Last updated on January 22nd, 2026 at 01:53 pm
ಕಾರ್ಕಳ, ಜ. 22: ತಾಲೂಕ್ದ ಬೋಳ ಗ್ರಾಮೊದ ಮಲಕ್ಯರ್ ಕಡ್ಕನ್ ನಾರಾಯಣ ಶೆಟ್ರೆನ ತೋಟದ ಗೂವೆಲ್ಗ್ ಬೂರ್ದು ಚಿಟ್ಟೆಪಿಲಿ ಒಂಜಿ ತೀರ್ದಿನ ನಡಕೆ ಬುದಾರ ಕಾಂಡೆ ತೆರಿದ್ ಬೈದ್ಂಡ್.
ತೀರ್ದಿನ ಚಿಟ್ಟೆಪಿಲಿ ಸುಮಾರ್ ಮೂಜಿ ವರ್ಸ ಪ್ರಾಯೊದ ಆಣ್ ಚಿಟ್ಟೆಪಿಲಿ ಪನ್ದ್ ಗುರ್ತ ಪತ್ತ್ದೆರ್. ಬುಧವಾರ ಕಾಂಡೆ ಇಲ್ಲದಕುಲು ನೀರ್ ಒಯ್ಪೆರೆ ಗೂವೆಲ್ದ ಬರಿಕ್ ಬನ್ನಗ ಚಿಟ್ಟೆಪಿಲಿ ಸೈತ್ ಬೂರ್ದಿನ ತೆರಿದ್ ಬೈದ್ಂಡ್. ಅಪಗನೇ ಅಕುಲು ಸಮಾಜ ಸೇವಕೆ ಸುಪ್ರೀತ್ ಶೆಟ್ಟಿ ಕೆದಿಂಜೆ ಮೆರೆಗ್ ಒಲವು ಕೊರ್ದಿತ್ತ್ದ್, ಆರ್ ಅರಣ್ಯ ಇಲಾಖೆದ ಅಧಿಕಾರಿಲೆಗ್ ವಿಷಯ ತೆರಿಪಾದೆರ್.
ಸುದ್ದಿ ತಿಕ್ಕಿನೇ ಅರಣ್ಯಾಧಿಕಾರಿ ಹುಕ್ರಪ್ಪ ಗೌಡೆರ್ ಬೊಕ್ಕ ಸಿಬ್ಬಂದಿಲು ಜಾಗೆಗ ಬತ್ತ್ದ್ ಪರಿಶೀಲನೆ ಮಲ್ತ್ದೆರ್. ಪ್ರಾಥಮಿಕ ಒಲವುದ ಪ್ರಕಾರ, ನಾಯಿನ್ ಬೆರಿಪತೊಂದು ಪೋನಗ ಚಿಟ್ಟೆಪಿಲಿ ತತ್ತ್ದ್ ಗೂವೆಲ್ಗ್ ಬೂರ್ದುಪ್ಪು ಪನ್ದ್ ಅಂದಾಜಿ ಮಲ್ದೆರ್. ಚಿಟ್ಟೆಪಿಲಿತ ಪುನ ಕುರಿನ ಸ್ಥಿತಿಟ್ ಇತ್ತಿನೆನ್ ತೂದು ಅಧಿಕಾರಿಲು, ಇಂದು ರಡ್ಡ್-ಮೂಜಿ ದಿನೊಕು ದುಂಬೇ ಗೂವೆಲ್ಗ್ ಬೂರ್ದು ತೀರ್ದುಪ್ಪು ಪನ್ದ್ ತೆರಿಪಾದೆರ್.
ನೆಟೆ ಸುತ್ತಮುತ್ತ ಪಾಕ ಇಲ್ಲ್ಲ್ ಇತ್ತ್ದ್, ಕರಿನ ಕೆಲ ದಿನೊರ್ದಿಂಚಿ ನೆಟೆ ಚಿಟ್ಟೆಪಿಲಿತ ಗಿರಾವು ಎಚ್ಚ ಆದಿತ್ತ್ಂಡ್. ಗ್ರಾಮಸ್ಥೆರೆ ಆತಂಕೊಗು ಅರಣ್ಯ ಇಲಾಖೆ ಪಾಕ ಸರ್ತಿ ಗೂಡು ದೀಡ್ಂಡಲಾ, ಒವ್ವೇ ಚಿಟ್ಟೆಪಿಲಿ ತಿಕ್ಕ್ದಿಜ್ಜಂಡ್.
ಅರಣ್ಯಾಧಿಕಾರಿ ಹುಕ್ರಪ್ಪ ಗೌಡ್ರೆನ ಮುತಾಲಿಕೆದ ಕೂಟ ಚಿಟ್ಟೆಪಿಲಿತ ಪುನೊನು ಗೂವೆರಲ್ರ್ದ್ ಮಿತ್ತ್ ಕನತ್ದ್, ಪಶುವೈದ್ಯೆರೆ ಎದುರು ಮರಣೋತ್ತರ ಪರೀಕ್ಷೆ ಮಲ್ತ್ಂಡ್. ಬೊಕ್ಕ ನಿಯಮಾನುಸಾರ ಚಿಟ್ಟೆಪಿಲಿತ ಅಂತ್ಯಕ್ರಿಯೆ ಮಲ್ತೆರ್.