Last updated on January 7th, 2026 at 09:29 am
ಪಟ್ಟನಂತಿಟ್ಟ, ಜ. 07: ಶಬರಿಮಲೆಟ್ ದೇಬೆರೆ ಎದುರೇ ಭ್ರಷ್ಟಾಚಾರ ಮಲ್ಪೆರ ಅಧಿಕಾರಿಲು ಪಿದಡ್ದಿತ್ತ್ದ್, ಈತ್ತೆನೇ ಬಂಗಾರ್ ಕನ್ಡ್ದಿನ ಆರೋಪದ ಜಡ್ತೆ ಆವೊಂದುಪ್ಪುನಗನೇ, ಶಬರಿಮಲೆಟ್ ಕುಡೊಂಜಿ ಅಕ್ರಮ ಬೊಲ್ಪುಗು ಬೈದ್ಂಡ್ – ಈ ಸರ್ತಿ ‘ಆದಿಯ ಶಿಷ್ಟಂ ನೆಯ್ಯ್’ (ನೆಯ್ಯಭಿಷೇಕ ನೈವೇದ್ಯೊಡು ಒರಿನ ನೆಯಿ) ಪಟ್ಟುನೆಟ್. ಮಾರುನ ಕೌಂಟರ್ಗ್ ಕೊರ್ತಿನ ಸುಮಾರ್ ₹16 ಲಕ್ಷ ಮೌಲ್ಯೊದ ಸುಮಾರ್ 16,000 ಪ್ಯಾಕೆಟ್ ನೆಯಿ ತೋಜೊಂದಿಜ್ಜಿ. ನಡಕೆದ ಬಗೆಟ್ ದೇವಸ್ವಂ ವಿಜಿಲೆನ್ಸ್ ಜಡ್ತೆ ಸುರು ಮಲ್ದ್ಂಡ್.
ನೆಯ್ಯಭಿಷೇಕೊಗು ಅವಕಾಶ ತಿಕ್ಕಂದಿನ ಯಾತ್ರಿಕೆರ್ ಸಾಮಾನ್ಯವಾದ್ ಈ ‘ಆದಿಯ ಶಿಷ್ಟ ನೆಯ್ಯಿ’ನ್ ಗೆತೊನುವೆರ್. ಉಂದೆನ್ 100 ಮಿಲಿ ಪೌಚ್ಡ್ ಮಾರ್ಬೆರ್, ಪ್ರತಿ ಪ್ಯಾಕೆಟ್ಗ್ ₹100 ಬಿಲೆ ಉಂಡು. ದೇಲಂತಡೆದ ವಿಶೇಷ ಅಧಿಕಾರಿ ಸ್ಟಾಕ್ ನ್ ಗೆತೊಂದು ಕೌಂಟರ್ಲೆಗ್ ಕೊರ್ಪೆರ್. ಗೆತೊಂದಿನ ಪ್ಯಾಕೆಟ್ಲೆಗ್ ಬಾಕಿ ಇಪ್ಪುನ ಕಾಸ್ನ್ ದೇವಸ್ವಂ ಅಕೌಂಟ್ಗ್ ಜಮಾ ಮಲ್ದಿಜೆರ್ ಪನ್ದ್ ತೋಜಿದ್ ಬನ್ನಗ ವಿಜಿಲೆನ್ಸ್ ತಪಾಸಣೆದ ಪೊರ್ತುಡು ಅಕ್ರಮ ಬೊಲ್ಪುಗು ಬೈದ್ಂಡ್. ಈ ವ್ಯತ್ಯಾಸ ಇತ್ತೆದ ಮಂಡಲೊಡು ಮಾರ್ಯೇರ ದೀತಿನೆಕ್ ಸಂಬಂಧಿತಿನವು.