆಸ್ಪತ್ರೆಡ್ ವೈದ್ಯಕೀಯ ಪರೀಕ್ಷಾ ಪ್ರಕ್ರಿಯೆಲೆನ್ ಮುಗಿತ್ದ್ ಬೊಕ್ಕ ಆಲೆನ್ ಕೋಯಿಕ್ಕೋಡ್ ಮೆಡಿಕಲ್ ಕಾಲೇಜ್ ಪೊಲೀಸ್ ಸ್ಟೇಶನ್ಗ್ ಲೆತೊಂದು ಪೋತೆರ್.
ಗಾರ್ಮೆಂಟ್ ಕಂಪೆನಿ ಒಂಜೆಟ್ ಬೇಲೆ ಮಲ್ತೊಂದಿತ್ತಿನ ದೀಪಕ್ (41) ಐತಾರ ಕಾಂಡೆ ಮಂಕಾವು ಡ್ ತನ್ನ ಇಲ್ಲಡ್ ಬಲ್ಲ್ ಪಾಡೊಂದಿನ ಸ್ಥಿತಿಟ್ ತಿಕ್ಕ್ದೆರ್.
ಬಸ್ಡ್ ಪೋವೊಂದುಪ್ಪುನಗ ದೀಪಕ್ ಎನಡ ತತ್ತ್ದ್ ನಡತೊಂದೆ ಪನ್ದ್ ಆರೋಪ ಮಲ್ತ್ದ್ ಶಿಮ್ಜಿತಾ ವಿಡಿಯೋ ಒಂಜೆನ್ ಸಾಮಾಜಿಕ ಬಲೆತ್ತಾನೊಡು ಪೋಸ್ಟ್ ಮಲ್ತಿತ್ತಲ್. ಆ ವಿಡಿಯೋ ವೈರಲ್ ಆದಿತ್ತ್ದ್, ಉಂದೆರ್ದಾವರ ಬೆಸರ್ಡ್ ದೀಪಕ್ ಇಲ್ಲಡ್ ಬಲ್ಲ್ ಪಾಡೊಂದು ಆತ್ಮಹತ್ಯೆ ಮಲ್ತೊಂದೆರ್. ಈ ನಡಕೆ ಇಡೀ ದೇಶೊಡೇ ಭಾರೀ ಆಕ್ರೋಶಗ್ ನೆವನ ಆದಿತ್ತ್ಂಡ್. ಅಂಚಾದ್ ಅರೀಕೋಡ್ದ ಮಾಜಿ ಪಂಚಾಯತ್ ಸದಸ್ಯೆದಿ ಶಿಮ್ಜಿತಾನ ಮಿತ್ತ್ ಆತ್ಮಹತ್ಯೆಗ್ ಪ್ರಚೋದನೆ ಮಲ್ದಿನ ಆರೋಪಡ್ ಎಫ್ಐಆರ್ ದಾಕಲಾದಿತ್ತ್ಂಡ್. ಆತೇ ಅತ್ತಂದೆ ನಿರೀಕ್ಷಣಾ ಜಾಮೀನ್ ಕೇನ್ದ್ ಕೋಯಿಕ್ಕೋಡ್ ಜಿಲ್ಲಾ ಮ್ಯಾಜಿಸ್ಟ್ರೇಟ್ ನ್ಯಾಯಂತಡೆನ್ಲಾ ಸಂಪರ್ಕ ಮಲ್ತಿತ್ತಲ್. ಪೊಲೀಸೆರ್ ಪ್ರಕರಣ ದಾಕಲ್ತೊಂದಿ ಬೊಕ್ಕ, ಆಲ್ ದೆಂಗ್ತಪ್ಪಾದಿತ್ತಿನೆರ್ದಾವರ, ಅಧಿಕಾರಿಲು ಒರ್ಮೆಲಾ ನಾಡೊಂದಿತ್ತೆರ್. ಆಲ್ ದೇಶ ಬುಡ್ದ್ ಪೋವಂದಿಲೆಕ ತೂವೊನ್ರ ಲುಕ್ಔಟ್ ನೋಟಿಸ್ಲಾ ಪಿದಡ್ಪಾದಿತ್ತೆರ್.