Last updated on January 22nd, 2026 at 04:44 pm
ಪುತ್ತೂರು, ಜನವರಿ 22: ಜಡ್ಜ್ನ ಎದುರೇ ಆಂಜೊವು ಒರಿ ವಿಷ ಪರ್ದ್ ಆತ್ಮಹತ್ಯೆ ಮಲ್ತೊನರೆ ತೂತಿನ ನಡಕೆ ಪುತ್ತೂರ್ದ 5ನೇ ಎಚ್ಚಿಗೆದ ನ್ಯಾಯಂತಡೆಡ್ ನಡತ್ದ್ಂಡ್.
ಪುತ್ತೂರ್ದ ಕಾವು ಮಣಿಯಡ್ಕ ನಿವಾಸಿ ರವಿ (35) ಆತ್ಮಹತ್ಯೆ ಮಲ್ತೊನ್ರೆ ತೂತಿನಾರ್. ರವಿ ಬೊಕ್ಕ ಆರೆನ ಬೊಡೆದಿ ವಿದ್ಯಾಶ್ರೀನ ನಡುಟು ಲಡಯಿ ಆದಿತ್ತ್ದ್, ರಡ್ಡ್ ದಿನೊಕು ದುಂಬು ವಿದ್ಯಾಶ್ರೀನ ಕೆಕ್ಕಿಲ್ ಪೊಜೆಂಕ್ದ್ ಕೆರ್ಯೆರ ರವಿ ತೂದಿತ್ತೆರ್ಗೆ, ಕಂಡನೆ-ಬೊಡೆದಿನ ಲಡಯಿ ಪೊಲೀಸ್ ಸ್ಟೇಶನ್ಗ್ ಎತ್ತ್ದಿತ್ತ್ಂಡ್.
ಸಂಪ್ಯ ಗ್ರಾಮಾಂತರ ಪೊಲೀಸ್ ಸ್ಟೇಶನ್ಡ್ ಇನಿ ಕೇಸ್ ದಾಕಲಾಪುನ ಸಾಧ್ಯತೆ ಇತ್ತ್ಂಡ್, ಅಂಚಾದ್ ಇರ್ವೆರೆ ನಡುಟು ಬರಪನ್ಪಾವುನ ಪಾತೆರಕತೆ ನಡತಿತ್ತ್ಂಡ್. ಅಂಚಾದ್ ಸಂಪ್ಯ ಸ್ಟೇಶನ್ಗ್ ಬರ್ಯೆರ ರವಿಗ್ ಪೊಲೀಸೆರ್ ತೆರಿಪಾದೆರ್.
ಈ ನಡುಟು ರವಿ ಸೀದಾ ಪುತ್ತೂರು ನ್ಯಾಯಂತಡೆದ ಆವರಣೊಗು ಬತ್ತ್ದ್ ಜಡ್ಜ್ನ ಎದುರು ವಿಷ ಪರ್ತೆರ್.
ಆಂಜೊವು ಒರಿ ವಿಷ ಪರ್ತಿನ ಬಗೆಟ್ ಜಡ್ಜ್ ಅಲ್ಪದ ಸಿಬ್ಬಂದಿಗ್ ಸೂಚನೆ ಕೊರ್ತೆರ್. ವಿಷ ಪರಿಬೊಕ್ಕ ರವಿ ನ್ಯಾಯಂತಡೆಡೇ ಕಕ್ಕ್ದೆ. ಅಪಗನೇ ಅಲ್ಪ ಇತ್ತಿನಕುಲು ಆರೆನ್ ಪುತ್ತೂರು ಸರ್ಕಾರಿ ಆಸ್ಪತ್ರೆಗ್ ಲೆತೊಂದು ಪೋತೆರ್.
ಬೀಜದ ಮರಕ್ ಬುಡ್ಪುನ ಮರ್ದ್ನ್ ರವಿ ಪರ್ತೆರ್. ಎಂಡೋಸಲ್ಫಾನ್ ಬ್ಯಾನ್ ಆಯಿ ಬೊಕ್ಕ ಮಾರ್ಕೆಟ್ಡ್ ತಿಕ್ಕುನ ‘ಕರಾಟೆ’ ಕೀಟನಾಶಕ ಪರ್ತಿನ ರವಿನ ಸ್ಥಿತಿ ಬಾರೀ ಗಾತಿಡ್ ಉಂಡು. ರವಿನ್ ಎಚ್ಚಿಗೆ ಮರ್ದ್ಗ್ ಪುತ್ತೂರ್ರ್ದ್ ಕುಡ್ಲದ ಆಸ್ಪತ್ರೆಗ್ ಲೆತೊಂದು ಪೋತೆರ್. ಕುಡ್ಲದ ಆಸ್ಪತ್ರೆಗ್ ಲೆತೊಂದು ಪೋನಗ ಒಂಜೇ ಆಂಬ್ಯುಲೆನ್ಸ್ಡ್ ಕಂಡನಿ ಬೊಡೆದಿ ಪೋತೆರ್.